Shiva Purana · Chapter 3.15

nandīśvara uvāca//
viśvānarassapatnīkastacchrutvā nāraderitam//
tadevammanyamānobhūdvajrapātaṃ sudāruṇam

hā hatosmīti vacasā hṛdayaṃ samatāḍayat //
mūrcchāmavāpa mahatīṃ putraśokasamākulaḥ

śuciṣmatyapi duḥkhārttā rurodātīva dussaham //
atisvareṇa hārāvairatyantaṃ vyākulendriyā

śrutvārttanādamiti viśvanaropi mohaṃ hitvotthitaḥ kimiti kiṃtviti kiṃ kimetat//
uccairvadan gṛhapatiḥ kva sa me bahisthaḥ prāṇontarātmanilayassakaleṃdriyeśaḥ

tato dṛṣṭvā sa pitarau bahuśokasamāvṛtau //
smitvovāca gṛhapassabālaśśaṃkarāṃśajaḥ

gṛhapatiruvāca //
he mātastāta kiṃ jātaṃ kāraṇantadvadādhunā //
kimarthaṃ rudito'tyarthaṃ trāsastādṛkkuto hi vām

na māṃ kṛtavapustrāṇambhavaccaraṇareṇubhiḥ //
kālaḥ kalayituṃ śakto varākīṃ ciñcalālpikā

pratijñāṃ śṛṇutāntātau yadi vāntanayo hyaham //
kariṣyehaṃ tathā yena mṛtyustrasto bhaviṣyati

mṛtyuṃjayaṃ samārādhya garvajñaṃ sarvadaṃ satām //
japiṣyāmi mahākālaṃ satyaṃ tātau vadāmyaham

nandīśvara uvāca //
iti śrutvā vacastasya jāritau dvijadampatī//
akālamṛtavarṣaughairgatatāpau tadocatuḥ

dvijadampatī ūcatuḥ //
punarbrūhi punarbrūhi kīdṛkkīdṛk punarvada //
kālaḥ kalayitunnālaṃ varākī cañcalāsti kā

āvayostāpanāśāya mahopāyastvayeritaḥ //
mṛtyuṃjayākhyadevasya samārādhanalakṣaṇaḥ

tadvacca śaraṇaṃ śambhornātaḥ parataraṃ hi tat//
manorathapathātīta kāriṇaḥ pāpahāriṇaḥ

kinna śrutantvayā tāta śvetaketuṃ yathā purā //
pāśitaṃ kālapāśena rarakṣa tripurāntakaḥ

śilādatanayaṃ mṛtyugrastamaṣṭābdamātrakam //
śivo nijajanañcakre nandinaṃ viśvanaṃdinam

kṣīrodamathanodbhūtaṃ pralayānalasannibham //
pītvā halāhalaṃ ghoramarakṣadbhuvanatrayam

jalaṃdharaṃ mahādarpaṃ hṛtatrailokyasampadam //
rucirāṃguṣṭharekhottha cakreṇa nijaghāna yaḥ

ya ekeṣu nipātotthajvalanaistripurampurā //
trailokyaiśvaryasammūḍhaṃ śoṣayāmāsa bhānunā

kāmaṃ dṛṣṭinipātena trailokyavijayorjitam //
nināyānaṃgapadavīṃ vīkṣyamāṇeṣvajādiṣu

tambrahmādyaikakartārammeghavāhanamacyutam //
prayāhi putra śaraṇaṃ viśvarakṣāmaṇiṃ śivam

nandīśvara uvāca //
pitroranujñāmprāpyeti praṇamya caraṇau tayoḥ //
prādakṣiṇyamupāvṛtya bahvāśvāsya viniryayau

samprāpya kāśīṃ duṣprāpāmbrahmanārāyaṇādibhiḥ //
mahāsaṃvarttasantāpahantrīṃ viśveśapālitām

svardhunyā hārayaṣṭyeva rājitā kaṇṭhabhūmiṣu //
vicitraguṇaśālinyā harapatnyā virājitām

tatra prāpya sa vipreśaḥ prāgyayau maṇikarṇikām //
tatra snātvā vidhānena dṛṣṭvā viśveśvaramprabhum

sāñjalirnataśīrṣo'sau mahānandānvitassudhīḥ //
trailokyaprāṇasantrāṇakāriṇampraṇanāma ha

ālokyālokya talliṃgaṃ tutoṣa hṛdaye muhuḥ //
paramānaṃdakaṃdāḍhyaṃ sphuṭametanna saṃśayaḥ

aho na matto dhanyosti trailokye sacarācare //
yadadrākṣiṣamadyāhaṃ śrīmadviśveśvaraṃ vibhum

mama bhāgyodayāyaiva nāradena maharṣiṇā //
purāgatya tathoktaṃ yatkṛtakṛtyosmyahantataḥ

nandīśvara uvāca //
ityānandāmṛtarasairvidhāya sa hi pāraṇam //
tataśśubhehni saṃsthāpya liṃgaṃ sarvvahitapradam

jagrāha niyamānghorān duṣkarānakṛtātmabhiḥ //
aṣṭottaraśataiḥ kumbhaiḥ pūrṇairgaṃgāmbhasā śubhaiḥ

saṃsnāpya vāsasā pūtaḥ pūtātmā pratyahaṃ śivam //
nīlotpalamayīmmālāṃ samarpayati so'nvaham

aṣṭādhikasahasraistu sumanobhirvinirmitām //
sa pakṣe vātha vā māse kandamūlaphalāśanaḥ

śīrṇaparṇāśanairdhīraḥ ṣaṇmāsaṃ sambabhūva saḥ //
ṣaṇmāsaṃ vāyubhakṣo'bhūtṣaṇmāsaṃ jala bindubhuk

evaṃ varṣavayastasya vyatikrāntaṃ mahātmanaḥ //
śivaikamanaso viprāstapyamānasya nārada

janmato dvādaśe varṣe tadvaco nāraderitam //
satyaṃ kariṣyanniva tamabhyagātkuliśāyudhaḥ

uvāca ca varaṃ brūhi dadmi tvanmanasi sthitam //
ahaṃ śatakraturvipra prasannosmi śubhavrataiḥ // /

nandīśvara uvāca //
ityākarṇya mahendrasya vākyammunikumārakaḥ //
uvāca madhurandhīraḥ kīrtayanmadhurākṣaram

gṛhapatiruvāca //
maghavan vṛtraśatro tvāṃ jāne kuliśapāṇinam //
nāhaṃ vṛṇe varantvattaśśaṃkaro varado'sti me

indra uvāca //
na mattaśśaṅkarastvanyo devadevo'smyahaṃ śiśo //
vihāya bāliśatvaṃ tvaṃ varaṃ yācasva mā ciram

gṛhapatiruvāca //
gacchāhalyāpate'sādho gotrāre pākaśāsana //
na prārthaye paśupateranyaṃ devāntaraṃ sphuṭam

nandīśvara uvāca //
iti tasya vacaḥ śrutvā krodha saṃraktalocanaḥ //
udyamya kuliśaṃ ghorambhīṣayāmāsa bālakam

sa dṛṣṭvā bālako vajraṃ vidyujjvālā samākulam //
smarannārada vākyaṃ ca mumūrccha bhayavihvalaḥ

atha gaurīpatiśśambhurāvirāsīttaponudaḥ //
uttiṣṭhottiṣṭha bhadrante sparśaissaṃjīvayanniva

unmīlya netrakamale supte iva dinakṣaye //
apaśyadagre cotthāya śambhumarkaśatādhikam

bhāle locanamālokya kaṇṭhe kālaṃ vṛṣadhvajam//
vāmāṅgasanniviṣṭādritanayaṃ candraśekharam

kaparddena virājantaṃ triśūlājagavāyudham//
sphuratkarpūragaurāṃgaṃ pariṇaddha gajājinam

parijñāya mahādevaṃ guruvākyata āgamāt//
harṣabāṣpākulāsannakaṇṭharomāñcakañcukaḥ

kṣaṇaṃ ca girivattasthau citrakūṭatriputrakaḥ //
yathā tathā susampanno vismṛtyātmānameva ca

na stotuṃ na namaskartuṃ kiñcidvijñaptimeva ca //
yadā sa na śaśākālaṃ tadā smitvāha śaṅkaraḥ

īśvara uvāca //
śiśo gṛhapate śakrādvajrodyatakarādaho //
jñāta bhīto'si mā bhaiṣīrjijñāsā te mayā kṛtā

mama bhaktasya no śakro na vajraṃ cāntako'pi ca //
prabhavedindrarūpeṇa mayaiva tvamvibhīṣitaḥ

varandadāmi te bhadra tvamagnipadabhāgbhava //
sarveṣāmeva devānāṃ varadastvaṃ bhaviṣyasi

sarveṣāmeva bhūtānāṃ tvamagne'ntaścaro bhava//
dharmarājendrayormadhye digīśo rājyamāpnuhi

tvayedaṃ sthāpitaṃ liṃgaṃ tava nāmnā bhaviṣyati//
agnīśvara iti khyātaṃ sarvatejovibṛṃhaṇam

agnīśvarasya bhaktānāṃ na bhayaṃ vidyudagnibhiḥ //
agnimāṃdyabhayaṃ naiva nākālamaraṇaṃ kvacit

agnīśvaraṃ samabhyarcya kāśyāṃ sarvasamṛddhidam //
anyatrāpi mṛto daivādvahniloke mahīyate

nandīśvara uvāca //
ityuktānīya tadbandhūnpitrośca paripaśyatoḥ//
dikpatitve'bhiṣicyāgniṃ tatra liṃge śivo'viśat

itthamagnyavatāraste varṇito me janārdanaḥ //
nāmnā gṛhapatistāta śaṃkarasya parātmanaḥ

citrahotrapurī ramyā sukhadārciṣmatī varā //
jātavedasi ye bhaktā te tatra nivasanti vai

agnipraveśaṃ ye kuryyurdṛḍhasattvā jitendriyāḥ //
striyo vā sattvasampannāste sarvvepyagnitejasaḥ

agnihotraratā viprāḥ sthāpitā brahmacāriṇaḥ //
paścānivarttino'pyevamagnilokegnivarcasaḥ

śīte śītāpanuttyai yastvedhobhārānprayacchati //
kuryyādagnīṣṭikāṃ vātha sa vasedagnisannidhau

anāthasyāgnisaṃskāraṃ yaḥ kuryyācchraddhayānvitaḥ //
aśaktaḥ prerayedanyaṃ sogniloke mahīyate

agnireko dvijātīnāṃ niśśreyasakaraḥ paraḥ //
gururdevo vrataṃ tīrthaṃ sarvamagnirviniścitam

apāvanāni sarvāṇi vahnisaṃsargataḥ kṣaṇāt //
pāvanāni bhavantyeva tasmādyaḥ pāvakaḥ smṛtaḥ

antarātmā hyayaṃ sākṣānniścayo hyāśuśukṣaṇiḥ //
māṃsagrāsānpacetkukṣau strīṇāṃ no māṃsapeśikām

taijasī śāmbhavī mūrttiḥ pratyakṣā dahanātmikā //
kartrī hartrī pālayitrī vinaitāṃ kiṃ vilokyate

citrabhānurayaṃ sākṣānnetrantribhuvaneśituḥ //
andhe tamomaye loke vinainaṃ kaḥ prakāśanaḥ

dhūpapradīpanaivedyapayodadhighṛtaikṣavam //
etadbhuktaṃ niṣevante sarve divi divaukasaḥ

iti śrīśivamahāpurāṇe tṛtīyāyāṃ śatarudrasaṃhitāyāṃ gṛhapatyavatāravarṇanaṃ nāma pañcadaśo'dhyāyaḥ