Shiva Purana · Chapter 3.16

nandīśvara uvāca //
yakṣeśvarāvatāraṃ ca śṛṇu śaṃbhormunīśvara //
garviṇaṃ garvahantāraṃ satāmbhaktivivarddhanam

purā devāśca daityāśca pīyūṣārthammahābalāḥ //
kṣīrodadhiṃ mamanthuste sukṛta svārtha sandhayaḥ

mathyamāne'mṛte pūrvaṃ kṣīrābdhessuradānavaiḥ //
agneḥ samutthitaṃ tasmādviṣaṃ kālānalaprabham

taṃ dṛṣṭvā nikhilā devā daityāśca bhayavihvalāḥ //
vidrutya tarasā tāta śaṃbhoste śaraṇaṃ yayuḥ

dṛṣṭvā taṃ śaṃkaraṃ sarve sarvadevaśikhāmaṇim //
praṇamya tuṣṭuvurbhaktyā sācyutā natamastakāḥ

tataḥ prasanno bhagavācchaṅkaro bhaktavatsalaḥ //
papau viṣaṃ mahāghoraṃ surāsuragaṇārdanam

patiṃ taṃ viṣamaṃ kaṇṭhe nidadhe viṣamulbaṇam //
rejetenāti sa vibhurnīlakaṇṭho babhūva ha

tataḥ surā suragaṇā mamanthuḥ punareva tam //
viṣadāhavinirmuktāḥ śivānugrahato'khilāḥ

tāto bahūni ratnāni nissṛtāni tato mune //
amṛtaṃ ca padārthaṃ hi suradānavayormune

tatpapuḥ kevalandevā nāsurāḥ kṛpayā hareḥ //
tato babhūva sumahadratnaṃ teṣāṃ mitho'kadam

dvandvayuddhambabhūvātha devadānavayormune //
tatra rāhubhayāccandro vidudrāva tadarditaḥ

jagāma sadanaṃ śaṃbhoḥ śaraṇambhaya vihvalaḥ //
supraṇamya ca tuṣṭāva pāhipāhīti saṃvadan

tatassatāmabhayadaḥ śaṃkaro bhaktavatsalaḥ //
dadhre śirasi candraṃ sa vibhuśśaraṇamāgatam

athāgatastadā rāhustuṣṭāva supraṇamya tam //
śaṃkaraṃ sakalādhīśaṃ vāgbhiriṣṭābhirādarāt

śaṃbhustanmatamājñāya tacchirāṃsyacyutena ha //
purā chinnāni vai ketusaṃjñāni nidadhe gale

tato yuddhe'surāḥ sarve devaiścaiva parājitāḥ //
pītvā'mṛtaṃ surāssarvve jayamprāpurmahābalāḥ

viṣṇuprabhṛtayaḥ sarvve babhūvuścātigarvitāḥ //
balāni cāṃkuraṃtontaśśivamāyāvimohitāḥ

tatassa śaṃkaro devaḥ sarvādhīśotha garvahā //
yakṣo bhūtvā jagāmāśu yatra devāḥ sthitā mune

sarvāndṛṣṭvācyutamukhāndevānyakṣapatissa vai //
mahāgarvāḍhyamanasā maheśāḥ prāha garvahā

yakṣeśvara uvāca //
kimarthaṃ saṃsthitā yūyamatra sarve surā mithaḥ //
kimu kāṣṭhākhilambrūta kāraṇaṃ menupṛcchate

devā ūcuḥ //
abhūdatra mahāndeva raṇaḥ paramadāruṇaḥ //
asurā nāśitāssarve'vaśiṣṭā vidrutā gatāḥ

vayaṃ sarve mahāvīrā daityaghnā balavattarāḥ //
agresmākaṃ kiyantaste daitya kṣudrabalāssadā

nandīśvara uvāca //
iti śrutvā vacasteṣāṃ surāṇāṃ garvagarbhitam //
garvahāsau mahādevo yakṣarūpo vaco'bravīt

yakṣeśvara uvāca //
he surā nikhilā yūyaṃ madvacaśśṛṇutādarāt //
yathārthaṃ vacmi nāsatyaṃ sarvagarvāpahārakam

garvvamenaṃ na kuruta karttā harttā'paraḥ prabhuḥ //
vismṛtāśca maheśānaṃ kathayadhvamvṛthābalāḥ

yuṣmākañcetsa hi mado jānatāṃ svabalammahat //
matsthāpitaṃ tṛṇamidaṃ chinta svāstraiśca taissurāḥ

nandīśvara uvāca //
ityuktvaikatṛṇanteṣāṃ nicikṣepa purastataḥ //
jahre sarvamadaṃ yakṣarūpa īśassatāṃgatiḥ

atha sarve surā viṣṇupramukhā vīramāninaḥ //
kṛtvā svapauruṣantatra svāyudhāni vicikṣipuḥ

tatrāsan viphalānyāśu tānyastrāṇi divaukasām //
śivaprabhāvatasteṣāṃ mūḍhagarvāpahāriṇaḥ

athāsīttu nabhovāṇī devavismayahāriṇī //
yakṣo'yaṃ śaṃkaro devāḥ sarvagarvāpahārakaḥ

kartā harttā tathā bharttā'yameva parameśvaraḥ //
etadbalena valino jīvāḥ sarve'nyathā na hi

asya māyāprabhāvādvai mohitāḥ svaprabhuṃ śivam //
madato bubudhu naivādyāpi bodhatanumprabhum

nandīśvara uvāca //
iti śrutvā nabhovāṇīṃ bubudhuste gatasmayāḥ //
yakṣeśvarampraṇemuśca tuṣṭuvuśca tamīśvaram

devā ūcuḥ //
devadeva mahādeva sarvagarvāpahāraka//
yakṣeśvaramahālīla māyā tetyadbhutā prabho

mohitā māyayādyāpi tava yakṣasvarūpiṇaḥ //
sagarvamabhibhāṣantastvatpuro hi pṛthaṅmayāḥ

idānīṃ jñānamāyātantavaiva kṛpayā prabho//
kartā hartā ca bhartā ca tvamevānyo na śaṃkara

tvameva sarvaśaktīnāṃ sarveṣāṃ hi pravartakaḥ //
nivartakaśca sarveśaḥ paramātmāvyayo'dvayaḥ

yakṣeśvarasvarūpeṇa sarveṣāṃ no mado hṛtaḥ //
ito manyāmahe tattenugraho hi kṛpālunā

atho sa yakṣanātho'nugṛhya vai sakalān surān //
vibodhya vividhairvākyaistatraivāntaradhīyata

itthaṃ sa varṇitaḥ śambhoravatāraḥ sukhāvahaḥ //
yakṣeśvarākhyassukhadassatāntuṣṭo'bhayaṃkaraḥ

idamākhyānamamalaṃ sarvagarvāpahārakam //
satāṃ suśāntidannityaṃ bhuktimuktipradaṃ nṛṇām

ya idaṃ śṛṇuyādbhaktyā śrāvayedvā sudhīḥ pumān //
sarvakāmānavāpnoti tataśca labhate gatim

iti śrīśivamahāpurāṇe tṛtīyāyāṃ śatarudrasaṃhitāyāṃ yakṣeśvarāvatāravarṇanaṃ nāma ṣoḍaśodhyāyaḥ