Shiva Purana · Chapter 3.14

nandīśvara uvāca//
sa vipro gṛhamāgatya mahāharṣasamanvitaḥ//
priyāyai kathayāmāsa tadvṛttāntamaśeṣataḥ

tacchrutvā viprapatnī sā mudamprāpa śuciṣmatī//
atīva premasaṃyuktā praśaśaṃsa vidhinnijam २//
atha kālena tadyoṣidantarvatnī babhūva ha //
vidhivadvihite tena garbhādhānākhyakarmaṇi

tataḥ puṃsavanantena syandanātprāgvipaścitā //
gṛhyoktavidhinā samyakkṛtampuṃstvavivṛddhaye

sīmanto'thāṣṭame māse garbharūpasamṛddhikṛt //
sukhaprasavasiddhau ca tenākāri kṛpāvidā

athātaśśubhatārāsu tārādhipavarānanaḥ //
kendre gurau śubhe lagne sugraheṣu yugeṣu ca

ariṣṭadīpanirvāṇassarvāriṣṭavināśakṛt//
tanayo nāma tasyāntu śuciṣmatyāmbabhūva ha

śarvassamastasukhado bhūrbhuvaḥ svarnnivāsinām //
gandhavāhanavāhāśca digvadhūrmukhavāsasaḥ

iṣṭagandhaprasūnaughairvavṛṣuste ghanāghanāḥ //
devadundubhayo neduḥ prasedussarvvato diśaḥ

paritassaritassvacchā bhūtānāṃ mānasaissaha //
tamo'tāmyattu nitarāṃ rajo'pi virajo'bhavat

sattvāssattvasamāyuktāḥ sudhāvṛṣṭirbabhūva vai //
kalyāṇī sarvathā vāṇī prāṇinaḥ priyavatyabhūt

raṃbhāmukhyā apsaraso maṅgaladravyapāṇayaḥ //
vidyādharyaśca kinnaryyastathā maryyassahasraśaḥ

gandharvoragayakṣāṇāṃ sumāniyaḥ śubhasvarāḥ //
gāyantyo maṃgalaṃ gītantatrājagmuranekaśaḥ

mārīciratriḥ pulahaḥ pulastyaḥ kraturaṅgirāḥ//
vasiṣṭhaḥ kaśyapo'gastyo vibhāṇḍo māṇḍavīsutaḥ

lomaśo romacaraṇo bharadvājo'tha gautamaḥ //
bhṛgustu gālavo gargo jātūkarṇyaḥ parāśaraḥ

āpastambo yājñavalkyo dakṣavālmīkimudgalāḥ //
śātātapaśca likhitaśśilādaḥ śaṃkha uñchabhuk

jamadagniśca saṃvarto mataṃgo bharatoṃśumān //
vyāsaḥ kātyāyanaḥ kutsaḥ śaunakastu śrutaśśukaḥ

ṛṣyaśṛṅgo'tha durvvāsāśśucirnārada tumburuḥ //
uttaṃko vāmadevaśca pavano'sitadevalau

sālaṃkāyanahārītau viśvāmitro'tha bhārgavaḥ //
mṛkaṇḍassaha putreṇa parvvato dārukastathā

dhaumyopamanyuvatsādyā munayo munikanyakāḥ//
tacchāntyarthaṃ samājagmurdhanyaṃ viśvānarāśramam

brahmā bṛhaspatiyuto devo garuḍavāhanaḥ //
nandibhṛṅgi samāyukto gauryyā saha vṛṣadhvajaḥ

mahendramukhyā gīrvāṇā nāgāḥ pātālavāsinaḥ //
ratnānyādāya bahuśassasaritkā mahābdhayaḥ

sthāvarā jaṃgamaṃ rūpaṃ dhṛtvā yātāssahasraśaḥ //
mahāmahotsave tasminbabhūvākālakaumudī

jātakarma svayaṃ tasya kṛtavānvidhirānataḥ //
śrutiṃ vicāryya tadrūpannāmnā gṛhapatistvayam

iti nāma dadau tasmai deyamekādaśe'hani //
nāmakarmavidhānena tadarthaśrutimuccaran

caturnigamamantroktairāśīrbhirabhinandya ca //
samayāddhaṃsamāruhya sarveṣāñca pitāmahaḥ

kṛtvā bālocitāṃ rakṣāṃ laukikīṃ gatimāśritaḥ //
āruhya yānaṃ svandhāma haro'pi hariṇā yayau

aho rūpamaho tejastvaho sarvāṃgalakṣaṇam //
aho śuciṣmatī bhāgyamāvirāsītsvayaṃ haraḥ

athavā kimidaṃ citraṃ śarvabhaktajaneṣvaho//
svayamāvirabhūdrudro yayo rudrastadarcitaḥ

iti stuvantastenyonyaṃ samprahṛṣṭatanūruhaḥ //
viśvānaraṃ samāpṛcchya jagmuḥ sarve yathāgatam

ataḥ putraṃ samīhante gṛhasthāśramavāsinaḥ//
putreṇa lokāñjayati śrutireṣā sanātanī

aputrasya gṛhaṃ śūnyamaputrasyārjanaṃ vṛthā//
aputrasya tapaśchinnaṃ no pavitratyaputrataḥ

na putrātparamo lābho na putrātparamaṃ sukham //
na putrātparamaṃ mitramparatreha ca kutracit

niṣkramo'tha caturthe'sya māsi pitrā kṛto gṛhāt //
annaprāśanamabdārddhe cūḍārddhe cārthavatkṛtā

karṇavedhantataḥ kṛtvā śravaṇarkṣe sa karmavit//
brahmatejobhivṛddhyarthaṃ pañcame'bde vratandadau

upākarmaṃ tataḥ kṛtvā vedānadhyāpayatsudhīḥ //
abdaṃ vedānsa vidhinā'dhyaiṣṭa sāṃgapadakramān

vidyājātaṃ samastaṃ ca sākṣimātraṃ guromukhāt //
vinayādiguṇānāviṣkurvañjagrāha śaktimān

tato'tha navame varṣe pitrośśuśrūṣaṇe ratam //
vaiśvānaraṃ gṛhapatiṃ draṣṭumāyācca nāradaḥ

viśvānaroṭajamprāpya devarṣistaṃ tu kautukī //
apṛcchatkuśalantatra gṛhītārdhāsanaḥ kramāt

tataḥ sarvaṃ ca tadbhāgyaṃ putradharmaṃ ca sammukhe //
vaiśvānaraṃ samavadatsmṛtvā śivapadāmbujam

nandīśvara uvāca //
ityukto muninā bālaḥ pitrorājñāmavāpya saḥ //
praṇamya nāradaṃ śrīmān bhaktyā prahva upāviśata

vaiśvānara samabhyehi mamotsaṃge niṣīda bhoḥ //
lakṣaṇāni parīkṣe'haṃ pāṇindarśaya dakṣiṇam

tato dṛṣṭvā tu sarvaṃ hi tālujihvādi nāradaḥ //
viśvānaraṃ samavadacchivapreraṇayā sudhīḥ

nārada uvāca //
viśvānara mune vacmi śṛṇu putrāṃkamādarāt//
sarvāṃgasvaṃkavānputro mahālakṣaṇavānayam

kintu sarvaguṇopetaṃ sarvalakṣaṇalakṣitam //
sampūrṇanirmalakalaṃ pālayedvidhuvadvidhiḥ

tasmātsarvaprayatnena rakṣaṇīyastvasau śiśu //
guṇo'pi doṣatāṃ yāti vakrībhūte vidhātari

śaṃke'sya dvādaśe māsi pratyūho vidyudagnitaḥ //
ityuktvā nārado'gacchaddevalokaṃ yathāgatam

iti śrīśivamahāpurāṇe tṛtīyāyāṃ śatarudrasaṃhitāyāṃ gṛhapatyavatāropākhyāne gṛhapatyavatāravarṇanaṃnāma caturdaśo'dhyāyaḥ