Shiva Purana · Chapter 2.5.54

vyāsa uvāca //
aniruddhe hṛtai pautre kṛṣṇasya munisattama //
kuṃbhāṃḍasutayā kṛṣṇaḥ kimakārṣīddhi tadvada

sanatkumāra uvāca //
tato gate'niruddhe tu tatstrīṇāṃ rodanasvanam //
śrutvā ca vyathitaḥ kṛṣṇo babhūva munisattama

apaśyatāṃ cāniruddhaṃ tadbaṃdhūnāṃ harestathā //
catvāro vārṣikā māsā vyatīyuranuśocatām

nāradāttadupākarṇya vārtāṃ baddhasya karma ca //
āsansuvyathitāssarve vṛṣṇayaḥ kṛṣṇadevatāḥ

!
kṛṣṇastadvṛttamakhilaṃ śrutvā yuddhāya cādarāt //
jagāma śoṇitapuraṃ tārkṣyamāhūya tatkṣaṇāt

pradyumno yuyudhānaśca gatassāṃbotha sāraṇaḥ //
naṃdopanaṃdabhadrādyā rāmakṛṣṇānuvartinaḥ

akṣauhiṇībhirdvādaśabhissametāsarvato diśam //
rurudhurbāṇanagaraṃ samaṃtātsātvatarṣabhāḥ

bhajyamānapurodyānaprākārāṭṭālagopuram //
vīkṣyamāṇo ruṣāviṣṭastulyasainyobhiniryayau

bāṇārthe bhagavān rudrassasutaḥ pramathairvṛtaḥ //
āruhya nandivṛṣabhaṃ yuddhaṃ karttuṃ samāyayau

āsītsutumulaṃ yuddhamadbhutaṃ lomaharṣaṇam //
kṛṣṇādikānāṃ taistatra rudrādyairbāṇarakṣakaiḥ

kṛṣṇaśaṃkarayorāsītpradyumnaguhayorapi//
kūṣmāṃḍakūpakarṇābhyāṃ balena saha saṃyugaḥ

sāṃbasya bāṇaputreṇa bāṇena saha sātyakeḥ //
nandinā garuḍasyāpi pareṣāṃ ca parairapi

brahmādayassurādhīśā munayaḥ siddhacāraṇāḥ //
gaṃdharvā'psaraso yānairvimānairdraṣṭumāgaman

pramathairvividhākārai revatyaṃtaiḥ sudāruṇam //
yuddhaṃ babhūva viprendra teṣāṃ ca yaduvaṃśinām

bhrātrā rāmeṇa sahitaḥ pradyumnena ca dhīmatā//
kṛṣṇaścakāra samaramatulaṃ pramathaissaha

tatrāgninā'bhavadyuddhaṃ yamena varuṇena ca //
vimukhena tripādena jvareṇa ca guhena ca

pramathairvividhākāraisteṣāmanyaṃ tadāruṇam //
yuddhaṃ babhūva vikaṭaṃ vṛṣṇīnāṃ romaharṣaṇam

vibhīṣikābhirbahvībhiḥ koṭarībhiḥ padepade //
nirllajjābhiśca nārībhiḥ prabalābhiradūrataḥ

śaṃkarānucarāñśaurirbhūtapramathaguhyakān //
drāvayāmāsa tīkṣṇāgraiḥ śaraiḥ śārṅgadhanuścyutaiḥ

evaṃ pradyumnapramukhā vīrā yuddhamahotsavāḥ //
cakruryuddhaṃ mahāghoraṃ śatrusainyaṃ vināśayan

viśīryamāṇaṃ svabalaṃ dṛṣṭvā rudrotyamarṣaṇaḥ//
krodhaṃ cakāra sumahannanāda ca maholbaṇam

tacchrutvā śaṃkaragaṇā vineduryuyudhuśca te //
mardayanpratiyoddhāraṃ varddhitāśśaṃbhutejasā

pṛthagvidhāni cāyuktaṃ śārṅgāstrāṇi pinākine //
pratyakṣaiśśamayāmāsa śūlapāṇiravismitaḥ

brahmāstrasya ca brahmāstraṃ vāyavyasya ca pārvatam //
āgneyasya ca pārjanyaṃ naijaṃ nārāyaṇasya ca

kṛṣṇasainyaṃ vidudrāva prativīreṇa nirjitam //
na tasthau samare vyāsa pūrṇarudrasutejasā

vidrāvite svasainye tu śrīkṛṣṇaśca paraṃtapaḥ //
svaṃ jvaraṃ śītalākhyaṃ hi vyasṛjaddāruṇaṃ mune

vidrāvite kṛṣṇasainye kṛṣṇasya śītalajvaraḥ //
abhyapadyata taṃ rudraṃ mune daśadiśo dahan

maheśvarotha' taṃ dṛṣṭvāyāṃtaṃ svaṃ visṛjajjvaram//
māheśvaro vaiṣṇavaśca yuyudhāte jvarāvubhau

vaiṣṇavo'tha samākradanmāheśvarabalārditaḥ //
alabdhvā bhayamanyatra tuṣṭāva vṛṣabhadhvajam

atha prasanno bhagavānviṣṇujvaranuto haraḥ //
viṣṇuśītajvaraṃ prāha śaraṇāgatavatsalaḥ

maheśvara uvāca //
śītajvara prasanno'haṃ vyetu te majjvarādbhayam //
yo nau smarati saṃvādaṃ tasya na syājjvarādbhayam

sanatkumāra uvāca //
ityukto rudramānamya gato nārāyaṇajvaraḥ //
taṃ dṛṣṭvā caritaṃ kṛṣṇo visismāya bhayānvitaḥ

skanda pradyumnabāṇaughairardyamāno'tha kopitaḥ //
jaghāna śaktyā pradyumnaṃ daityasaṃghātyamarṣaṇaḥ

skaṃdaprāptihatastatra pradyumnaḥ prabalopi hi//
asṛgvimuṃcangātrebhyo balenāpākramadraṇāt

kuṃbhāṃḍakūpakarṇābhyāṃ nānāstraiśca samāhataḥ //
dudrāva balabhadropi na tasthepi raṇe balī

kṛtvā sahasraṃ kāyānāṃ pītvā toyaṃ mahārṇavāt //
garuḍo nāśayatyarthā''vartairmeghārṇavāṃbubhiḥ

atha kruddho maheśasya vāhano vṛṣabho balī //
vegena mahatāraṃ vai śṛṃgābhyāṃ nijaghāna tam

śṛṃgaghātaviśīrṇāṃgo garuḍo'tīva vismitaḥ //
vidudrāva raṇāttūrṇaṃ vihāya ca janārdanam

evaṃ jāte caritraṃ tu bhagavāndevakīsutaḥ //
uvāca sārathiṃ śīghraṃ rudratejotivismitaḥ

śrīkṛṣṇa uvāca //
he sūta śṛṇu madvākyaṃ rathaṃ me vāhaya drutam //
mahādevasamīpastho yathā syāṃ gadituṃ vacaḥ

sanatkumāra uvāca //
ityukto hariṇā sūto dārukassvaguṇāgraṇīḥ //
drutaṃ taṃ vāhayāmāsa rathaṃ rudrasamīpataḥ

atha vijñāpayāmāsa nato bhūtvā kṛtāṃjaliḥ //
śrīkṛṣṇaḥ śaṃkaraṃ bhaktyā prapanno bhaktavatsalam

śrīkṛṣṇa uvāca //
devadeva mahādeva śaraṇāgatavatsala //
namāmi tvā'naṃtaśaktiṃ sarvātmānaṃ pareśvaram

viśvotpattisthānanāśahetuṃ sajjñapti mātrakam //
brahmaliṃgaṃ paraṃ śāṃtaṃ kevalaṃ parameśvaram

kālo daivaṃ karma jīvassvabhāvo dravyameva ca //
kṣetraṃ ca prāṇa ātmā ca vikārastatsamūhakaḥ

bījarohapravāhastu tvanmāyaiṣā jagatprabho //
tannibaṃdhaṃ prapadyeha tvāmahaṃ parameśvaram

nānā bhāvairlīlayaiva svīkṛtairnirjarādikān //
nūnaṃ bibhaṣiṃ lokeśo haṃsyunmārgānsvabhāvataḥ

tvaṃ hi brahma paraṃ jyotirgūḍhaṃ brahmaṇi vāṅmaye //
yaṃ paśyaṃtyamalātmānamākāśamiva kevalam

tvameva cādyaḥ puruṣo'dvitīyasturya ātmadṛk //
īśo heturahetuśca savikāraḥ pratīyase

svamāyayā sarvaguṇaprasiddhyai bhagavanprabho //
sarvānvitaḥ prabhinnaśca sarvatastvaṃ maheśvara

yathaiva sūryo'pihitaśchāyārūpāṇi ca prabho //
svacchāyayā saṃcakāsti hyayaṃ paramadṛgbhavān

guṇenāpihitopi tvaṃ guṇe va guṇān vibho //
svapradīpaścakāssi tvaṃ bhūman giriśa śaṃkara

tvanmāyāmohitadhiyaḥ putradāragṛhādiṣu //
unmajjaṃti nimajjaṃti prasaktā vṛjinārṇave

daivadattamimaṃ labdhvā nṛlokamajitendriyaḥ //
yo nādriyeta tvatpādau sa śocyo hyātmavaṃcakaḥ

tvadājñayāhaṃ bhagavānbāṇadośchettumāgataḥ //
tvayaiva śapto bāṇo'yaṃ garvito garvahāriṇā / ५५ //
nivarttasva raṇā ddeva tvacchāpo na vṛthā bhavet //
ājñāṃ dehi prabho me tvaṃ bāṇasya bhujakṛṃtane

sanatkumāra uvāca //
ityākarṇya vacaśśaṃbhuḥ śrīkṛṣṇasya munīśvara //
pratyuvāca prasannātmā kṛṣṇastutyā maheśvaraḥ

maheśvara uvāca //
satyamuktaṃ tvayā tāta mayā śapto hi daityarāṭ //
madājñayā bhavānprāpto bāṇadodaṃḍakṛṃtane

kiṃ karomi ramānātha bhaktādhīnassadā hare //
paśyato me kathaṃ vīra syādbāṇabhujakṛṃtanam

atastvaṃ jṛṃbhaṇāstreṇa māṃ jaṃbhaya madājñayā //
tatastvaṃ kuru kāryaṃ svaṃ yatheṣṭaṃ ca sukhī bhava

sanatkumāra uvāca //
ityuktaśśaṃkareṇātha śārṅgapāṇistu vismitaḥ //
svaraṇasthānamāgatya mumoda sa munīśvaraḥ

jṛṃbhaṇāstraṃ mumocātha saṃdhāya dhanuṣi drutam //
pinākapāṇaye vyāsa nānāstrakuśalo hariḥ

mohayitvā tu giriśaṃ jṛṃbhaṇāstreṇa jṛṃbhitam //
bāṇasya pṛtanāṃ śaurirjaghānāsigadarṣṭibhiḥ

iti śivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe bāṇā'surarudrakṛṣṇādiyuddhavarṇanaṃ nāma catuḥpaṃcāśattamo'dhyāyaḥ