Shiva Purana · Chapter 2.5.55

vyāsa uvāca //
sanatkumāra sarvajña brahmaputra namostu te //
adbhuteyaṃ kathā tāta śrāvitā me tvayā mune

jṛṃbhite jṛṃbhaṇāstreṇa hariṇā samare hare //
hate bāṇabale bāṇaḥ kimakārṣīcca tadvada

sūta uvāca //
ityākarṇya vacastasya vyāsasyāmitatejasaḥ //
pratyuvāca prasannātmā brahmaputro munīśvaraḥ /

sanatkumāra uvāca//
śṛṇu vyāsa mahāprājña kathāṃ ca paramādbhutām //
kṛṣṇaśaṃkarayostāta lokalīlānusāriṇoḥ

śayite līlayā rudre saputre sagaṇe sati //
bāṇo vinirgato yuddhaṃ kartuṃ kṛṣṇena daityarāṭ

kuṃbhāṃḍasaṃgṛhītāśvo nānāśastrāstradhṛk tataḥ //
cakāra yuddhamatulaṃ baliputro mahābalaḥ

dṛṣṭvā nijabalaṃ naṣṭaṃ sa daityendro'tyamarṣitaḥ //
cakāra yuddhamatulaṃ bali putro mahābalaḥ

śrīkṛṣṇopi mahāvīro giriśāptamahābalaḥ //
uccairjagarja tatrājau bāṇaṃ matvā tṛṇopamam

dhanuṣṭaṃkārayāmāsa śārṅgākhyaṃ nijamadbhutam //
trāsayanbāṇasainyaṃ tadavaśiṣṭaṃ munīśvara

tena nādena mahatā dhanuṣṭaṃkārajena hi //
dyāvābhūmyoraṃtaraṃ vai vyāptamāsīdanaṃtaram

cikṣepa vividhānbāṇānbāṇāya kupito hariḥ //
karṇāntaṃ tadvikṛṣyātha tīkṣṇānāśīviṣopamān

āyātāṃstānnirīkṣyā'tha sa bāṇo balinandanaḥ //
aprāptāneva ciccheda svaśaraissvadhanuścyutaiḥ

punarjagarja sa vibhurbāṇo vairigaṇārdanaḥ //
tatrasurvṛṣṇayassarve kṛṣṇātmāno vicetasaḥ

smṛtvā śivapadāmbhojaṃ cikṣepa nijasāyakān//
sa kṛṣṇāyātiśūrāya mahāgarvo balessutaḥ

kṛṣṇopi tānasaṃprāptānacchinatsaśarairdrutam //
smṛtvā śivapadāmbhojamamarāri mahābalaḥ

rāmādayo vṛṣṇayaśca svaṃsvaṃ yoddhāramāhave //
nijaghnurbalinassarve kṛtvā krodhaṃ samākulāḥ

itthaṃ cirataraṃ tatra balinośca dvayorapi //
babhūva tumulaṃ yuddhaṃ śṛṇvatāṃ vismayāvaham

tasminnavasare tatra krodhaṃ kṛtvā'tipakṣirāṭ //
bāṇāsurabalaṃ sarvaṃ pakṣāghātairamardayat

marditaṃ svabalaṃ dṛṣṭvā mardayaṃtaṃ ca taṃ balī //
cukopāti baleḥ putraḥ śaivarāḍ ditijeśvaraḥ

smṛtvā śivapadāmbhojaṃ sahasrabhujavāndrutam //
mahatparākramaṃ cakre vairiṇāṃ dussahaṃ sa vai

cikṣepa yugapadbāṇānamitāṃstatra vīrahā //
kṛṣṇādisarvayaduṣu garuḍe ca pṛthakpṛthak

jaghānaikena garuḍaṃ kṛṣṇamekena pattriṇā //
balamekena ca mune parānapi tathā balī

tataḥ kṛṣṇo mahāvīryo viṣṇurūpassurārihā //
cukopātiraṇe tasmiñjagarja ca maheśvaraḥ

jaghāna bāṇaṃ tarasā śārṅganissṛtasaccharaiḥ //
ati tadbalamatyugraṃ yugapatsmṛtaśaṃkaraḥ

ciccheda taddhanuśśīghraṃ chatrādikamanā kulaḥ //
hayāṃśca pātayāmāsa hatvā tānsvaśarairhariḥ

bāṇo'pi ca mahāvīro jagarjāti prakupya ha //
kṛṣṇaṃ jaghāna gadayā so'pataddharaṇītale

utthāyāraṃ tataḥ kṛṣṇo yuyudhe tena śatruṇā //
śivabhaktena devarṣe lokalīlā'nusārataḥ

evaṃ dvayościraṃ kāla babhūva sumahānraṇaḥ //
śivarūpo hariḥ kṛṣṇaḥ sa ca śaivottamo balī

kṛṣṇo'tha kṛtvā samaraṃ ciraṃ bāṇena vīryavān//
śivā''jñayā prāptabalaścukopāti munīśvaraḥ

tatassudarśanenāśu kṛṣṇo bāṇabhujānbahūn //
ciccheda bhagavāñśaṃbhu śāsanātparavīrahā

avaśiṣṭā bhujāstasya catvāro'tīva sundarāḥ //
gatavyatho babhūvāśu śaṃkarasya prasādataḥ

gatasmṛtiryadā bāṇa śiraśchettuṃ samudyataḥ //
kṛṣṇo vīratvamāpannastadā rudrassamutthitaḥ

rudra uvāca //
bhagavandevakīputra yadājñaptaṃ mayā purā //
tatkṛtaṃ ca tvayā vipra madājñākāriṇā sadā

mā bāṇasya śiraśchiṃdhi saṃharasva sudarśanam //
madājñayā cakramidaṃ syānmoghaṃ majjane sadā

dattaṃ mayā purā tubhyamanivāryaṃ raṇe tava //
cakraṃ jayaṃ ca govinda nivartasva raṇāttataḥ

dadhīce rāvaṇe vīre tārakādipureṣvapi //
vinā madājñāṃ lakṣmīśa rathāṅgaṃ nāmucaḥ purā

tvaṃ tu yogīśvarasssākṣātparamātmā janārdana //
vicāryatāṃ svamanasā sarvabhūtahite rataḥ

varamasya mayā dattaṃ na mṛtyurbhayamasti vai //
tanme vacassadā satyaṃ parituṣṭosmyahaṃ tava

purā'yaṃ garvito matto yuddhaṃ dehīti me'bravīt //
bhujānkaṇḍūyamānastu vismṛtātmagatirhare

tadāhamaśapaṃ taṃ vai bhujacchettā''gamiṣyati //
acireṇātikālena gatagarvo bhaviṣyasi

madājñayā hariḥ prāpto bhujacchettā tavā'tha vai //
nivartasva raṇādgaccha svagṛhaṃ savadhūvaraḥ

ityuktaḥ sa tayomaitrīṃ kārayitvā maheśvaraḥ //
tamamujñāpya sagaṇaḥ saputraḥ svālayaṃ yayau

// sanatkumāra uvāca //
ityākarṇya vacaśśaṃbhossaṃhṛtya ca sudarśanam //
akṣatāṃgastu vijayī tatkṛṣṇoṃtaḥpuraṃ yayau

aniruddhaṃ samāśvāsya sahitaṃ bhāryayā punaḥ //
jagrāha ratnasaṃghātaṃ bāṇadattamanekaśaḥ

tatsakhīṃ citralekhāṃ ca gṛhītvā parayoginīm //
prasanno'bhūttataḥ kṛṣṇaḥ kṛtakāryaḥ śivājñayā

hṛdā praṇamya giriśamāmaṃtrya ca balestutam //
parivārasametastu jagāma svapurīṃ hariḥ

pathi jitvā ca varuṇaṃ viruddhaṃ tamanekadhā //
dvārakāṃ ca purīṃ prāptassamutsavasamanvitaḥ

visarjayitvā garuḍaṃ sakhīnvīkṣyopahasya ca //
dvārakāyāṃ tato dṛṣṭvā kāmacārī cacāra ha

//
iti śrīśivamahāpurāṇe dvitīyāyāṃ rudrasaṃhitāyāṃ paṃcame yuddhakhaṃḍe bāṇabhujakṛṃtanagarvāpahāravarṇanaṃ nāma pañcapañcāśattamodhyāyaḥ