Shiva Purana · Chapter 2.5.39

vyāsa uvāca //
śrutvā kālyuktamīśāno kiṃ cakāra kimuktavān //
tattvaṃ vada mahāprājña paraṃ kautūhalaṃ mama

sanatkumāra uvāca//
kālyuktaṃ vacanaṃ śrutvā śaṃkaraḥ parameśvaraḥ //
mahālīlākaraśśaṃbhurjahāsāśvāsayañca tām

vyomavāṇīṃ samākarṇya tattvajñānaviśāradaḥ//
yayau svayaṃ ca samare svagaṇaissaha śaṃkaraḥ

mahāvṛṣabhamārūḍho vīrabhadrādisaṃyutaḥ //
bhairavaiḥ kṣetrapālaiśca svasamānaissamanvitaḥ

raṇaṃ prāpto maheśaśca vīrarūpaṃ vidhāya ca //
virarājādhikaṃ tatra rudro mūrta ivāṃtakaḥ

śaṃkhacūḍaśśivaṃ dṛṣṭvā vimānādavaruhya saḥ //
nanāma parayā bhaktyā śirasā daṃḍavadbhuvi

taṃ praṇamya tu yogena vimānamāruroha saḥ //
tūrṇaṃ cakāra sannāhaṃ dhanurjagrāha seṣukam

śivadānavayoryuddhaṃ śatamabdaṃ babhūva ha //
bāṇavarṣamivograṃ tadvarṣatormoghayostadā

śaṃkhacūḍo mahāvīraśśarāṃścikṣepa dāruṇān//
ciccheda śaṃkarastānvai līlayā svaśarotkaraiḥ

tadaṃgeṣu ca śastroghaistāḍayāmāsa kopataḥ//
mahārudro virūpākṣo duṣṭadaṇḍassatāṃ gati

dānavo niśitaṃ khaḍgaṃ carma cādāya vegavān//
vṛṣaṃ jaghāna śirasi śivasya varavāhanam

tāḍite vāhane rudrastaṃ kṣurapreṇa līlayā //
khaḍgaṃ ciccheda tasyāśu carma cāpi mahojjvalam

chinne'sau carmaṇi tadā śaktiṃ cikṣepa so'suraḥ//
dvidhā cakre svabāṇena harastāṃ saṃmukhāgatām

kopādhmātaśśaṃkhacūḍaścakraṃ cikṣepa dānavaḥ //
muṣṭipātena taccāpyacūrṇayatsahasā haraḥ

gadāmāvidhya tarasā saṃcikṣepa haraṃ prati //
śaṃbhunā sāpi sahasā bhinnā bhasmatvamāgatā

tataḥ paraśumādāya hastena dānaveśvaraḥ //
dhāvati sma haraṃ vegācchaṃkhacūḍaḥ krudhākulaḥ

samāhṛtya svabāṇaughairapātayata śaṃkaraḥ //
drutaṃ paraśuhastaṃ taṃ bhūtale līlayāsuram

tataḥ kṣaṇena saṃprāpya saṃjñāmāruhya sadratham //
dhṛtadivyāyudhaśaro babhau vyāpyākhilaṃ nabhaḥ

āyāṃtaṃ taṃ nirīkṣyaiva ḍamarudhvani mādarāt //
cakāra jyāravaṃ cāpi dhanuṣo dussahaṃ hara

pūrayāmāsa kakubhaḥ śṛṃganādena ca prabhuḥ //
svayaṃ jagarja giriśastrāsayannasurāṃstadā

tyājitebha mahāgarvairmahānādairvṛṣeśvaraḥ //
pūrayāmāsa sahasā khaṃ gāṃ vasudiśastathā

mahākālassamutpatyā tāḍayadgāṃ tathā nabhaḥ //
karābhyāṃ tanninādena kṣiptā āsanpurāravāḥ

aṭṭāṭṭahāsamaśivaṃ kṣetrapālaścakāra ha //
bhairavo'pi mahānādaṃ sa cakāra mahāhave

mahākolāhalo jāto raṇamadhye bhayaṃkaraḥ//
vīraśabdo babhūvātha gaṇamadhye samaṃtataḥ

saṃtresurdānavāssarve taiśśabdairbhayadaiḥ kharaiḥ//
cukopātīva tacchrutvā dānavendro mahābalaḥ

tiṣṭhatiṣṭheti duṣṭātmanvyājahāra yadā haraḥ //
devairgaṇaiśca taiḥ śīghramuktaṃ jaya jayeti ca

athāgatya sa daṃbhasya tanayassupratāpavān //
śaktiṃ cikṣepa rudrāya jvālāmālātibhīṣaṇām

vahnikūṭaprabhā yāṃtī kṣetrapālena satvaram //
nirastāgatya sājau vai mukhotpannamaholkayā

punaḥ pravavṛte yuddhaṃ śivadānavayormahat //
cakaṃpe dharaṇī dyauśca sanagābdhijalāśayā

dāṃbhimuktāccharāñśaṃbhuśśarāṃstatprahitānsa ca//
sahasraśaśśarairugraiściccheda śataśastadā

tataśśaṃbhustriśūlena saṃkuddhastaṃ jaghāna ha //
tatprahāramasahyāśu kau papāta sa mūrcchitaḥ

tataḥ kṣaṇena saṃprāpa saṃjñāṃ sa ca tadāsuraḥ //
ājaghāna śarai rudraṃ tānsarvānāttakārmukaḥ

bāhūnāgayutaṃ kṛtvā chādayāmāsa śaṃkaram //
cakrāyutena sahasā śaṃkhacūḍaḥ pratāpavān

tato durgāpatiḥ kruddho rudro durgārtināśanaḥ //
tāni cakrāṇi ciccheda svaśarairuttamai drutam

tato vegena sahasā gadāmādāya dānavaḥ //
abhyadhāvata vai haṃtuṃ bahusenāvṛto haram

gadāṃ ciccheda tasyāśvāpatataḥ so'sinā haraḥ //
śitadhāreṇa saṃkruddho duṣṭagarvāpahārakaḥ

chinnāyāṃ svagadāyāṃ ca cukopātīva dānavaḥ //
śūlaṃ jagrāha tejasvī pareṣāṃ dussahaṃ jvalat

sudarśanaṃ śūlahastamāyāṃte dānaveśvaram //
svatriśūlena vivyādha hṛdi taṃ vegato haraḥ

triśūlabhinnahṛdayānniṣkrāṃtaḥ puruṣaḥ paraḥ //
tiṣṭhatiṣṭheti covāca śaṃkhacūḍasya vīryavān

niṣkrāmato hi tasyāśu prahasya svanavattataḥ //
ciccheda ca śiro bhīma masināso'patadbhuvi

tataḥ kālīṃ cakhādograṃ daṃṣṭrākṣuṇṇaśirodharān //
asurāṃstān bahūn krodhāt prasārya svamukhaṃ tadā

kṣetrapālaścakhādānyānbahūndaityānkrudhākulaḥ //
kecinneśurbhairavāstracchinnā bhinnāstathāpare

vīrabhadro'parāndhīmānbahūn krodhādanāśayat //
nandīśvaro jaghānānyānbahūnamaramardakān

evaṃ bahugaṇā vīrāstadā saṃnahya kopataḥ //
vyanāśayanbahūndaityānasurān deva mardakān

itthaṃ bahutaraṃ tatra tasya sainyaṃ nanāśa tat //
vidrutāścāpare vīrā bahavo bhayakātarāḥ //
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe śaṃkhacūḍasainyavadhavarṇanaṃ nāma navatriṃśo'dhyāyaḥ