Shiva Purana · Chapter 2.5.40

sanatkumāra uvāca //
svabalaṃ nihataṃ dṛṣṭvā mukhyaṃ bahutaraṃ tataḥ //
tathā vīrān prāṇasamān cukopātīva dānavaḥ

uvāca vacanaṃ śaṃbhuṃ tiṣṭhāmyājau sthiro bhava//
kimetairnihatairmedya saṃmukhe samaraṃ kuru

ityuktvā dānavendrosau sannaddhassamare mune //
agacchanniścayaṃ kṛtvā'bhimukhaṃ śaṃkarasya ca

divyānyastrāṇi cikṣepa mahārudrāya dānavaḥ //
cakāra śaravṛṣṭiñca toyavṛṣṭiṃ yathā ghanaḥ

māyāścakāra vividhā adṛśyā bhayadarśitāḥ //
apratarkyāḥ suragaṇairnikhilairapiḥ sattamaiḥ

tā dṛṣṭvā śaṃkarastatra cikṣe pāstraṃ ca līlayā //
māheśvaraṃ mahādivyaṃ sarvamāyāvināśanam

tejasā tasya tanmāyā naṣṭāścāsan drutaṃ tadā //
divyānyastrāṇi tānyeva nistejāṃsyabhavannapi

atha yuddhe maheśānastadvadhāya mahābalaḥ //
śūlaṃ jagrāha sahasā durnivāryaṃ sutejasām

tadaiva tanniṣeddhuṃ ca vāgbabhūvāśarīriṇī //
kṣipa śūlaṃ na cedānīṃ prārthanāṃ śṛṇu śaṃkara

sarvathā tvaṃ samartho hi kṣaṇād brahmāṇḍanāśane //
kimekadānavasyeśa śaṅkhacūḍasya sāṃpratam

tathāpi vedamaryādā na nāśyā svāminā tvayā //
tāṃ śṛṇuṣva mahādeva saphalaṃ kuru satyataḥ

yāvadasya kare'tyugraṃ kavacaṃ paramaṃ hareḥ //
yāvatsatītvamastyeva satyā asya hi yoṣitaḥ

tāvadasya jarāmṛtyuśśaṃkhacūḍasya śaṃkara //
nāstītyavitathaṃ nātha vidhehi brahmaṇo vacaḥ

ityākarṇya nabhovāṇīṃ tathetyukte hare tadā //
harecchayāgato viṣṇustaṃ dideśa satāṃ gatiḥ

vṛddhabrāhmaṇaveṣeṇa viṣṇurmāyāvināṃ varaḥ //
śaṅkhacūḍopakaṃṭhaṃ ca gatvovāca sa taṃ tadā

vṛddhabrāhmaṇa uvāca//
dehi bhikṣāṃ dānavendra mahyaṃ prāptāya sāṃpratam

nedānīṃ kathayiṣyāmi prakaṭaṃ dīnavatsalam //
paścāttvāṃ kathayiṣyāmi punassatyaṃ kariṣyasi

omityuvāca rājendraḥ prasannavadanekṣaṇaḥ //
kavacārthī janaścāhamityuvāceti sacchalāt

tacchrutvā dānavendrosau brahmaṇyaḥ satyavāgvibhuḥ //
taddadau kavacaṃ divyaṃ viprāya prāṇasaṃmatam

māyāyetthaṃ tu kavacaṃ tasmājjagrāha vai hariḥ //
śaṅkhacūḍasya rūpeṇa jagāma tulasīṃ prati

gatvā tatra haristasyā yonau māyāviśāradaḥ //
vīryādhānaṃ cakārāśu devakāryārthamīśvaraḥ

etasminnaṃtare śaṃbhumīrayan svavacaḥ prabhuḥ //
śaṃkhacūḍavadhārthāya śūlaṃ jagrāha prajvalat

tacchūlaṃ vijayaṃ nāma śaṅkarasya paramātmanaḥ //
sañcakāśe diśassarvā rodasī saṃprakāśayan

koṭimadhyāhnamārtaṃḍapralayāgniśikhopamam//
durnivāryaṃ ca durddharṣamavyarthaṃ vairighātakam

tejasāṃ cakramatyugraṃ sarvaśastrāstrasāyakam//
surāsurāṇāṃ sarveṣāṃ dussahaṃ ca bhayaṃkaram

saṃhartuṃ sarvabrahmāḍamavalaṃbya ca līlayā //
saṃsthitaṃ paramaṃ tatra ekatrībhūya vijvalat//

dhanussahasraṃ dīrgheṇa prasthena śatahastakam//
jīvabrahmāsvarūpaṃ ca nityarūpamanirmitam

vibhramad vyomni tacchūlaṃ śaṃkha cūḍopari kṣaṇāt //
cakāra bhasma tacchīghraṃ nipatya śivaśāsanāt

atha śūlaṃ maheśasya drutamāvṛtya śaṃkarama//
yayau vihāyasā vipramanoyāyi svakāryakṛt

nedurduṃdubhayassvarge jagurgaṃdharvakinnarāḥ //
tuṣṭuvurmunayo devā nanṛtuścāpsarogaṇāḥ

babhūva puṣpavṛṣṭiśca śivasyopari saṃtatam //
praśaśaṃsa harirbrahmā śakrādyā munayastathā

śaṃkhacūḍo dānavendraḥ śivasya kṛpayā tadā //
śāpa mukto babhūvātha pūrvarūpamavāpa ha

asthibhiśśaṃkhacūḍasya śaṃkhajātirbabhūva ha //
praśastaṃ śaṃkhatoyaṃ ca sarveṣāṃ śaṃkaraṃ vinā

viśeṣeṇa harerlakṣmyāḥ śaṃkhatoyaṃ mahāpriyam //
saṃbaṃdhināṃ ca tasyāpi na harasya mahāmune

tamitthaṃ śaṃkaro hatvā śivalokaṃ jagāma saḥ//
suprahṛṣṭo vṛṣārūḍhaḥ somaskandagaṇairvṛtaḥ

harirjagāma vaikuṃṭhaṃ kṛṣṇassvavastho babhūva ha//
surāssvaviṣayaṃ prāpuḥ paramānandasaṃyutāḥ

jagatsvāsthyamatīvāpa sarvanirvighnamāpakam//
nirmalaṃ cābhavadvyoma kṣitissarvā sumaṃgalā

iti proktaṃ maheśasya caritaṃ pramudāvaham//
sarvaduḥkhaharaṃ śrīdaṃ sarvakāmaprapūrakam

dhanyaṃ yaśasyamāyuṣyaṃ sarvavighnanivāraṇam//
bhuktidaṃ muktidaṃ caiva sarvakāmaphalapradam

ya idaṃ śṛṇuyānnityaṃ caritaṃ śaśimaulinaḥ//
śrāvayedvā paṭhedvāpi pāṭhayedvā sudhīrnaraḥ

dhanaṃ dhānyaṃ sutaṃ saukhyaṃ labhetātra na saṃśayaḥ//
sarvānkāmānavāpnoti śivabhaktiṃ viśeṣataḥ

idamākhyānamatulaṃ sarvopadravanāśanam//
paramajñānajananaṃ śivabhaktivivarddhanam

brāhmaṇo brahmavarcasvī kṣatriyo vijayī bhavet//
dhanāḍhyo vaiśyajaśśūdraśśṛṇvan sattamatāmiyāt

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaḍe śaṃkhacūḍavadhopākhyānaṃ nāma catvāriṃśo'dhyāyaḥ