Shiva Purana · Chapter 2.5.38

sanatkumāra uvāca //
sā ca gatvā hi saṃgrāmaṃ siṃhanādaṃ cakāra ha //
devyāśca tena nādena mūrcchāmāpuśca dānavāḥ

aṭṭāṭṭahāsamaśivaṃ cakāra ca punaḥ punaḥ //
tadā papau ca mādhvīkaṃ nanarta raṇamūrddhani

ugradaṃṣṭrā cogradaṃḍā koṭavī ca papau madhu //
anyāśca devyastatrājau nanṛturmadhu saṃpapuḥ

mahān kolāhalo jāto gaṇadevadale tadā//
jahṛṣurbahugarjaṃtassarve suragaṇādayaḥ

dṛṣṭvā kālīṃ śaṃkhacūḍaśśīghramājau samāyayau //
dānavāśca bhayaṃ prāptā rājā tebhyo'bhayaṃ dadau

kālī cikṣepa vahniṃ ca pralayāgniśikhopamam//
rājā jaghāna taṃ śīghraṃ vaiṣṇavāṃkitalīlayā

nārāyaṇāstraṃ sā devī cikṣepa taduparyaram //
vṛddhiṃ jagāma tacchastraṃ dṛṣṭvā vāmaṃ ca dānavam

taṃ dṛṣṭvā śaṃkhacūḍaśca pralayāgniśikhopamam//
papāta daṃḍavadbhūmau praṇanāma punaḥpunaḥ

nivṛttiṃ prāpa tacchstraṃ dṛṣṭvā namraṃ ca dānavam //
brahmāstramatha sā devī cikṣepa maṃtrapūrvakam

taṃ dṛṣṭvā prajjvalaṃtaṃ ca praṇamya bhuvi saṃsthitaḥ //
brahmāstreṇa dānavendro vinivāraṃ cakāra ha

atha kruddho dānavendro dhanurākṛṣya raṃhasā //
cikṣepa divyānyastrāṇi devyai vai maṃtrapūrvakam

āhāraṃ samare cakre prasārya mukhamāyatam //
jagarja sāṭṭahāsaṃ ca dānavā bhayamāyayuḥ

kālyai cikṣepa śaktiṃ sa śatayojanamāyatām //
devī divyāstrajālena śatakhaṃḍaṃ cakāra sā

sa ca vaiṣṇavamastraṃ ca cikṣepa caṃḍikopari //
māheśvareṇa kālī ca vinivāraṃ cakāra sā

evaṃ cirataraṃ yuddhamanyonyaṃ saṃbabhūva ha//
prekṣakā abhavansarve devāśca dānavā api

atha kuddhā mahādevī kālī kālasamā raṇe//
jagrāha mantrapūtaṃ ca śaraṃ pāśupataṃ ruṣā

kṣepātpūrvaṃ tanniṣeddhuṃ vāgbabhūvāśarīriṇī//
na kṣipāstramidaṃ devi śaṃkhacūḍāya vai ruṣā

mṛtyuḥ pāśupatānnāstyamoghādapi ca caṃḍike//
śaṃkhacūḍasya vīrasyopāyamanyaṃ vicāraya

ityākarṇya bhadrakālī na cikṣepa tadastrakam //
śatalakṣaṃ dānavānāṃ jaghāsa līlayā kṣudhā

attuṃ jagāma vegena śaṃkhacūḍaṃ bhayaṃkarī//
divyāstreṇa ca raudreṇa vārayāmāsa dānavaḥ

atha kruddho dānavendraḥ khaḍgaṃ cikṣepa satvaram //
grīṣmasūryopamaṃ tīkṣṇadhāramatyaṃtabhīkaram

sā kālī taṃ samālokyāyāṃtaṃ prajvalitaṃ ruṣā //
prasārya mukhamāhāraṃ cakre tasya ca paśyataḥ

divyānyastrāṇi cānyāni ciccheda dānaveśvaraḥ //
prāptāni pūrvataścakre śatakhaṃḍāni tāni ca

punarattuṃ mahādevī vegatastaṃ jagāma ha //
sarvasiddheśvaraḥ śrīmānaṃtardhānaṃ cakāra saḥ

vegena muṣṭinā kālī tamadṛṣṭvā ca dānavam //
babhaṃja ca rathaṃ tasya jaghāna kila sārathim

athāgatya drutaṃ māyī cakraṃ cikṣepa vegataḥ //
bhadrakālyai śaṃkhacūḍaḥ pralayāgniśikho pamam

sā devī taṃ tadā cakraṃ vāmahastena līlayā //
jagrāha svamukhenaivāhāraṃ cakre ruṣā drutam

/
muṣṭyā jaghāna taṃ devī mahākopena vegataḥ //
babhrāma dānavendropi kṣaṇaṃ mūrcchāmavāpa saḥ

kṣaṇena cetanāṃ prāpya sa cottasthau pratāpavān//
na cakre bāhu yuddhaṃ ca mātṛbuddhyā tayā saha

gṛhītvā dānavaṃ devī bhrāmayitvā punaḥpunaḥ //
ūrddhvaṃ ca prāpayāmāsa mahākopena vegataḥ

utpapāta ca vegena śaṃkhacūḍaḥ pratāpavān //
nipatya ca samuttasthā praṇamya bhadrakālikām

ratnendrasāranirmāṇavimānaṃ sumano haram //
āruroha sa hṛṣṭātmā na bhrāntopi mahāraṇe

dānavānāṃ hi kṣatajaṃ sā papau kālikā kṣudhā //
etasminnaṃtare tatra vāgvabhūvāśarīriṇī

lakṣaṃ ca dānavendrāṇāmavaśiṣṭaṃ raṇe'dhunā //
uddhataṃ guñjatāṃ sārddhaṃ tatastvaṃ bhuṃkṣva ceśvari

saṃgrāme dānavendraṃ ca haṃtuṃ na kuru mānasam //
avadhyoyaṃ śaṃkhacūḍastava devīti niścayam

tacchutvā vacanaṃ devī niḥsṛtaṃ vyomamaṃḍalāt//
dānavānāṃ bahūnāṃ ca māṃsaṃ ca rudhiraṃ tathā

bhuktvā pītvā bhadrakālī śaṃkarāṃtikamāyayau //
uvāca raṇavṛttāṃtaṃ paurvāparyeṇa sakramam

iti śrīśivamahāpurāṇe dvi० rudrasaṃ०paṃ०yuddhakhaṃḍe śaṃkhacūḍavadhe kālīyuddhavarṇanaṃ nāmāṣṭatriṃśo'dhyāyaḥ