Shiva Purana · Chapter 2.5.37

sanatkumāra uvāca //
tadā devagaṇāssarve dānavaiśca parājitāḥ //
dudruvurbhayabhītāśca śastrāstrakṣatavigrahāḥ

te parāvṛtya viśveśaṃ śaṃkaraṃ śaraṇaṃ yayuḥ //
trāhi trāhīti sarveśetyū curvihvalayā girā/२//
dṛṣṭvā parājayaṃ teṣāṃ devādīnāṃ sa śaṃkaraḥ //
sabhayaṃ vacanaṃ śrutvā kopamuccaiścakāra ha

nirīkṣya sa kṛpādṛṣṭyā devebhyaścābhayaṃ dadau //
balaṃ ca svagaṇānāṃ vai varddhayāmāsa tejasā

śivājñaptastadā skando dānavānāṃ gaṇaissaha //
yuyudhe nirbhayassaṃkhye mahāvīro harātmajaḥ

kṛtvā krodhaṃ vīraśabdaṃ devo yastārakāṃtakaḥ //
akṣauhiṇīnāṃ śatakaṃ samare sa jaghāna ha

rudhiraṃ pātayāmāsa kālī kamalalocanā //
teṣāṃ śirāṃsi saṃchidya babhakṣa sahasā ca sā

papau raktāni teṣāṃ ca dānavānāṃ samaṃ tataḥ //
yuddhaṃ cakāra vividhaṃ suradānavabhīṣaṇam

śatalakṣaṃ gajendrāṇāṃ śatalakṣaṃ nṛṇāṃ tathā //
samādāyaikahastena mukhe cikṣepa līlayā

kabaṃdhānāṃ sahasraṃ ca sannanarta raṇe bahu //
mahān kolāhalo jātaḥ klībānāṃ ca bhayaṃkaraḥ

punaḥ skaṃdaḥ prakupyoccaiḥ śaravarṣāñcakāra ha //
pātayāmāsa kṣayataḥ koṭiśo'suranāyakān

dānavāḥ śarajālena skandasya kṣatavigrahāḥ //
bhītāḥ pradudruvussarve śeṣā maraṇatastadā

vṛṣaparvā vipracittirdaṃḍaścāpi vikaṃpanaḥ //
skaṃdena yuyudhussārddhaṃ tena sarve krameṇa ca

mahāmārī ca yuyudhe na babhūva parāṅmukhī //
babhūvuste kṣatāṃgāśca skaṃdaśaktiprapīḍitāḥ

mahāmārīskaṃdayośca vijayobhūttadā mune //
nedurduṃdubhayassvarge puṣpavṛṣṭiḥ papāta ha

skaṃdasya samaraṃ dṛṣṭvā mahāraudraṃ tamadbhutam //
dānavānāṃ kṣayakaraṃ yathāprakṛtikalpakam

mahāmārīkṛtaṃ taccopadravaṃ kṣayahetukam//
cukopātīva sahasā sanaddhobhūtsvayaṃ tadā

varaṃ vimānamāruhya nānāśastrāstrasaṃyutam//
abhayaṃ sarvavīrāṇāṃ nānāratnaparicchadam

mahāvīraiśśaṃkhacūḍo jagāma rathamadhyataḥ //
dhanurvikṛṣya karṇāntaṃ cakāra śaravarṣaṇam

tasya sā śaravṛṣṭiśca durnivāryyā bhayaṃkarī //
mahāghorāṃdhakāraśca vadhasthāne babhūva ha

devāḥ pradudruvuḥ sarve ye'nye nandīśvarādayaḥ //
eka eva kārttikeyastasthau samaramūrddhani

parvatānāṃ ca sarpāṇāṃ nāgānāṃ śākhināṃ tathā //
rājā cakāra vṛṣṭiṃ ca durnivāryā bhayaṃkarīm

taddṛṣṭyā prahataḥ skando babhūva śivanandanaḥ //
nīhāreṇa ca sāṃdreṇa saṃvṛtau bhāskarau yathā

nānāvidhāṃ svamāyāṃ ca cakāra mayadarśitām //
tāṃ nāvidan surāḥ kepi gaṇāśca munisattama

tadaiva śaṅkhacūḍaśca mahāmāyī mahābalaḥ //
śareṇaikena divyena dhanuściccheda tasya vai

babhaṃja tadrathaṃ divyaṃ ciccheda rathapīḍakān //
mayūraṃ jarjarībhūtaṃ divyāstreṇa cakāra saḥ

śaktiṃ cikṣepa sūryābhāṃ tasya vakṣasi ghātinīm //
mūrcchāmavāpa sahasā tatprahāreṇa sa kṣaṇam

punaśca cetanāṃ prāpya kārtikaḥ paravīrahā //
ratnendrasāranirmāṇamāruroha svavāhanam

smṛtvā pādau maheśasya sāmbikasya ca ṣaṇmukhaḥ //
śastrāstrāṇi gṛhītvaiva cakāra raṇamulbaṇam

sarppāṃśca parvatāṃścaiva vṛkṣāṃśca prastarāṃstathā //
sarvāṃściccheda kopena divyā streṇa śivātmajaḥ

vahniṃ nivārayāmāsa pārjanyena śareṇa ha //
rathaṃ dhanuśca ciccheda śaṃkhacūḍasya līlayā

sannāhaṃ sarvavāhāṃśca kirīṭaṃ mukuṭojjvalam //
vīraśabdaṃ cakārāsau jagarja ca punaḥ punaḥ

cikṣepa śaktiṃ sūryābhāṃ dānavendrasya vakṣasi ///
tatprahāreṇa saṃprāpa mūrcchāṃ dīrghatamena ca

muhūrtamātraṃ tatkleśaṃ vinīya sa mahābalaḥ //
cetanāṃ prāpya cottasthau jagarja harivarca saḥ

śaktyā jaghāna taṃ cāpi kārtikeyaṃ mahābalam //
sa papāta mahīpṛṣṭhe'moghāṃ kurvanvidhipradām

kālī gṛhītvā taṃ kroḍe nināya śivasannidhau //
jñānena taṃ śivaścāpi jīvayāmāsa līlayā

dadau balamanaṃtaṃ ca samuttasthau pratāpavān //
gamanāya matiṃ cakre punastatra śivātmajaḥ

etasminnaṃtare vīro vīrabhadro mahābalaḥ //
śaṃkhacūḍena yuyudhe samare balaśālinā

vavarṣa samare'strāṇi yāniyāni ca dānavaḥ //
ciccheda līlayā vīrastānitāni nijaiśśaraiḥ

divyānyastrāṇi śataśo mumuce dānaveśvaraḥ //
tāni ciccheda taṃ bāṇairvīrabhadraḥ pratāpavān

athātīva cukopoccaiśśaṃkhacūḍaḥ pratāpavān //
śaktyā jaghānorasi taṃ sa cakaṃpe papāta kau

kṣaṇena cetanāṃ prāpya samuttasthau gaṇeśvaraḥ //
jagrāha ca dhanurbhūyo vīrabhadro gaṇāgraṇīḥ

etasminnaṃtare kālī jagāma samaraṃ punaḥ //
bhakṣituṃ dānavān svāṃśca rakṣituṃ kārtikecchayā

vīrāstāmanujagmuśca te ca nandīśvarādayaḥ //
sarve devāśca gaṃdharvā yakṣā rakṣāṃsi pannagāḥ

vādyabhāṃḍāśca bahuśaśśataśo madhuvāhakāḥ //
punaḥ samudyatāścāsan vīrā ubhayato'khilāḥ

iti śrīśivamahāpurāṇe dvitīyāyāṃ rudrasahitāyāṃ pañcame yuddhakhaṃḍe śaṃkhacūḍavadhe sasainyaśaṃkhacūḍayuddhavarṇanaṃ nāma saptatriṃśo'dhyāyaḥ