Shiva Purana · Chapter 2.5.36

sanatkumāra uvāca //
sa dūtastatra gatvā ca śivavākyaṃ jagāda ha //
savistaraṃ yathārthaṃ ca niścayaṃ tasya tattvataḥ

tacchutvā śaṃkhacūḍo'sau dānavendraḥ pratāpavān //
aṃgīcakāra suprītyā raṇameva sa dānavaḥ

samāruroha yānaṃ ca sahāmātyaiśca satvaraḥ// //
ādideśa svasainyaṃ ca yuddhārthaṃ śaṃkareṇa ca

śivassvasainyaṃ devāṃśca prerayāmāsa satvaraḥ //
svayamapyakhileśopi sannaddhobhūcca līlayā

yuddhāraṃbho babhūvāśu nedurvādyāni bhūriśaḥ //
kolāhalaśca saṃjāto vīraśabdastathaiva ca

devadānavayoryuddhaṃ sparamabhūnmune //
dharmato yuyudhe tatra devadānavayorgaṇaḥ

svayaṃ mahendro yuyudhe sārdhaṃ ca vṛṣaparvaṇā //
bhāskaro yuyudhe vipracittinā saha dharmataḥ

daṃbhena saha viṣṇuśca cakāra paramaṃ raṇam //
kālāsureṇa kālaśca gokarṇena hutāśanaḥ

kuberaḥ kālakeyena viśvakarmā mayena ca //
bhayaṃkareṇa mṛtyuśca saṃhāreṇa yamastathā

kālambikena varuṇaścaṃcalena samīraṇaḥ //
budhaśca ghaṭapṛṣṭhena raktākṣeṇa śanaiścaraḥ

jayanto ratnasāreṇa vasavo varcasāṃ gaṇaiḥ //
aśvinau dīptimadbhyāṃ ca dhūmreṇa nalakūbaraḥ

dhuraṃdhareṇa dharmaśca gaṇakākṣeṇa maṃgalaḥ //
śobhākareṇa vaiśvānaḥ pipiṭena ca manmathaḥ

gokāmukhena cūrṇena khaḍganāmnā'sureṇa ca //
dhūmreṇa saṃhalenāpi viśvena ca pratāpinā

palāśena dvādaśā'rkā yuyudhurdharmataḥ pare //
asurairamarāssārddhaṃ śivasāhāyyaśālinaḥ

ekādaśa mahārudrāścaikādaśabhayaṃkaraiḥ//
asurairyuyudhurvīrairmaihābalaparākramaiḥ

mahāmaṇiśca yuyudhe cogracaṃḍādibhissaha //
rāhuṇā saha candraśca jīvaḥ śukreṇa dharmataḥ

nandīśvarādayassarve dānavapravaraissaha //
yuyudhuśca mahāyuddhe noktā vistarataḥ pṛthak

vaṭamūle tadā śaṃbhustasthau kālyāḥ sutena ca //
sarve ca yuyudhussainyasamūhāssatataṃ mune

ratnasiṃhāsane ramye koṭidānavasaṃyutaḥ //
uvāsa śaṃkhacūḍaśca ratnabhūṣaṇabhūṣitaḥ

mahāyuddho babhūvātha devāsuravimardanaḥ //
nānāyudhāni divyāni calaṃtisma mahāmṛdhe

gadarṣṭipaṭṭiśāścakrabhuśuṃḍiprāsamudgarāḥ //
nistriṃśabhallaparighāḥ śaktyunmukhaparaśvadhāḥ

śaratomarakhaḍgāśca śataghnyaśca sahasraśaḥ //
bhiṃdipālādayaścānye vīrahasteṣu śobhitāḥ

śirāṃsi cicchiduścaibhirvīrāstatra maho tsavāḥ //
vīrāṇāmubhayoścaiva sainyayorgarjato raṇe

gajāsturaṃgā bahavaḥ syandanāśca padātayaḥ //
sārohavāhā vividhāstatrāsan suvikhaṃḍitāḥ

nikṛttabāhūrukarakaṭikarṇayugāṃghrayaḥ //
saṃchinnadhvajabāṇāsitanutra varabhūṣaṇāḥ

samuddhatakirīṭaiśca śirobhissaha kuṃḍalaiḥ //
saṃraṃbhanaṣṭairāstīrṇā babhau bhūḥ karabhorubhiḥ

mahābhujaissābharaṇaissaṃchinnaissāyudhaistathā //
aṃgairanyaiśca sahasā paṭalairvā sasāraghaiḥ

mṛdhe bhaṭāḥ pradhāvaṃtaḥ kabaṃdhān svaśirokṣibhiḥ //
paśyaṃtastatra cotpeturudyatāyudhasadbhujaiḥ

valgaṃto'titarāṃ vīrā yuyudhuśca parasparam //
śastrāstrairvividhaistatra mahābalaparākramāḥ

kecitsvarṇamukhairbāṇairvinihatya bhaṭānmṛdhe //
vyanadan vīrasannādaṃ satoyā iva toyadāḥ

sarvataśśarakūṭena vīrassarathasārathim //
vīraṃ saṃchādayāmāsa prāvṛṭsūryamivāṃbudaḥ

anyonyamabhisaṃsṛtya yuyudhurdvandvayodhinaḥ //
āhvayaṃto viśaṃto'gre kṣipaṃto marmabhirmithaḥ

sarvato vīrasaṃghāśca nānābāhudhvajāyudhāḥ //
vyadṛśyaṃta mahāsaṃkhye kurvaṃtaḥ siṃhasaṃravam

mahāravānsvaśaṃkhāṃśca vidadhmurvai pṛthak pṛthak//
valganaṃ cakrire tatra mahāvīrāḥ praharṣitāḥ

evaṃ cirataraṃ kālaṃ devadānavayormahat //
babhūva yuddhaṃ vikaṭaṃ karālaṃ vīraharṣadam

mahāprabhośca līleyaṃ śaṃkarasya parātmanaḥ//
yayā samīhitaṃ sarvaṃ sadevāsuramānuṣam

//
iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe śaṃkhacūḍavadhe parasparayuddhavarṇanaṃ nāma ṣaṭtriṃśo'dhyāyaḥ