Shiva Purana · Chapter 2.5.34

vyāsa uvāca //
vidhitāta mahābuddhe mune jīva ciraṃ samāḥ //
kathitaṃ sumahaccitraṃ caritaṃ candramaulinaḥ

śivadūte gate tatra śaṅkhacūḍaśca dānavaḥ //
kiṃ cakāra pratāpī sa tattvaṃ vada suvistaram

sanatkumāra uvāca //
atha dūte gate tatra śaṃkhacūḍaḥ pratāpavān //
uvāca tulasīṃ vārtāṃ gatvābhyaṃtarameva tām

śaṅkhacūḍa uvāca //
śambhudūtamukhāddevi yuddhāyāhaṃ samudyataḥ //
tena gacchāmyahaṃ yoddhuṃ śāsanaṃ kuru me dhruvam

ityevamuktvā sa jñānī nānābodhanataḥ priyām//
krīḍāṃ cakāra harṣeṇa tamanādṛtya śaṃkaram

tau dampatī cikrīḍāte nimagnau sukhasāgare //
nānākāmakalābhiśca niśi cāṭuśutairapi

brāhme muhūrta utthāya prātaḥkṛtyaṃ vidhāya ca //
nityakāryaṃ ca kṛtvādau dadau dānamanaṃtakam

putraṃ kṛtvā ca rājendraṃ sarveṣu dāna veṣu ca //
putre samarpya bhāryāṃ ca sa rājyaṃ sarvasaṃpadam

priyāmāśvāsayāmāsa sa rājā rudatīṃ punaḥ //
niṣedhatīṃ ca gamanaṃ nānā vārtāṃ prakathya ca // ९ /
nijasenāpatiṃ vīraṃ samāhūya samādṛtaḥ //
ādideśa sa sanaddhassaṃgrāmaṃ kartu'mudyataḥ

śaṃkhacūḍa uvāca//
adya senāpate vīrāssarve samaraśālinaḥ //
saṃnaddhākhilakarmāṇo nirgacchaṃtu raṇāya ca

daityāśca dānavāḥ śūrā ṣaḍaśītirudā yudhāḥ //
kaṃkānāṃ balināṃ śīghraṃ senā niryāṃtu nirbhayāḥ

pañcāśadasurāṇāṃ hi nirgacchaṃtu kulāni vai //
koṭivīryāṇi yuddhārthaṃ śambhunā devapakṣiṇā

saṃnaddhāni ca dhaumrāṇāṃ kulāni ca śataṃ drutam //
nirgacchaṃtu raṇārthaṃ hi śambhunā mama śāsanāt

kālakeyāśca mauryāśca daurhṛdāḥ kālakāstathā //
sajjā niryāntu yuddhāya rudreṇa mama śāsanāt

sanatkumāra uvāca //
ityājñāpyāsurapatirdānavendro mahābalaḥ //
nirjagāma mahāsainyaḥ sahasraibahubhirvṛtaḥ

tasya senāpatiścaiva yuddhaśāstraviśāradaḥ //
mahāratho mahāvīro rathināṃ pravaro raṇe

trilakṣākṣauhiṇīyukto māṃḍalyaṃ ca cakāra ha //
bahirbabhūva śibirādraṇe vīrabhayaṅkaraḥ

ratnendraṃ sāranirmāṇaṃ vimānamabhiruhya saḥ //
guruvargaṃ puraskṛtya raṇārthaṃ prayayau kila//////
puṣpabhadrānadītīre yatrākṣayavaṭaḥ śubhaḥ //
siddhāśrame ca siddhānāṃ siddhikṣetraṃ susiddhidam

kapilasya tataḥ sthānaṃ puṇyakṣetre ca bhārate //
paścimodadhipūrve ca malayasya hi paścime

śrīśailottarabhāge ca gaṃdhamādanadakṣiṇe //
paṃcayojanavistīrṇaṃ dairghye śataguṇastathā

śuddhasphaṭikasaṃkāśā bhārate ca supuṇyadā//
puṣpabhadrā nadī ramyā jalapūrṇā sarasvatī//२३/
lavaṇodadhipriyā bhāryā śaśvatsaubhāgyasaṃ yutā //
sarasvatīsaṃśritā ca nirgatā sā himālayāt

gomaṃtaṃ vāmataḥ kṛtvā praviṣṭā paścimodadhau //
tatra gatvā śaṃkhacūḍaḥ śiva senāṃ dadarśa ha

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe śaṃkhacūḍayātrāvarṇanaṃ nāma catustriṃśo'dhyāyaḥ