Shiva Purana · Chapter 2.5.35

sanatkumāra uvāca //
tatra sthitvā dānavendro mahāntaṃ dānaveśvaram //
dūtaṃ kṛtvā mahāvijñaṃ preṣayāmāsa śaṃkaram

sa tatra gatvā dūtaśca candrabhālaṃ dadarśa ha //
vaṭamūle samāsīnaṃ sūryakoṭisamaprabham

kṛtvā yogāsanaṃ dṛṣṭyā mudrāyuktaṃ ca sasmitam //
śuddhasphaṭikasaṃkāśaṃ jvalaṃtaṃ brahmatejasa

triśūlapaṭṭiśadharaṃ vyāghracarmāṃbarāvṛtam //
bhaktamṛtyuharaṃ śāṃtaṃ gaurīkāntaṃ trilocanam

tapasāṃ phaladātāraṃ karttāraṃ sarvasaṃpadām //
āśutoṣaṃ prasannāsya bhaktānugrahakārakam

viśvanāthaṃ viśvabījaṃ viśvarūpaṃ ca viśvajam //
viśvaṃbharaṃ viśvakaraṃ viśvasaṃhārakāraṇam

kāraṇaṃ kāraṇānāṃ ca narakārṇavatāraṇam //
jñānapradaṃ jñānabījaṃ jñānānandaṃ sanātanam

avaruhya rathād dūtastaṃ dṛṣṭvā dānaveśvaraḥ//
śaṃkaraṃ sakumāraṃ ca śirasā praṇanāma saḥ

vāmato bhadrakālī ca skaṃdaṃ tatpurataḥ sthitam //
lokāśiṣaṃ dadau tasmai kālī skaṃdaśca śaṃkaraḥ

athāsau śaṃkhacūḍasya dūtaḥ paramaśāstravit //
uvāca śaṃkaraṃ natvā karau baddhvā śubhaṃ vacaḥ

// dūta uvāca //
śaṃkhacūḍasya dūto'haṃ tvatsakāśamihāgataḥ //
vartate te kimicchādya tattvaṃ brūhi maheśvara

sanatkumāra uvāca//
iti śrutvā ca vacanaṃ śaṃkhacūḍasya śaṃkaraḥ //
prasannātmā mahādevo bhagavāṃstamuvāca ha

mahādeva uvāca //
śṛṇu dūta mahāprājña vaco mama sukhāvaham //
kathanīyamidaṃ tasmai nirvivādaṃ vicārya ca

vidhātā jagatāṃ brahmā pitā dharmasya dharmavit //
marīcistasya putraśca kaśyapastatsutaḥ smṛtaḥ

dakṣaḥ prītyā dadau tasmai nijakanyāstrayodaśa //
tāsvekā ca danussādhvī tatsaubhāgyavivarddhinī

catvāraste danoḥ putrā dānavāstejasolbaṇāḥ //
teṣveko vipracittistu mahābalaparākramaḥ

tatputro dhārmiko daṃbho dānavendro mahāmatiḥ //
tasya tvaṃ tanayaḥ śreṣṭho dharmātmā dānaveśvaraḥ

purā tvaṃ pāṣardo gopo gopeṣveva ca dhārmikaḥ //
adhunā rādhikāśāpājjātastvaṃ dānaveśvaraḥ

dānavīṃ yonimāyātastattvato na hi dānavaḥ //
nijavṛtaṃ purā jñātvā devavairaṃ tyajādhunā

drohaṃ na kuru taissārddhaṃ svapadaṃ bhuṃkṣva sādaram //
nādhikaṃ savikāraṃ ca kuru rājyaṃ vicārya ca

dehi rājyaṃ ca devānāṃ matprītiṃ rakṣa dānava //
nijarājye sukhaṃ tiṣṭha tiṣṭhaṃtu svapade surāḥ

alaṃ bhūtavirodhena devadroheṇa kiṃ punaḥ //
kulīnāśśuddhakarmāṇaḥ sarve kaśyapavaṃśajāḥ

yāni kāni ca pāpāni brahmahatyā dikāni ca //
jñātidrohajapāpasya kalāṃ nārhaṃti ṣoḍaśīm

sanatkumāra uvāca //
ityādibahuvārttāṃ ca śrutismṛtiparāṃ śubhām //
provāca śaṃkarastasmai bodhayan jñānamuttamam

śikṣitaśśaṃkhacūḍena sa dūtastarkavittama //
uvāca vacanaṃ namro bhavitavyavimohitaḥ

dūta uvāca //
tvayā yatkathitaṃ deva nānyathā tattathā vacaḥ //
tathyaṃ kiṃcidyathārthaṃ ca śrūyatāṃ me nivedanam

jñātidrohe mahatpāpaṃ tvayoktamadhunā ca yat //
tatkimīśāsurāṇāṃ ca na surāṇāṃ vada prabho

sarveṣāmiti cettadvai tadā vacmi vicārya ca //
nirṇayaṃ brūhi tatrādya kuru saṃdehabhaṃjanam

madhukaiṭabhayordaityavarayoḥ pralayārṇave //
śiraśchedaṃ cakārāsau kasmāccakrī maheśvara

tripuraissaha saṃyuddhaṃ bhasmatvakaraṇaṃ kutaḥ //
bhavāñcakāra giriśa surapakṣīti viśrutam

gṛhītvā tasya sarvasvaṃ kutaḥ prasthāpito baliḥ //
sutalādi samuddhartuṃ taddvāre ca gadādharaḥ

sabhrātṛko hiraṇyākṣaḥ kathaṃ devaiśca hiṃsitaḥ //
śuṃbhādayo'surāścaiva kathaṃ devairnipātitāḥ

purā samudramathane pīyūṣaṃ bhakṣitaṃ suraiḥ //
kleśabhājo vayaṃ tatra te sarve phalabhoginaḥ

krīḍābhāṃḍamidaṃ viśvaṃ kālasya paramātmanaḥ//
sa dadāti yadā yasmai tasyai tasyaiśvaryaṃ bhave ttadā

devadānavayorvairaṃ śaśvanaimittikaṃ sadā //
parājayo jayasteṣāṃ kālādhīnaḥ krameṇa ca

tavānayorvirodhe ca gamanaṃ niṣphalaṃ bhavet //
samasaṃbaṃdhināṃ tadvai rocate neśvarasya te

surāsurāṇāṃ sarveṣāmīśvarasya mahātmanaḥ //
iyaṃ te rahitā lajjā sparddhāsmābhissahādhunā

yatodhikā caiva kīrtirhāniścaiva parājaye //
tavaitadviparītaṃ ca manasā saṃvicārya tām

sanatkumāra uvāca //
ityetadvacanaṃ śrutvā saṃprahasya trilocanaḥ//
yathocitaṃ ca madhuramuvāca dānaveśvaram

maheśa uvāca //
vayaṃ bhaktaparādhīnā na svataṃtrāḥ kadāpi hi //
tadicchayā tatkarmāṇo na kasyāpi ca pakṣiṇaḥ

purā vidhiprārthanayā yuddhamādau harerapi //
madhukaiṭabhayordetyavarayoḥ pralayārṇave

devaprārthanayā tena hiraṇyakaśipoḥ purā //
prahrādārthaṃ vadho'kāri bhaktānāṃ hitakāriṇā

tripuraissaha saṃyuddhaṃ bhasmatvakaraṇaṃ tataḥ //
devaprārthanayākāri mayāpi ca purā śrutam

sarveśvaryāssarvamāturdevaprārthanayā purā //
āsīcchuṃbhādibhiryuddhaṃ vadhasteṣāṃ tayā kṛtaḥ

adyāpi tridaśāssarve brahmāṇaṃ śaraṇaṃ yayuḥ //
sa sadevo harirmāṃ ca devaśśaraṇamāgataḥ

haribrahmādikānāṃ ca prārthanāvaśatopyaham //
surāṇāmīśvaro dūta yuddhārthamagamaṃ khalu

pārṣadapravarastvaṃ hi kṛṣṇasya ca mahātmanaḥ //
ye ye hatāśca daiteyā nahi kepi tvayā samāḥ

kā lajjā mahatī rājan mama yuddhe tvayā saha //
devakāryārthamīśohaṃ vinayena ca preṣitaḥ

gaccha tvaṃ śaṃkhacūḍe vai kathanīyaṃ ca me vacaḥ //
sa ca yuktaṃ karotvatra surakāryaṃ karomyaham

ityuktvā śaṃkarastatra virarāma maheśvaraḥ //
uttasthau śaṃkhacūḍasya dūto'gacchattadaṃtikam

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe śaṃkhacūḍavadhe śivadūtasaṃvādo nāma paṃcatriṃśo'dhyāyaḥ