Shiva Purana · Chapter 2.5.33

sanatkumāra uvāca //
tasya tadvākyamākarṇya surarāṭ tataḥ //
sakrodhaḥ prāha giriśo vīrabhadrādikāngaṇān

rudra uvāca //
he vīrabhadra he naṃdinkṣetrapālaṣṭabhairavāḥ //
sarve gaṇāśca sannaddhāssāyudhā balaśālinaḥ

kumārābhyāṃ sahaivādya nirgacchaṃtu mamājñayā//
svasenayā bhadrakālī nirgacchatu raṇāya ca//
śaṃkhacūḍavadhārthāya nirgacchāmyadya satvaram //

sanatkumāra uvāca //
ityājñāpya maheśāno niryayau sainyasaṃyutaḥ //
sarve vīragaṇāstasyānu yayussaṃpraharṣitāḥ

etasminnaṃtare skaṃdagaṇeśau sarvasainyapau //
yataturmuditau naddhau sāyudhau ca śivāṃtike

vīrabhadraśca nandī ca mahākālassubhadrakaḥ //
viśālākṣaśca bāṇaśca piṃgalākṣo vikaṃpanaḥ

//
virūpo vikṛtiścaiva maṇibhadraśca bāṣkalaḥ //
kapilākhyo dīrghadaṃṣdro vikarastāmralocanaḥ

kālaṃkaro balībhadraḥ kālajihvaḥ kuṭīcaraḥ //
balonmatto raṇaślāghyo durjayo durgamastathā

ityādayo gaṇeśānāssainyānāṃ patayo varāḥ //
teṣāṃ ca gaṇanāṃ vacmi sāvadhānatayā śṛṇu

śaṃkhakarṇaḥ koṭigaṇairyutaḥ paravimardakaḥ //
daśabhiḥ kekarākṣaśca vikṛto'ṣṭābhireva ca

catuṣṣaṣṭyā viśākhaśca navabhiḥ pāriyātrikaḥ //
ṣaḍbhissarvāntakaḥ śrīmāṃsta thaiva vikṛtānanaḥ

jālako hi dvādaśabhiḥ koṭibhirgaṇapuṃgavaḥ //
saptabhissamadaḥ śrīmāndundubho'ṣṭābhireva ca

paṃcabhiśca karālākṣaḥ ṣaḍbhissaṃdārako varaḥ //
koṭikoṭibhireveha kaṃdukaḥ kuṃḍakastathā

viṣṭaṃbho'ṣṭābhireveha gaṇapassarvasa ttamaḥ //
pippalaśca sahasreṇa saṃnādaśca tathāvidhaḥ

āveśanastathāṣṭābhistvaṣṭabhiścandratāpanaḥ //
mahākeśaḥ sahasreṇa koṭīnāṃ gaṇapo vṛtaḥ

kuṃḍī dvādaśabhirvīrastathā parvatakaśśubhaḥ //
kālaśca kālakaścaiva mahākālaśśatena vai

agnikaśśata koṭyā ca koṭyāgnimukha eva ca //
ādityo hyarddhakoṭyā ca tathā caivaṃ ghanāvahaḥ

sanāhaśca śatenaiva kumudaḥ koṭibhistathā //
amoghaḥ kokilaścaiva śatakoṭyā sumaṃtrakaḥ

kākapādaḥ koṭiṣaṣṭyā ṣaṣṭyā saṃtānakastathā //
mahābalaśca navabhiḥ pañcabhirmadhupiṃgala

nīlo navatyā deveśaḥ pūrṇabhadrastathaiva ca //
koṭīnāṃ caiva saptānāṃ caturvaktro mahābalaḥ

koṭikoṭisahasrāṇāṃ śatairviṃśatibhistathā //
tatrājagmustathā vīrāste sarve saṃgarotsave

bhūtakoṭisahasreṇa pramathairkoṭibhi stribhiḥ //
vīrabhadraścatuṣṣaṣṭyā lomajānāṃ trikoṭibhiḥ

kāṣṭhārūḍhaścatuḥṣaṣṭyā sukeśo vṛṣabhastathā //
virūpākṣaśca bhagavāṃścatuṣṣaṣṭyā sanātanaḥ

tālaketuḥ ṣaḍāsyaśca paṃcāsyaśca pratāpavān //
saṃvartakastathā caitro laṃkulīśassvayaṃ prabhuḥ

lokāṃtakaśca dīptātmā tathā daityāṃtakaḥ prabhuḥ //
devo bhṛṅgīriṭiḥ śrīmāndevadevapriyastathā

aśanirbhānukaścaiva catuḥ ṣaṣṭyā sahasraśaḥ //
kaṃkālaḥ kālakaḥ kālo nandī sarvāntakastathā

ete cānye ca gaṇapā asaṃkhyātā mahābalāḥ//
yuddhārthaṃ niryayuḥ prītyā śaṃkhacūḍena nirbhayāḥ

sarve sahasrahastāśca jaṭāmukuṭadhāriṇaḥ //
candrarekhāvataṃsāśca nīlakaṃṭhāstrilocanāḥ

rudrākṣābharaṇāssarve tathā sadbhasmadhāriṇaḥ //
hārakuṃḍalakeyūramukuṭādyairalaṃkṛtāḥ

brahmendraviṣṇusaṃkāśā aṇimādiguṇairvṛtāḥ //
sūryakoṭipratīkāśāḥ pravīṇā yuddhakarmaṇi

pṛthivīcāriṇaḥ kecitkecitpātālacāriṇaḥ //
kecidvyomacarāḥ kecitsaptasvargacarā mune

kiṃ bahūktena devarṣe sarvalokanivāsinaḥ //
yayuśśivagaṇāssarve yuddhārthaṃ dānavaissaha

aṣṭau ca bhairavā raudrā rudrā ścaikādaśāśu ye//
vasavo'ṣṭau vāsavaścādityā dvādaśa te drutam

hutāśanaśca candraśca viśvakarmāśvinau ca tau //
kuberaśca yamaścaiva nirṛtirnalakūbaraḥ

vāyuśca varuṇaścaiva budhaśca maṃgalaśca vai //
grahāścānye maheśena kāmadevaśca vīryavān

ugradaṃṣṭraścogradaṇḍaḥ koraṭaḥ koṭabhastathā //
svayaṃ śatabhujā devī bhadrakālī maheśvarī

ratnendrasāranirmāṇavimānopari saṃsthitā// /
raktavastraparīdhānā raktamālyānulepanā

nṛtyaṃtī ca hasaṃtī ca gāyaṃtī susvaraṃ mudā //
abhayaṃ dadatī svebhyo bhayaṃ cāribhya eva sā

bibhratī vikaṭāṃ jihvāṃ sulolāṃ yojanāyatām //
śaṃkhacakragadāpadmakhaṅgacarmadhanuśśarān

kharparaṃ vartulākāraṃ gaṃbhīraṃ yojanāyatam//
triśūlaṃ gaganasparśiṃ śaktiṃ ca yojanāyatām

mudgaraṃ musalaṃ vaktraṃ khaṅgaṃ phalakamulbaṇam //
vaiṣṇavāstraṃ vāruṇāstraṃ vāyavyaṃ nāgapāśakam

nārāyaṇāstraṃ gāṃdharvaṃ brahmāstraṃ gāruḍaṃ tathā //
pārjanyaṃ ca pāśupataṃ jṛṃbhaṇāstraṃ ca pārvatam

mahāvīraṃ ca sauraṃ ca kālakālaṃ mahānalam //
maheśvarāstraṃ yāmyaṃ ca daṃḍaṃ saṃmohanaṃ tathā

samarthamastrakaṃ divyaṃ divyāstraṃ śatakaṃ param//
bibhratī ca karaissarvairanyānyapi ca sā tadā

āgatya tasthau sā tatra yoginīnāṃ trikoṭibhiḥ //
sārddhaṃ ca ḍākinīnāṃ vai vikaṭānāṃ trikoṭibhiḥ

bhūtapretapiśācāśca kūṣmāṇḍā brahmarākṣasāḥ //
vetālā rākṣasāścaiva yakṣāścaiva sakinnarāḥ

taścaivābhivṛtaḥ skaṃdaḥ praṇamya candraśekharam //
pituḥ pārśve sahāyo yaḥ samuvāsa tadājñayā

atha śambhussamānīya svasainyaṃ sakalaṃ tadā//
yuddhārthamagamadrudraśśaṃṅkhacūḍena nirbhayaḥ

candrabhāgānadītīre vaṭamūle manohare //
tatra tasthau mahādevo devanistā rahetave

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṅkhacūḍavadhe mahādevayuddhayātrāvarṇanaṃ nāma traya striṃśattamo'dhyāyaḥ