Shiva Purana · Chapter 2.5.32

sanatkumāra uvāca //
atheśāno mahārudro duṣṭakālassatāṃgatiḥ //
śaṃkhacūḍavadhaṃ citte niścikāya surecchayā

dūtaṃ kṛtvā citrarathaṃ gaṃdharveśvaramīpsitam //
śīghraṃ prasthāpayāmāsa śaṃkhacūḍāṃtike mudā

sarveśvarājñayā dūto yayau tannagaraṃ ca saḥ //
mahendranagarotkṛṣṭaṃ kuberabhavanādhikam

gatvā dadarśa tanmadhye śaṃkhacūḍālayaṃ varam //
rājitaṃ dvādaśairdvārairdvārapālasamanvitam

sa dṛṣṭvā puṣpadantastu varaṃ dvāraṃ dadarśa saḥ//
kathayāmāsa vṛttāṃtaṃ dvārapālāya nirbhayaḥ

atikramya ca taddvāraṃ jagāmābhyaṃtare mudā//
atīva sundaraṃ ramyaṃ vistīrṇaṃ samalaṃkṛtam

sa gatvā śaṃkhacūḍaṃ taṃ dadarśa danujādhipam //
vīramaṃḍala madhyasthaṃ ratnasiṃhāsanasthitam

dānavendraiḥ parivṛtaṃ sevitaṃ ca trikoṭibhiḥ //
śataḥ koṭibhiranyaiśca bhramadbhiśśastrapāṇibhiḥ

evaṃbhūtaṃ ca taṃ dṛṣṭvā puṣpadaṃtassavismayaḥ //
uvāca raṇavṛttāṃtaṃ yaduktaṃ śaṃkareṇa ca

puṣpadaṃta uvāca //
rājendra śivadūto'haṃ puṣpadaṃtābhidhaḥ prabho //
yaduktaṃ śaṃkareṇaiva tacchṛṇu tvaṃ bravīmi te

śiva uvāca
rājyaṃ dehi ca devānāmadhikāraṃ hi sāṃpratam //
nocetkuru raṇaṃ sārddhaṃ pareṇa ca mayā satām

devā māṃ śaraṇāpannā deveśaṃ śaṃkaraṃ satām //
ahaṃ kruddho mahārudrastvāṃ vadhiṣyāmyasaṃśayam

haro'smi sarvadevebhyo hyabhayaṃ dattavānaham//
khaladaṃḍadharo'haṃ vai śaraṇāgatavatsalaḥ

rājyaṃ dāsyasi kiṃ vā tvaṃ kariṣyasi raṇaṃ ca kim //
tattvaṃ brūhi dvayorekaṃ dānavendra vicārya vai

puṣpadaṃta uvāca //
ityuktaṃ yanmaheśena tubhyaṃ tanme niveditam //
vitathaṃ śaṃbhuvākyaṃ na kadāpi danujādhipa

ahaṃ svasvāminaṃ gaṃtumicchāmi tvaritaṃ haram //
gatvā vakṣyāmi kiṃ śaṃbhostathā tvaṃ vada māmiha

// sanatkumāra uvāca
itthaṃ ca puṣpadaṃtasya śivadūtasya satpateḥ //
ākarṇya vacanaṃ rājā hasitvā tamuvāca saḥ

śaṃkhacūḍa uvāca //
rājyaṃ dāsye na devebhyo vīrabhogyā vasuṃdharā //
raṇaṃ dāsyāmi te rudra devānāṃ pakṣapātine

yasyopari prayāyī syātsa vīro bhuvena'dhamaḥ/
ataḥ pūrvamahaṃ rudra tvāṃ gamiṣyāmyasaṃśayam

prabhāta āgamiṣyāmi vīrayātrā vicārataḥ //
tvaṃ gacchācakṣva rudrāya hīdṛśaṃ vacanaṃ mama

//
iti śrutvā śaṃkhacūḍavacanaṃ suprahasya saḥ //
uvāca dānavendraṃ sa śaṃbhudūtastu garvitam

anyeṣāmapi rājendra gaṇānāṃ śaṃkarasya ca //
na sthātuṃ saṃmukhe yogyaḥ kiṃ punastasya saṃmukham

sa tvaṃ dehi ca devānāmadhikārāṇi sarvaśaḥ //
tvamare gaccha pātālaṃ yadi jīvitumicchasi

sāmānyamamaraṃ taṃ no viddhi dānavasattama//
śaṃkaraḥ paramātmā hi sarveṣāmīśvareśvaraḥ

indrādyāssakalā devā yasyājñāvartinassadā//
saprajāpatayassiddhā munayaścāpyahīśvarāḥ

harervidheśca sa svāmī nirguṇassaguṇassa hi //
yasya bhrūbhaṃgamātreṇa sarveṣāṃ pralayo bhavet

śivasya pūrṇarūpaśca lokasaṃhārakārakaḥ//
satāṃ gatirduṣṭahaṃtā nirvikāraḥ parātparaḥ

brahmaṇodhipatisso'pi harerapi maheśvaraḥ//
avamānyā na vai tasya śāsanā dānavarṣabha

kiṃ bahūktena rājendra manasā saṃvicārya ca //
rudraṃ viddhi maheśānaṃ paraṃ brahma cidātmakam

dehi rājyaṃ hi devānāmadhikārāṃśca sarvaśaḥ //
evaṃ te kuśalaṃ tāta bhaviṣyatyanyathā bhayam /2.5.३०/
santkumāra uvāca//
iti śrutvā dānaveṃdraḥ śaṃkhacūḍaḥ pratāpavān //
uvāca śivadūtaṃ taṃ bhavitavyavimohitaḥ

śaṃkhacūḍa uvāca //
svato rājyaṃ na dāsyāmi nādhikārān viniścayāt //
vinā yuddhaṃ maheśena satyametadbravīmyaham

kālādhīnaṃ jagatsarvaṃ vijñeyaṃ sacarācaram//
kālādbhavati sarvaṃ hi vinaśyati ca kālataḥ

tvaṃ gaccha śaṃkaraṃ rudraṃ mayoktaṃ vada tattvata//
sa ca yuktaṃ karotvevaṃ bahuvārtāṃ kuruṣva no

sanatkumāra uvāca//
ityuktvā śivadūto'sau jagāma svāminaṃ nijam //
yathārthaṃ kathayāmāsa puṣpadaṃtaśca sanmune

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṃkhacūḍavadhe dūtagamanaṃ nāma dvātriṃśo'dhyāyaḥ