Shiva Purana · Chapter 2.5.31

sanatkumāra uvāca //
athākarṇya vacaśśaṃbhurharividhyossudīnayoḥ //
uvāca vihasanvāṇyā meghanādagabhīrayā

śiva uvāca //
he hare vatsa he brahmaṃstyajataṃ sarvaśo bhayam //
śaṃkhacūḍodbhavaṃ bhadraṃ sambhaviṣyatyasaṃśayam

śaṃkhacūḍasya vṛttāṃtaṃ sarvaṃ jānāmi tattvataḥ //
kṛṣṇabhaktasya gopasya sudāmnaśca purā prabho

madājñayā hṛṣīkeśo kṛṣṇarūpaṃ vidhāya ca //
gośālāyāṃ sthito ramye goloke madadhiṣṭhite

svataṃtrohamiti svaṃ sa mohaṃ matvā gataḥ purā //
krīḍāssamakarodbahvīssvairavartīva mohitaḥ

taṃ dṛṣṭvā mohamatyugraṃ tasyāhaṃ māyayā svayā //
teṣāṃ saṃhṛtya sadbuddhiṃ śāpaṃ dāpitavān kila

itthaṃ kṛtvā svalīlāṃ tāṃ māyāṃ saṃhṛtavānaham //
jñānayuktāstadā te tu muktamohāssubuddhayaḥ //

samīpamāgatāste me dīnībhūya praṇamya mām //
akurvansunutiṃ bhaktyā karau baddhvā vinamrakāḥ

vṛttāṃtamavadansarvaṃ lajjākulitamānasāḥ //
ūcurmatpurato dīnā rakṣarakṣeti vai giraḥ

tadā tvahaṃ bhavasteṣāṃ saṃtuṣṭaḥ proktavān vacaḥ//
bhayaṃ tyajata he kṛṣṇa yūyaṃ sarve madājñayā

rakṣako'haṃ sadā prītyā subhadraṃ vo bhaviṣyati//
madicchayā'khilaṃ jātamidaṃ sarvaṃ na saṃśayaḥ

svasthānaṃ gaccha tvaṃ sārddhaṃ rādhayā pārṣadena ca //
dānavastu bhavetsoyaṃ bhārate'tra na saṃśayaḥ

śāpoddhāraṃ kariṣye'haṃ yuvayossamaye khalu //
maduktamiti saṃdhārya śirasā rādhayā saha

śrīkṛṣṇo'modadatyaṃtaṃ svasthānamagamatsudhīḥ //
nyaṣṭhātāṃ sabhayaṃ tatra madārādhanatatparau

matvākhilaṃ madadhīnamasvatantraṃ nijaṃ ca vai//
sa sudāmā'bhavadrādhāśāpato dānaveśvaraḥ

śaṅkhacūḍābhidho devadrohī dharmavicakṣaṇaḥ //
kliśnāti subalātkṛtsnaṃ sadā devagaṇaṃ kudhīḥ

manmāyāmohitassotiduṣṭamaṃtrisahā yavān //
tadbhayaṃ tyajatāśveva mayi śāstari vai sati

sanatkumāra uvāca //
ityūcivāñśivo yāvaddharibrahmapuraḥ kathām //
abhavattāvadanyacca caritaṃ tanmune śṛṇu

tasminnevāṃtare kṛṣṇo rādhayā pārṣadaiḥ saha//
sadgopairāyayau śaṃbhumanukūlayituṃ prabhum

prabhuṃ praṇamya sadbhaktyā militvā harimādarāt //
saṃmato vidhinā prītyā saṃtasthau śivaśāsanāt

tataḥ śaṃbhuṃ punarnatvā tuṣṭāva vihitāñjaliḥ //
śrīkṛṣṇo mohanirmukto jñātvā tattvaṃ śivasya hi

śrīkṛṣṇa uvāca //
devadeva mahādeva parabrahma satāṃgate //
kṣamasva cāparādhaṃ me prasīda parameśvara

tvattaḥ śarva ca sarvaṃ ca tvayi sarvaṃ maheśvara //
sarvaṃ tvaṃ nikhilādhīśa prasīda parameśvara

tvaṃ jyotiḥ paramaṃ sākṣātsarvavyāpī sanātanaḥ //
tvayā nāthena gaurīśa sanāthāssakalā vayam

sarvopari nijaṃ matvā viharanmohamāśritaḥ //
tatphalaṃ prāptavānasmi śāpaṃ prāptassavāmakaḥ

pārṣadapravaro yo me sudāmā nāma gopakaḥ//
sa rādhāśāpataḥ svāmindānavīṃ yonimāśritaḥ

asmānuddhara durggeśa prasīda parameśvara //
śāpoddhāraṃ kuruṣvādya pāhi naśśaraṇāgatān

ityuktvā virarāmaiva śrīkṛṣṇo rādhayā saha//
prasanno'bhūcchivastatra śaraṇāgatavatsalaḥ//२८
śrīśiva uvāca //
he kṛṣṇa gopikānātha bhayaṃ tyaja sukhī bhava //
mayānugṛhṇatā tāta sarvamācaritaṃ tvidam

saṃbhaviṣyati te bhadraṃ gaccha svasthānamuttamam //
sthātavyaṃ svādhikāre ca sāvadhānatayā sadā

viharasva yathākāmaṃ māṃ vijñāya parātparam //
svakāryaṃ kuru nirvyagraṃ rādhayā pārṣadaiḥ khalu

vārāhapravare kalpe taruṇyā rādhayā saha //
śāpaprabhāvaṃ bhuktvā vai punarāyāsyati svakam//३२
sudāmā pārṣado yo hi tava kṛṣṇa priyapriyaḥ //
dānavīṃ yonimāśrityedānīṃ kliśnāti vai jagat

śāpaprabhāvādrādhāyā devaśatruśca dānavaḥ //
śaṅkhacūḍābhidhasso'ti daityapakṣī suraduhaḥ

tena nissāritā devāssendrā nityaṃ prapīḍitāḥ //
hṛtādhikārā vikṛtāssarve yātā diśo daśa

brahmācyutau tadarthe hī hāgatau śaraṇaṃ mama //
teṣāṃ kleśavinirmokṣaṃ kariṣye nātra saṃśayaḥ

sanatkumāra uvāca //
ityuktvā śaṃkaraḥ kṛṣṇaṃ punaḥ provāca sādaram//
hariṃ vidhiṃ samābhāṣya vacanaṃ kleśanāśanam

śiva uvāca //
he hare he vidhe prītyā mamedaṃ vacanaṃ śṛṇu //
gacchataṃ tvaritaṃ tātau devānaṃdāya nirbhayam

kailāsavāsinaṃ rudraṃ madrūpaṃ pūrṇamuttamam //
devakāryārthamudbhūtaṃ pṛthagākṛtidhāriṇam

etadarthe hi madrūpaḥ paripūrṇatamaḥ prabhuḥ //
kailāse bhaktavaśatassaṃtiṣṭhati girau hare

mattastvatto na bhedo'sti yuvayossevya eva saḥ //
carācarāṇāṃ sarveṣāṃ surādīnāṃ ca sarvadā

āvayobhedakartā yassa naro narakaṃ vrajet //
ihāpi prāpnuyātkṛṣṭaṃ putrapautravivarjitaḥ

ityuktavaṃtaṃ durgeśaṃ praṇamya ca muhurmuhuḥ //
rādhayā sahitaḥ kṛṣṇaḥ svasthānaṃ sagaṇo yayau

harirbrahmā ca tau vyāsa sānandau gatasādhvasau //
muhurmuhuḥ praṇamyeśaṃ vaikuṃṭhaṃ yayaturdrutam

tatrāgatyākhilaṃ vṛttaṃ devebhyo vinivedya tau //
tānādāya brahmaviṣṇū kailāsaṃ yayaturgirim

tatra dṛṣṭvā maheśānaṃ pārvatīvallabhaṃ prabhum //
dīnarakṣāttadehaṃ ca saguṇaṃ devanāyakam

tuṣṭuvuḥ pūrvavatsarve bhaktyā gadgadayā girā //
karau baddhvā nataskaṃdhā vinayena samanvitāḥ

devā ūcuḥ //
devadeva mahādeva girijānātha śaṃkara //
vayaṃ tvāṃ śaraṇāpannā rakṣa devānbhayākulān

śaṃkhacūḍadānavendraṃ jahi devaniṣūdanam //
tena viklāvitā devāḥ saṃgrāme ca parājitāḥ

hṛtādhikārāḥ kutale vicaraṃti yathā narāḥ //
devaloko hi durdṛśyasteṣāmāsīcca tadbhayāt

dīnoddhara kṛpāsindho devānuddhara saṃkaṭāt //
śakraṃ bhayānmaheśānahatvā taṃ dānavādhipam

iti śrutvā vacaśśaṃbhurdevānāṃ bhaktavatsalaḥ //
uvāca vihasan vāṇyā meghanādagabhīrayā

śrīśaṃkara uvāca //
he hare he vidhe devāḥ svasthānaṃ gacchata dhuvam //
śaṃkhacūḍaṃ vadhiṣyāmi sagaṇaṃ nātra saṃśayaḥ

sanatkumāra uvāca //
ityākarṇya maheśasya vacaḥ pīyūṣasaṃnibham //
te sarve pramudā hyāsannaṣṭaṃ matvā ca dānavam

harirjagāma vaikuṃṭhaṃ satyaloke vidhistadā //
praṇipatya maheśaṃ ca surādyāḥ svapadaṃ yayuḥ

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṃkhacūḍavadhe śivopadeśo nāmaikatriṃśo'dhyāyaḥ