Shiva Purana · Chapter 2.5.30

sanatkumāra uvāca //
gatvā tadaiva sa vidhistadā vyāsa rameśvaraḥ//
śivalokaṃ mahādivyaṃ nirādhāramabhautikam

sāhlādobhyantaraṃ viṣṇurjagāma muditānanaḥ //
nānāratnaparikṣiptaṃ vilasaṃtaṃ mahojjvalam

saṃprāpya prathamadvāraṃ vicitraṃ gaṇasevitam //
śobhitaṃ parayā lakṣmyā mahoccamatisundaram

dadarśa dvārapālāṃśca ratnasiṃhāsanasthitān //
śobhitāñśvetavastraiśca ratnabhūṣaṇabhūṣitān

pañcavaktratrinayanāngaurasundaravigrahān //
triśūlādidharānvīrānbhasmarudrākṣaśobhitān

sabrahmāpi rameśaśca tān praṇamya vinamrakaḥ //
kathayāmāsa vṛttāntaṃ prabhusaṃdarśanārthakam

tadājñāṃ ca dadustasmai praviveśa tadājñayā //
paraṃ dvāraṃ mahāramyaṃ vicitraṃ parama prabham

prabhūpakaṃṭhagatyarthaṃ vṛttāṃtaṃ saṃnyavedayat //
taddvārapāya cājñaptastenānyaṃ praviveśa ha

evaṃ paṃcadaśadvārānpraviśya kamalodbhavaḥ //
mahādvāraṃ gatastatra nandinaṃ pradadarśa ha

samyaṅnatvā ca taṃ stutvā pūrvavattena nandinā//
ājñaptaśca śanairviṣṇurviveśābhyaṃtaraṃ mudā

dadarśa gatvā tatroccaissabhāṃ śaṃbhossamutprabhām //
tāṃ pārṣadaiḥ parivṛtāṃ lasaddehaissubhūṣitām

maheśvarasya rūpaiśca digbhujaiśśubhakāṃtibhiḥ //
pañcavaktraistrinayanaiśśitikaṃṭhamahojjvalaiḥ

sadratnayuktarudrākṣabhasmābharaṇabhūṣitaiḥ //
navendumaṃḍalākārāṃ caturasrāṃ manoharām

maṇīndrahāranirmāṇahīrasārasuśobhitām //
amūlyaratnaracitāṃ padmapatraiśca śobhitām

māṇikyajālamālābhirnānācitravicitritām //
padmarāgendraracitāmadbhutāṃ śaṃkarecchayā

sopānaśatakairyuktāṃ syamaṃtakavinirmitaiḥ //
svarṇasūtragranthiyuktaiścārucandanapallavaiḥ

indranīlamaṇistaṃbhairveṣṭitāṃ sumanoharām //
susaṃskṛtāṃ ca sarvatra vāsitāṃ gaṃdhavāyunā

sahasrayojanāyāmāṃ supūrṇāṃ bahukiṃkaraiḥ //
dadarśa śaṃkaraṃ sāṃbaṃ tatra viṣṇussureśvaraḥ

vasaṃtaṃ madhyadeśe ca yathendutārakāvṛtam //
amūlyaratnanirmāṇacitrasiṃhāsanasthitam

kirīṭinaṃ kuṃḍalinaṃ ratnamālāvibhūṣitam //
bhasmoddhūlitasarvāṅgaṃ bibhrataṃ kelipaṃkajam

purato gītanṛtyaśca paśyaṃtaṃ sasmitaṃ mudā

śāṃtaṃ prasannamanasamumākāṃtaṃ mahollasam //
devyā pradatta tāmbūlaṃ bhuktavaṃtaṃ suvāsitam

gaṇaiśca parayā bhaktyā sevitaṃ śvetacāmaraiḥ //
stūyamānaṃ ca siddhaiśca bhaktinamrātmakaṃdharaiḥ

guṇātītaṃ pareśānaṃ tridevajanakaṃ vibhum //
nirvikalpaṃ nirākāraṃ sākāraṃ svecchayā śivam

amāyamajamādyañca māyādhīśaṃ parātparam //
prakṛteḥ puruṣasyāpi paramaṃ svaprabhuṃ sadā

evaṃ viśiṣṭaṃ taṃ dṛṣṭvā paripūrṇatamaṃ samam //
viṣṇurbrahmā tuṣṭuvatuḥ praṇamya sukṛtāṃjalī

viṣṇuvidhī ūcatuḥ //
devadeva mahādeva parabrahmākhileśvara //
triguṇātīta nirvyagra tridevajanaka prabho

vayaṃ te śaraṇāpannā rakṣasmāndukhitānvibho //
śaṃkhacūḍārditānkliṣṭānsannāthānparameśvara

ayaṃ yo'dhiṣṭhito loko goloka iti sa smṛtaḥ //
adhiṣṭhātā tasya vibhuḥ kṛṣṇo'yaṃ tvadadhiṣṭhitaḥ

pārṣadapravarastasya sudāmā daivayaṃtritaḥ //
rādhāśapto babhūvātha śaṃkhacūḍaśca dānavaḥ

tena nissāritāḥ śaṃbho pīḍyamānāḥ samaṃtataḥ //
hṛtādhikārastridaśā vicaraṃti mahītale

tvāṃ vinā na sa vadhyaśca sarveṣāṃ tridivaukasām //
taṃ ghātaya maheśāna lokānāṃ sukhamāvaha

tvameva nirguṇassatyo'naṃto'naṃtaparākramaḥ //
saguṇaśca sanniveśaḥ prakṛteḥ puruṣātparaḥ

rajasā sṛṣṭisamaye tvaṃ brahmā sṛṣṭikṛtprabho //
sattvena pālane viṣṇustribhuvāvana kārakaḥ

tamasā pralaye rudro jagatsaṃhārakārakaḥ //
nistraiguṇye śivākhyātasturyyo jyotiḥ svarūpakaḥ

tvaṃ dīkṣayā ca goloke tvaṃ gavāṃ paripālakaḥ//
tvadgośālāmadhyagaśca kṛṣṇaḥ krīḍatyaharniśam

tvaṃ sarvakāraṇaṃ svāmī vidhi viṣṇvīśvaraḥ param //
nirvikārī sadā sākṣī paramātmā pareśvaraḥ

dīnānāthasahāyī ca dīnānāṃ pratipālakaḥ //
dīnabaṃdhustrilokeśaśśaraṇāgatavatsalaḥ

asmānuddhara gaurīśa prasīda parameśvaraḥ //
tvadadhīnā vayaṃ nātha yadicchasi tathā kuru

sanatkumāra uvāca //
ityuktvā tau surau vyāsa harirbrahmā ca vai tadā//
virematuḥ śivaṃ natvā karau baddhvā vinītakau

iti śrīśiva mahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe śaṃkhacūḍavadhe devadevastutirnāma triṃśo'dhyāyaḥ