Shiva Purana · Chapter 2.5.29

sanatkumāra uvāca //
svagehamāgate tasmiñśaṃkhacūḍe vivāhite//
tapaḥ kṛtvā varaṃ prāpya mumudurdānavādayaḥ

svalokādāśu nirgatya guruṇā svena saṃyutāḥ //
sarve surāssaṃmilitāssamājagmustadaṃtikam

praṇamya taṃ savinayaṃ saṃstutya vividhādarāt //
sthitāstatraiva suprītyā matvā tejasvinaṃ vibhum

sopi dambhātmajo dṛṣṭvā gataṃ kula guruṃ ca tam //
praṇanāma mahābhaktyā sāṣṭāṃgaṃ paramādarāt

atha śukraḥ kulācāryo dṛṣṭvāśiṣamanuttamam //
vṛttāṃtaṃ kathayāmāsa devadānavayostadā

svābhāvikaṃ ca tadvairamasurāṇāṃ parābhavam //
vijayaṃ nirjarāṇāṃ ca jīvasāhāyyameva ca

tatassa sammataṃ kṛtvā suraissarvaissamutsavam //
dānavādyasurāṇāṃ tamadhipaṃ vidadhe guruḥ

tadā samutsavo jāto'surāṇāṃ muditātmanām //
upāyanāni suprītyā dadustasmai ca te'khilāḥ

atha dambhātmajo vīraśśaṃkhacūḍaḥ pratāpavān//
rājyābhiṣekamāsādya sa reje surarāṭ tadā

sa senāṃ mahatīṃ karṣandaityadānavarakṣasām //
rathamāsthāya tarasā jetuṃ śakrapurīṃ yayau

gacchansa dānavendrastu teṣāṃ sevanakurvatām //
vireje śaśivadbhānāṃ grahāṇāṃ graharāḍiva

āgacchaṃtaṃ śaṅkhacūḍamākarṇyākhaṇḍalassvarāṭ //
nikhilairamaraissārddhaṃ tena yoddhuṃ samudyataḥ

tadā'suraissurāṇāṃ ca saṃgrāmastumulo hyabhūt //
vīrā''nandakaraḥ klībabhayado romaharṣaṇaḥ

mahānkolāhalo jāto vīrāṇāṃ garjatāṃ raṇe //
vādyadhvanistathā cā''sīttatra vīratvavarddhinī

devāḥ prakupya yuyudhurasurairbalavattarāḥ //
parājayaṃ ca saṃprāpurasurā dudruvurbhayāt

palāyamānāstāndṛṣṭvā śaṃkhacūḍassvayaṃ prabhuḥ //
yuyudhe nirjaraissākaṃ siṃhanādaṃ pragarjya ca

tarasā sahasā cakre kadanaṃ tridivaukasām //
pradudruvussurāssarve tatsutejo na sehire

yatra tatra sthitā dīnā girīṇāṃ kaṃdarāsu ca //
tadadhīnā na svataṃtrā niṣprabhāḥ sāgarā yathā

sopi daṃbhātmajaśśūro dānavendraḥ pratāpavān //
surādhikārānsaṃjahre sarvām̐llokānvijitya ca

trailokyaṃ svavaśaṃcakre yajñabhāgāṃśca kṛtsnaśaḥ //
svayamindro babhūvāpi śāsitaṃ nikhilaṃ jagat

kauberamaindavaṃ sauryamāgneyaṃ yāmyameva ca //
kārayāmāsa vāyavyamadhikāraṃ svaśaktitaḥ

devānāmasurāṇāṃ ca dānavānāṃ ca rakṣasām //
gaṃdharvāṇāṃ ca nāgānāṃ kinnarāṇāṃ rasaukasām

trilokasya pareṣāṃ ca sakalānāmadhīśvaraḥ //
sa babhūva mahāvīraśśaṃkhacūḍo mahābalī

evaṃ sa bubhuje rājyaṃ rājarājeśvaro mahān //
sarveṣāṃ bhuvanānāṃ ca śaṃkhacūḍaściraṃ samāḥ

tasya rājye na durbhikṣaṃ na mārī nā'śubhagrahāḥ //
ādhayo vyādhayo naiva sukhinyaśca prajāḥ sadā

akṛṣṭapacyā pṛthivī dadau sasyānyanekaśaḥ //
oṣadhyo vividhāścāsansaphalāssarasāḥ sadā

maṇyākarāśca nitarāṃ ratnakhanyaśca sāgarāḥ//
sadā puṣpaphalā vṛkṣā nadyastu salilāvahāḥ

devān vinākhilā jīvāssukhino nirvikārakāḥ //
svasvadharmā sthitāssarve caturvarṇāśramāḥ pare

tasmicchāsati trailokye na kaścid duḥkhito'bhavat //
bhrātṛvairatvamāśritya kevalaṃ duḥkhino'marāḥ

sa śaṃkhacūḍaḥ prabalaḥ kṛṣṇasya paramassakhā //
kṛṣṇabhaktiratassādhussadā golokavāsinaḥ

pūrvaśāpaprabhāveṇa dānavīṃ yonimāśritaḥ //
na dānavamatissobhūddānavatve'pi vai mune

tatassuragaṇāssarve hṛtarājyā parājitāḥ //
saṃmaṃtrya sarṣayastāta prayayurbrahmaṇassabhām

tatra dṛṣṭvā vidhātāraṃ natvā stutvā viśeṣataḥ //
brahmaṇe kathayāmāsussarvaṃ vṛttāṃtamākulāḥ

brahmā tadā samāśvāsya surān sarvānmunīnapi //
taiśca sārddhaṃ yayau loke vaikuṇṭhaṃ sukhadaṃ satām

dadarśa tatra lakṣmīśaṃ brahmā devagaṇaissaha //
kirīṭinaṃ kuṃḍalinaṃ vanamālāvibhūṣitam

śaṃkhacakragadāpadmadharaṃ devaṃ caturbhujam //
sanaṃdanādyaiḥ siddhaiśca sevitaṃ pītavāsasam

dṛṣṭvā viṣṇuṃ surāssarve brahmādyāssamunīśvarāḥ //
praṇamya tuṣṭuvurbhaktyā baddhāñjalikarā vibhum

devā ūcu //
devadeva jagannātha vaikuṃṭhādhipate prabho //
rakṣāsmāñśaraṇāpannāñchrīhare trijagadguro

tvameva jagatāṃ pātā trilokeśācyuta prabho //
lakṣmīnivāsa govinda bhaktaprāṇa namo'stu te

iti stutvā surāssarve ruruduḥ purato hareḥ //
tacchrutvā bhagavānviṣṇurbrahmāṇamidamabravīt

viṣṇuruvāca //
kimarthamāgatosi tvaṃ vaikuṃṭhaṃ yogidurlabham //
kiṃ kaṣṭaṃ te samudbhūtaṃ tattvaṃ vada mamāgrataḥ

sanatkumāra uvāca //
iti śrutvā harervākyaṃ praṇamya ca muhurmuhuḥ //
baddhāñjalipuṭo bhūtvā vina yānatakandharaḥ

vṛttāṃtaṃ kathayāmāsa śaṃkhacūḍakṛtaṃ tadā //
devakaṣṭasamākhyānaṃ puro viṣṇoḥ parātmanaḥ

haristadvacanaṃ śrutvā sarvatasarvabhāvavit //
prahasyovāca bhagavāṃstadrahasyaṃ vidhiṃ prati

śrībhagavānuvāca //
śaṃkhacūḍasya vṛttāṃtaṃ sarvaṃ jānāmi padmaja //
madbhaktasya ca gopasya mahātejasvinaḥ purā

/
śṛṇutassarvavṛttāntamitihāsaṃ purātanam //
saṃdeho naiva kartavyaśśaṃ kariṣyati śaṅkaraḥ

sarvopari ca yasyāsti śivalokaḥ parātparaḥ //
yatra saṃrājate śaṃbhuḥ parabrahma parameśvaraḥ

prakṛteḥ puruṣasyāpi yodhiṣṭhātā triśaktidhṛk //
nirguṇassaguṇassopi paraṃ jyotiḥ svarūpavān

yasyāṃgajāstu vai brahmaṃstrayassṛṣṭyādikārakāḥ //
sattvādiguṇasaṃpannā viṣṇubrahmaharābhidhāḥ

sa eva paramātmā hi viharatyumayā saha //
yatra māyāvinirmukto nityānitya prakalpakaḥ

tatsamīpe ca goloko gośālā śaṃkarasya vai //
tasyecchayā ca madrūpaḥ kṛṣṇo vasati tatra ha

tadgavāṃ rakṣaṇārthāya tenājñaptassadā sukhī//
tatsaṃprāptasukhassopi saṃkrīḍati vihāravit

tasya nārī samākhyātā rādheti jagadambikā//
prakṛteḥ paramā mūrtiḥ paṃcamī suvihāriṇī

bahugopāśca gopyaśca tatra saṃti tadaṃgajāḥ //
suvihāraparā nityaṃ rādhākṛṣṇānuvartinaḥ

sa eva līlayā śaṃbhoridānīṃ mohito'nayā //
saṃprāpto dānavīṃ yoniṃ mudhā śāpātsvaduḥkhadām

rudraśūlena tanmṛtyu kṛṣṇena vihitaḥ purā//
tatassvadehamutsṛjya pārṣadassa bhaviṣyati

iti vijñāya deveśa na bhayaṃ kartumarhasi//
śaṃkara śaraṇaṃ yāvassa sadyaśśaṃvidhāsyati

ahaṃ tvaṃ cāmarāssarve tiṣṭhaṃtīha visādhvasāḥ

sanatkumāra uvāca //
ityuktvā savidhirviṣṇuḥ śivalokaṃ jagāma ha //
saṃsmaranmanasā śaṃbhuṃ sarveśaṃ bhaktavatsalam

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe śaṃkhacūḍavadhopākhyāne śaṃkhacūḍarājyakaraṇavarṇanapūrvaka tatpūrvabhavavṛttacaritravarṇanaṃ nāmaikonatriṃśo'dhyāyaḥ