શિવ પુરાણ · અધ્યાય 2.5.30

સનત્કુમાર ઉવાચ ॥
ગત્વા તદૈવ સ વિધિસ્તદા વ્યાસ રમેશ્વરઃ॥
શિવલોકં મહાદિવ્યં નિરાધારમભૌતિકમ્

સાહ્લાદોભ્યન્તરં વિષ્ણુર્જગામ મુદિતાનનઃ ॥
નાનારત્નપરિક્ષિપ્તં વિલસંતં મહોજ્જ્વલમ્

સંપ્રાપ્ય પ્રથમદ્વારં વિચિત્રં ગણસેવિતમ્ ॥
શોભિતં પરયા લક્ષ્મ્યા મહોચ્ચમતિસુન્દરમ્

દદર્શ દ્વારપાલાંશ્ચ રત્નસિંહાસનસ્થિતાન્ ॥
શોભિતાઞ્શ્વેતવસ્ત્રૈશ્ચ રત્નભૂષણભૂષિતાન્

પઞ્ચવક્ત્રત્રિનયનાન્ગૌરસુન્દરવિગ્રહાન્ ॥
ત્રિશૂલાદિધરાન્વીરાન્ભસ્મરુદ્રાક્ષશોભિતાન્

સબ્રહ્માપિ રમેશશ્ચ તાન્ પ્રણમ્ય વિનમ્રકઃ ॥
કથયામાસ વૃત્તાન્તં પ્રભુસંદર્શનાર્થકમ્

તદાજ્ઞાં ચ દદુસ્તસ્મૈ પ્રવિવેશ તદાજ્ઞયા ॥
પરં દ્વારં મહારમ્યં વિચિત્રં પરમ પ્રભમ્

પ્રભૂપકંઠગત્યર્થં વૃત્તાંતં સંન્યવેદયત્ ॥
તદ્દ્વારપાય ચાજ્ઞપ્તસ્તેનાન્યં પ્રવિવેશ હ

એવં પંચદશદ્વારાન્પ્રવિશ્ય કમલોદ્ભવઃ ॥
મહાદ્વારં ગતસ્તત્ર નન્દિનં પ્રદદર્શ હ

સમ્યઙ્નત્વા ચ તં સ્તુત્વા પૂર્વવત્તેન નન્દિના॥
આજ્ઞપ્તશ્ચ શનૈર્વિષ્ણુર્વિવેશાભ્યંતરં મુદા

દદર્શ ગત્વા તત્રોચ્ચૈસ્સભાં શંભોસ્સમુત્પ્રભામ્ ॥
તાં પાર્ષદૈઃ પરિવૃતાં લસદ્દેહૈસ્સુભૂષિતામ્

મહેશ્વરસ્ય રૂપૈશ્ચ દિગ્ભુજૈશ્શુભકાંતિભિઃ ॥
પઞ્ચવક્ત્રૈસ્ત્રિનયનૈશ્શિતિકંઠમહોજ્જ્વલૈઃ

સદ્રત્નયુક્તરુદ્રાક્ષભસ્માભરણભૂષિતૈઃ ॥
નવેન્દુમંડલાકારાં ચતુરસ્રાં મનોહરામ્

મણીન્દ્રહારનિર્માણહીરસારસુશોભિતામ્ ॥
અમૂલ્યરત્નરચિતાં પદ્મપત્રૈશ્ચ શોભિતામ્

માણિક્યજાલમાલાભિર્નાનાચિત્રવિચિત્રિતામ્ ॥
પદ્મરાગેન્દ્રરચિતામદ્ભુતાં શંકરેચ્છયા

સોપાનશતકૈર્યુક્તાં સ્યમંતકવિનિર્મિતૈઃ ॥
સ્વર્ણસૂત્રગ્રન્થિયુક્તૈશ્ચારુચન્દનપલ્લવૈઃ

ઇન્દ્રનીલમણિસ્તંભૈર્વેષ્ટિતાં સુમનોહરામ્ ॥
સુસંસ્કૃતાં ચ સર્વત્ર વાસિતાં ગંધવાયુના

સહસ્રયોજનાયામાં સુપૂર્ણાં બહુકિંકરૈઃ ॥
દદર્શ શંકરં સાંબં તત્ર વિષ્ણુસ્સુરેશ્વરઃ

વસંતં મધ્યદેશે ચ યથેન્દુતારકાવૃતમ્ ॥
અમૂલ્યરત્નનિર્માણચિત્રસિંહાસનસ્થિતમ્

કિરીટિનં કુંડલિનં રત્નમાલાવિભૂષિતમ્ ॥
ભસ્મોદ્ધૂલિતસર્વાઙ્ગં બિભ્રતં કેલિપંકજમ્

પુરતો ગીતનૃત્યશ્ચ પશ્યંતં સસ્મિતં મુદા

શાંતં પ્રસન્નમનસમુમાકાંતં મહોલ્લસમ્ ॥
દેવ્યા પ્રદત્ત તામ્બૂલં ભુક્તવંતં સુવાસિતમ્

ગણૈશ્ચ પરયા ભક્ત્યા સેવિતં શ્વેતચામરૈઃ ॥
સ્તૂયમાનં ચ સિદ્ધૈશ્ચ ભક્તિનમ્રાત્મકંધરૈઃ

ગુણાતીતં પરેશાનં ત્રિદેવજનકં વિભુમ્ ॥
નિર્વિકલ્પં નિરાકારં સાકારં સ્વેચ્છયા શિવમ્

અમાયમજમાદ્યઞ્ચ માયાધીશં પરાત્પરમ્ ॥
પ્રકૃતેઃ પુરુષસ્યાપિ પરમં સ્વપ્રભું સદા

એવં વિશિષ્ટં તં દૃષ્ટ્વા પરિપૂર્ણતમં સમમ્ ॥
વિષ્ણુર્બ્રહ્મા તુષ્ટુવતુઃ પ્રણમ્ય સુકૃતાંજલી

વિષ્ણુવિધી ઊચતુઃ ॥
દેવદેવ મહાદેવ પરબ્રહ્માખિલેશ્વર ॥
ત્રિગુણાતીત નિર્વ્યગ્ર ત્રિદેવજનક પ્રભો

વયં તે શરણાપન્ના રક્ષસ્માન્દુખિતાન્વિભો ॥
શંખચૂડાર્દિતાન્ક્લિષ્ટાન્સન્નાથાન્પરમેશ્વર

અયં યોઽધિષ્ઠિતો લોકો ગોલોક ઇતિ સ સ્મૃતઃ ॥
અધિષ્ઠાતા તસ્ય વિભુઃ કૃષ્ણોઽયં ત્વદધિષ્ઠિતઃ

પાર્ષદપ્રવરસ્તસ્ય સુદામા દૈવયંત્રિતઃ ॥
રાધાશપ્તો બભૂવાથ શંખચૂડશ્ચ દાનવઃ

તેન નિસ્સારિતાઃ શંભો પીડ્યમાનાઃ સમંતતઃ ॥
હૃતાધિકારસ્ત્રિદશા વિચરંતિ મહીતલે

ત્વાં વિના ન સ વધ્યશ્ચ સર્વેષાં ત્રિદિવૌકસામ્ ॥
તં ઘાતય મહેશાન લોકાનાં સુખમાવહ

ત્વમેવ નિર્ગુણસ્સત્યોઽનંતોઽનંતપરાક્રમઃ ॥
સગુણશ્ચ સન્નિવેશઃ પ્રકૃતેઃ પુરુષાત્પરઃ

રજસા સૃષ્ટિસમયે ત્વં બ્રહ્મા સૃષ્ટિકૃત્પ્રભો ॥
સત્ત્વેન પાલને વિષ્ણુસ્ત્રિભુવાવન કારકઃ

તમસા પ્રલયે રુદ્રો જગત્સંહારકારકઃ ॥
નિસ્ત્રૈગુણ્યે શિવાખ્યાતસ્તુર્ય્યો જ્યોતિઃ સ્વરૂપકઃ

ત્વં દીક્ષયા ચ ગોલોકે ત્વં ગવાં પરિપાલકઃ॥
ત્વદ્ગોશાલામધ્યગશ્ચ કૃષ્ણઃ ક્રીડત્યહર્નિશમ્

ત્વં સર્વકારણં સ્વામી વિધિ વિષ્ણ્વીશ્વરઃ પરમ્ ॥
નિર્વિકારી સદા સાક્ષી પરમાત્મા પરેશ્વરઃ

દીનાનાથસહાયી ચ દીનાનાં પ્રતિપાલકઃ ॥
દીનબંધુસ્ત્રિલોકેશશ્શરણાગતવત્સલઃ

અસ્માનુદ્ધર ગૌરીશ પ્રસીદ પરમેશ્વરઃ ॥
ત્વદધીના વયં નાથ યદિચ્છસિ તથા કુરુ

સનત્કુમાર ઉવાચ ॥
ઇત્યુક્ત્વા તૌ સુરૌ વ્યાસ હરિર્બ્રહ્મા ચ વૈ તદા॥
વિરેમતુઃ શિવં નત્વા કરૌ બદ્ધ્વા વિનીતકૌ

ઇતિ શ્રીશિવ મહાપુરાણે દ્વિતીયાયાં રુદ્રસંહિતાયાં પઞ્ચમે યુદ્ધખંડે શંખચૂડવધે દેવદેવસ્તુતિર્નામ ત્રિંશોઽધ્યાયઃ