Shiva Purana · Chapter 2.5.21

sanatkumāra uvāca //
te gaṇādhipatīndṛṣṭvā nandībhamukhaṣaṇmukhān//
amarṣādabhyadhāvaṃta dvaṃdvayuddhāya dānavāḥ

nandinaṃ kālanemiśca śuṃbho laṃbodaraṃ tathā //
niśuṃbhaḥ ṣaṇmukhaṃ devamabhyadhāvata śaṃkitaḥ

niśuṃbhaḥ kārtikeyasya mayūraṃ paṃcabhiśśaraiḥ //
hṛdi vivyādha vegena mūrchitassa papāta ha

tataḥ śaktidharaḥ kruddho bāṇaiḥ paṃcabhireva ca //
vivyādha syaṃdane tasya hayānyantārameva ca

śareṇānyena tīkṣṇena niśuṃbhaṃ devavairiṇam //
jaghāna tarasā vīro jagarja raṇadurmadaḥ

asuro'pi niśuṃbhākhyo mahāvīro'tivīryavān //
jaghāna kārtikeyaṃ taṃ garjaṃtaṃ sveṣuṇā raṇe

tataśśaktiṃ kārtikeyo yāvajagrāha roṣataḥ //
tāvanniśuṃbho vegena svaśaktyā tamapātayat

evaṃ babhūva tatraiva kārtikeyaniśuṃbhayoḥ //
āhavo hi mahānvyāsa vīraśabdaṃ pragarjatoḥ

tato nandīśvaro bāṇaiḥ kālanemimavidhyata //
saptabhiśca hayānketuṃ rathaṃ sārathimācchinat

kālanemiśca saṃkuddho dhanuściccheda naṃdinaḥ //
svaśarāsananirmuktairmahātīkṣṇaiśśilīmukhaiḥ

atha nandīśvaro vīraḥ kālanemiṃ mahāsuram //
tamapāsya ca śūlena vakṣasyabhyahanaddṛḍham

sa śūlabhinnahṛdayo hatāśvo hatasārathiḥ //
adreḥ śikharamutpāṭya nandinaṃ samatāḍayat

atha śuṃbho gaṇeśaśca rathamūṣaka vāhanau //
yudhyamānau śaravrātaiḥ parasparamavidhyatām

gaṇeśastu tadā śuṃbhaṃ hṛdi vivyādha patriṇā //
sārathiṃ ca tribhirbāṇaiḥ pātayāmāsa bhūtale

tato'tikruddhaśśuṃbho'pi bāṇadṛṣṭyā gaṇādhipam //
mūṣakaṃ ca tribhirviddhvā nanāda jaladasvanaḥ

mūṣakaśśarabhinnāṅgaścacāla dṛḍhavedanaḥ //
lambodaraśca patitaḥ padātirabhavatsa hi

tato lambodaraśśuṃbhaṃ hatvā paraśunā hṛdi //
apātayattadā bhūmau mūṣakaṃ cāruroha saḥ

samarāyodyataścābhūtpunargajamukho vibhuḥ //
prahasya jaghnatuḥ krodhāttotreṇaiva mahādvipam

kālanemirniśuṃbhaśca hyubhau laṃbodaraṃ śaraiḥ //
yugapaccakhnatuḥ krodhādāśīviṣasamairdrutam

taṃ pīḍyamānamālokya vīrabhadro mahābalaḥ //
abhyadhāvata vegena koṭibhūtayutastathā

kūṣmāṃḍā bhairavāścāpi vetālā yoginīgaṇāḥ //
piśācā ḍākinīsaṃghā gaṇāścāpi samaṃ yayuḥ

tataḥ kilakilā śabdaissiṃhanādaiśsaghargharaiḥ //
vināditā ḍamarukaiḥ pṛthivī samakaṃpata

tato bhūtāḥ pradhāvaṃto bhakṣayaṃti sma dānavān //
utpatya pātayaṃti sma nanṛtuśca raṇāṃgaṇe

etasminnaṃtare vyāsābhūtāṃ nandīguhaśca tau//
utthitāvāptasaṃjñau hi jagarjaturalaṃ raṇe

sa nandī kārtikeyaśca samāyātau tvarānvitau//
jaghnatuśca raṇe daityānniraṃtaraśaravrajaiḥ//
chinnairbhinnairhatairdaityaiḥ patitairbhakṣitaistathā //
vyākulā sābhavatsenā viṣaṇṇavadanā tadā

evaṃ nandī kārtikeyo vikaṭaśca pratāpavān //
vīrabhadro gaṇāścānye jagarjussamare'dhikam

niśuṃbhaśuṃbhau senānyau sindhuputrasya tau tathā //
kālanemirmahādaityo'surāścānye parājitāḥ

pravidhvastāṃ tatassenāṃ dṛṣṭvā sāgaranandanaḥ //
rathenātipatākena gaṇānabhiyayau balī

tataḥ parājitā daityā apyabhūvanmahotsavāḥ //
jagarjuradhikaṃ vyāsa samarāyodyatāstadā

sarve rudragaṇāścāpi jagarjurjayaśālinaḥ //
nandikārtikadaṃtyāsyavīrabhadrādikā mune

hastyaśvarathasaṃhrādaśśaṃkhabherīravastathā //
abhavatsiṃhanādaśca senayorubhayostathā

jalaṃdharaśaravrātairnīhārapaṭalairiva //
dyāvāpṛthivyorācchannamaṃtaraṃ samapadyata

śailādiṃ paṃcabhirviddhvā gaṇeśaṃ paṃcabhiśśaraiḥ //
vīrabhadraṃ ca viṃśatyā nanāda jaladasvanaḥ

kārtikeyastato daityaṃ śaktyā vivyādha satvaram //
jalaṃdharaṃ mahāvīro rudraputro nanāda ca

sa pūrṇanayano daityaḥ śaktinirbhinnadehakaḥ //
papāta bhūmau tvaritamudatiṣṭhanmahābalaḥ

tataḥ krodhaparītātmā kārtikeyaṃ jalaṃdharaḥ //
gadayā tāḍayāmāsa hṛdaye daityapuṃgavaḥ

gadāprabhāvaṃ saphalaṃ darśayanśaṃkarātmajaḥ //
vidhidattavarādvyāsa sa tūrṇaṃ bhūtale'patat

tathaiva naṃdī hyapatadbhūtale gadayā hataḥ //
mahāvīro'pi ripuhā kiṃcidvyākulamānasaḥ

tato gaṇeśvaraḥ kruddhassmṛtvā śivapadāmbujam //
saṃprāpyātibalo daitya gadāṃ paraśunācchinat

vīrabhadrastribhirbāṇairhṛdi vivyādha dānavam //
saptabhiśca hayānketuṃ dhanuśchatraṃ ca cicchide

tato'tikruddho daityendraśśaktimudyamya dāruṇām //
gaṇeśaṃ pātayāmāsa rathamanyaṃ samāruhat

abhyagādatha vegena sa daityendro mahābalaḥ //
vigaṇayya hṛdā taṃ vai vīrabhadraṃ ruṣānvitaḥ

vīrabhadraṃ jaghānāśu tīkṣṇenāśīviṣeṇa tam //
nanāda ca mahāvīro daityarājo jalaṃdharaḥ

vīrabhadro'pi saṃkuddhassitadhāreṇa ceṣuṇā //
ciccheda taccharaṃ caiva vivyādha maheṣuṇā

tatastau sūryasaṃkāśau yuyudhāte parasparam //
nānāśastraistathāstraiśca ciraṃ vīravarottamau

vīrabhadrastatastasya hayānbāṇairapātayat //
dhanuściccheda rathinaḥ patākāṃ cāpi vegataḥ

atho sa daityarājo hi pupluve parighāyudhaḥ //
vīrabhadropakaṭhaṃ sa drutamāpa mahābalaḥ

parighenātimahatā vīrabhadraṃ jaghāna ha //
sabalo'bdhitanayo mūrdhni vīro jagarja ca

parighenātimahatā bhinnamūrddhā gaṇādhipaḥ //
vīrabhadraḥ papātorvyāṃ mumoca rudhiraṃ bahu

patitaṃ vīrabhadraṃ tu dṛṣṭvā rudragaṇā bhayāt //
apāgacchanraṇaṃ hitvā krośamānā maheśvaram

atha kolāhalaṃ śrutvā gaṇānāṃ candraśekharaḥ //
nijapārśvasthitān vīrānapṛcchadgaṇasattamān

śaṃkara uvāca //
kimarthaṃ madgaṇānāṃ hi mahākolāhalo'bhavat //
vicāryatāṃ mahāvīrāśśāṃtiḥ kāryā mayā dhruvam

yāvatsa deveśo gaṇānpapraccha sādaram //
tāvadgaṇavarāste hi samāyātāḥ prabhuṃ prati

tāndṛṣṭvā vikalānrudraḥ papraccha iti kuśalaṃ prabhuḥ //
yathāvatte gaṇā vṛttaṃ samācakhyuśca vistarāt

tacchrutvā bhagavānudro mahālīlākaraḥ prabhuḥ //
abhayaṃ dattavāṃstebhyo mahotsāhaṃ pravarddhayan

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe jalaṃdharopākhyāne viśe ṣayuddhavarṇanaṃ nāmaikaviṃśatitamo'dhyāyaḥ