Shiva Purana · Chapter 2.5.22

sanatkumāra uvāca //
atha vīragaṇai rudro raudrarūpo mahāprabhuḥ //
abhyagādvṛṣabhārūḍhassaṃgrāmaṃ prahasanniva

rudramāyāṃtamālokya siṃhanādairgaṇāḥ punaḥ //
nivṛttāḥ saṃgare raudrā ye hi pūrvaṃ parājitāḥ

vīra śabdaṃ ca kurvantaste'pyanye śāṃkarā gaṇāḥ //
sotsavāssāyudhā daityānnijaghnuśśaravṛṣṭibhiḥ

daityā hi bhīṣaṇaṃ rudraṃ sarve dṛṣṭvā vidudruvuḥ //
śāṃkaraṃ puruṣaṃ dṛṣṭvā pātakānīva tadbhayāt

atho jalaṃdharo daityānnivṛttānprekṣya saṃgare //
abhyadhāvatsa caṃḍīśaṃ muṃcanbāṇānsahasraśaḥ

niśuṃbhaśuṃbhapramukhā daityendrāśca sahasraśaḥ //
abhijagmuśśivaṃ vegādroṣātsaṃdaṣṭadacchadāḥ

kālanemistathā vīraḥ khaḍgaromā balāhakaḥ //
ghasmaraśca pracaṃḍaścāpare cāpi śivaṃ yayuḥ

bāṇaissaṃchādayāmāsurdrutaṃ rudragaṇāṃśca te //
aṃgāni cicchidurvīrāḥ śuṃbhādyā nikhilā mune

bāṇāṃdhakārasaṃchannaṃ dṛṣṭvā gaṇabalaṃ haraḥ //
tadbāṇajālamācchidya bāṇairāvavṛte nabhaḥ

daityāṃśca bāṇavātyābhiḥ pīḍitānakarottadā //
pracaṃḍabāṇajāloghairapātayata bhūtale

khaḍgaromaśiraḥ kāyāttathā paraśunācchinat //
balāhakasya ca śiraḥ khaṭvāṃgenākaroddvidhā

sa baddhvā ghasmaraṃ daityaṃ pāśenābhyahanadbhuvi //
mahāvīra pracaṃḍaṃ ca cakartta viśikhena ha

vṛṣabheṇa hatāḥ kecitkecidbāṇairnipātitā //
na śekurasurāḥ sthātuṃ gajā siṃhārditā iva

tataḥ krodhaparītātmā daityāndhikkṛtavānraṇe //
śuṃbhādikānmahādaityaḥ prahasanprāha dhairyavān

jalaṃdhara uvāca //
kiṃ va uccaritairmāturdhāvadbhiḥ pṛṣṭhato hataiḥ //
na hi bhītavadhaḥ ślāghyaḥ svargadaḥ śūramāninām

yadi vaḥ pradhane śradā sāro vā kṣullakā hṛdi //
agre tiṣṭhata mātraṃ me na cedgrāmyasukhe spṛhā

raṇe mṛtyurvaraścāsti sarvakāmaphalapradaḥ //
yaśaḥprado viśeṣeṇa mokṣado'pi prakīrttitaḥ

sūryasya maṃḍalaṃ bhittvā yāyādvai paramaṃ padam //
parivrāṭ paramajñānī raṇe yatsaṃmukhe hataḥ

mṛtyorbhayaṃ na kartavyaṃ kadācitkutracidbudhaiḥ//
anirvāryo yato hyeṣa upāyairnikhilairapi

mṛtyurjanmavatāṃ vīrā dehena saha jāyate//
adya vābdaśatāt vā mṛtyurvai prāṇināṃ dhruvaḥ

tanmṛtyubhayamutsārya yudhyadhvaṃ samare mudā //
sarvathā paramānanda ihāmutrāpyasaṃśayaḥ

sanatkumāra uvāca //
ityuktvā bodhayāmāsa svavīrānbahuśassa hi//
dhairyaṃ dadhurna te bhītā palāyaṃta raṇāddrutam

atha dṛṣṭvā svasainyaṃ tatpalāyanaparāyaṇam //
cukrodhāti mahāvīrassiṃdhuputro jalaṃdharaḥ

tataḥ krodhaparītātmā krodhādrudraṃ jalaṃdharaḥ//
āhvāpayāmāsa raṇe tīvrāśanisamasvanaḥ

// jalaṃdhara uvāca //
yuddhyasvādya mayā sārddhaṃ kimebhirnihataistava //
yacca kiñcidbalaṃ te'sti taddarśaya jaṭādhara

sanatkumāra uvāca //
ityuktvā bāṇa saptatyā jaghāna vṛṣabhadhvajam //
jalaṃdharo mahādaityaśśaṃbhumakliṣṭakāriṇam

tānaprāptānmahādevo jalaṃdharaśarāndrutam//
nijairhi niśitairbāṇaiściccheda prahasanniva

tato hayāndhvajaṃ chatraṃ dhanuściccheda saptabhiḥ //
jalaṃdharasya daityasya na taccitraṃ hare mune

sa cchinnadhanvā virathaḥ pāthodhitanayo'suraḥ //
abhyadhāvacchivaṃ kruddho gadāmudyamya vegavān

prabhurgadāṃ ca tatkṣiptāṃ sahasaiva maheśvaraḥ //
pārāśaryaṃ mahālīlo drutaṃ bāṇairdvidhākarot

tathāpi muṣṭimudyamya mahākruddho mahāsuraḥ //
abhyudyayau mahāvegāddrutaṃ taṃ tajjighāṃsayā

tāvadeveśvareṇāśu bāṇoghaissa jalaṃdharaḥ //
akliṣṭakarmakāreṇa krośamātramapākṛtaḥ

tato jalaṃdharo daityo rudraṃ matvā balādhikam //
sasarja māyāṃ gāṃdharvīmadbhutāṃ rudramohinīm

tasya māyāprabhāvāttu gaṃdharvāpsarasāṃ gaṇāḥ //
āvirbhūtā aneke ca rudramohanahetave

tato jaguśca nanṛturgaṃdharvāpsarasāṃ gaṇāḥ//
tālaveṇumṛdaṃgāṃśca vādayantisma cāpare

taddṛṣṭvā mahadāścaryaṃ gaṇai rudro vimohitaḥ //
patitānyapi śastrāṇi karebhyo na viveda saḥ

ekāgrībhūtamālokya rudraṃ daityo jalaṃdharaḥ//
kāmatassa jagāmāśu yatra gaurī sthitā'bhavat

yuddhe śuṃbhaniśuṃbhākhyau sthāpayitvā mahābalau //
daśadordaṇḍapaṃcāsyastrinetraśca jaṭādharaḥ

mahāvṛṣabhamārūḍhassarvathā rudrasaṃnibhaḥ //
āsuryyā māyayā vyāsa sa babhūva jalaṃdharaḥ

atha rudraṃ samāyātamālokya bhavavallabhā //
abhyāyayau sakhīmadhyāttaddarśanapathe'bhavat

yāvaddadarśa cārvaṃgī pārvatīṃ danujeśvaraḥ //
tāvatsa vīryaṃ mumuce jaḍāṃgaścābhavattadā

atha jñātvā tadā gaurī dānavaṃ bhayavihvalā //
jagāmāṃtarhitā vegātsā tadottaramānasam

tāmadṛśya tato daityaḥ kṣaṇādvidyullatāmiva//
javenāgātpunaryoddhuṃ yatra devo maheśvaraḥ

pārvatyapi mahāviṣṇuṃ sasmāra manasā tadā //
tāvaddadarśa taṃ devaṃ sopaviṣṭaṃ samīpagam

taṃ dṛṣṭvā pārvatī viṣṇuṃ jaganmātā śivapriyā //
prasannamanasovāca praṇamaṃtaṃ kṛtāṃjalim

pārvatyuvāca //
viṣṇo jalaṃdharo daityaḥ kṛtavānparamādbhutam //
tatkiṃ na viditaṃ te'sti ceṣṭitaṃ tasya durmateḥ

tacchrutvā jagadambāyā vacanaṃ garuḍadhvajaḥ //
pratyuvāca śivāṃ natvā sāṃjalirnamrakaṃdharaḥ

// śrībhagavānuvāca //
bhavatyāḥ kṛpayā devi tadvṛttaṃ viditaṃ mayā //
yadājñāpaya māṃ mātastatkuryyāṃ tvadanujñayā

sanatkumāra ucāca //
tacchrutvā viṣṇuvacanṃ punarapyāha pārvatī //
hṛṣīkeśaṃ jaganmātā dharmanītiṃ suśikṣayan

pārvatyuvāca //
tenaiva darśitaḥ panthā budhyasva tvaṃ tathaiva hi //
tatstrīpātivrataṃ dharmaṃ bhraṣṭaṃ kuru madājñayā

nānyathā sa mahādaityo bhavedvadhyo rameśvara//
pātivratasamo nānyo dharmo'sti pṛthivītale

sanatkumāra uvāca //
ityanujñāṃ samākarṇya śirasādhāya tāṃ hariḥ //
chala karttuṃ jagāmāśu punarjālaṃdharaṃ puram

iti śrīśivamahāpurāṇe dvitīyāyāṃ rudrasaṃhitāyāṃpañcame yuddhakhaṃḍe jalaṃdharavadhopākhyāne jalaṃdharayuddhavarṇanaṃnāma dvāviṃśo'dhyāyaḥ