Shiva Purana · Chapter 2.5.20

vyāsa uvāca //
sanatkumāra sarvajña kathā te śrāvitādbhutā //
mahāprabhośśaṃkarasya yatra līlā ca pāvanī

idānīṃ brūhi suprītyā kṛpāṃ kṛtvā mamo pari //
rāhurmuktaḥ kutra gataḥ puruṣeṇa mahāmune

sūta uvāca//
ityākarṇya vacastasya vyāsasyāmitamedhasaḥ //
pratyuvāca prasannātmā brahmaputro mahāmuniḥ

sanatkumāra uvāca //
rāhurvimukto yastena sopi tadvarvarasthale //
atassa varvaro bhūta iti bhūmau prathāṃ gataḥ

tataḥ sa manyamānassvaṃ punarjanimathānataḥ //
gatagarvo jagāmātha jalaṃdharapuraṃ śanaiḥ

jalaṃdharāya so'bhyetya sarvamīśaviceṣṭitam //
kathayāmāsa tadvyāsādvyāsa daityeśvarāya vai

sanatkumāra uvāca //
jalaṃdharastu tacchrutvā kopākulitavigrahaḥ //
babhūva balavānsindhuputro daityendrasattamaḥ

tataḥ kopaparādhīnamānaso daityasattamaḥ //
udyogaṃ savasainyānāṃ daityānāmādideśa ha

// jalaṃdhara uvāca //
nirgacchaṃtvakhilā daityāḥ kālanemimukhāḥ khalu //
tathā śuṃbhaniśumbhādyā vīrāssvabalasaṃyutāḥ

koṭirvīrakulotpannāḥ kaṃbuvaṃśyāśca daurhṛdāḥ //
kālakāḥ kālakeyāśca mauryā dhaumrāstathaiva ca

ityājñāpyāsurapatissiṃdhuputro pratāpavān //
nirjagāmāśu daityānāṃ koṭibhiḥ parivāritaḥ

tatastasyāgrataśśukro rāhuśchinnaśiro'bhavat //
mukuṭaścāpatadbhūmau vegātpraskhalitastadā

vyarājata nabhaḥ pūrṇaṃ prāvṛṣīva yathā ghanaiḥ //
jātā aśakunā bhūri mahānidrāvi sūcakāḥ

tasyodyogaṃ tathā dṛṣṭvā gīrvāṇāste savāsavāḥ //
alakṣitāstadā jagmuḥ kailāsaṃ śaṃkarālayam

tatra gatvā śivaṃ dṛṣṭvā supraṇamya savāsavāḥ //
devāssarve nataskaṃdhāḥ karau baddhvā ca tuṣṭuvuḥ

devā ūcuḥ //
devadeva mahādeva karuṇākara śaṃkara //
namastestu maheśāna pāhi naśśaraṇāgatān

vihvalā vayamatyugraṃ jalaṃdharakṛtātprabho //
upadravātsadevendrāḥ sthānabhraṣṭāḥ kṣitisthitāḥ

na jānāsi kathaṃ svāmindevāpattimimāṃ prabho //
tasmānno rakṣaṇārthāya jahi sāgaranandanam

asmākaṃ rakṣaṇārthāya yatpūrvaṃ garuḍadhvajaḥ //
niyojitastvayā nātha na kṣamasso'dya rakṣitum

tadadhīno gṛhe tasya tiṣṭhatyadya mayā saha //
vayaṃ ca tatra tiṣṭhāmastadājñāvaśagāssurāḥ

alakṣitā vayaṃ cātrāgatāśśaṃbho tvadaṃtikam //
sa āyāti tvayā karttuṃ raṇaṃ siṃdhusuto balī

atassvāminraṇe tvaṃ tamavilaṃbaṃ jalaṃdharam //
haṃtumarhasi sarvajña pāhi naśśaraṇāgatān

sanatkumāra uvāca //
ityuktvā te surāssarve prabhuṃ natvā savāsavāḥ //
pādau nirīkṣya saṃtasthurmaheśasya vinamrakāḥ

// sanatkumāra uvāca //
iti devavacaḥ śrutvā prahasya vṛṣabhadhvajaḥ //
drutaṃ viṣṇuṃ samāhūya vacanaṃ cedamabravīt

īśvara uvāca //
hṛṣīkeśa mahāviṣṇo devāścātra samāgatāḥ //
jalaṃdharakṛtāpīḍāśśaraṇaṃ me'tivihvalāḥ

jalaṃdharaḥ kathaṃ viṣṇo saṃgare na hata stvayā //
tadgṛhaṃ cāpi yāto'si tyaktvā vaikuṇṭhamātmanaḥ

mayā niyojitastvaṃ hi sādhusaṃrakṣaṇāya ca //
nigrahāya khalānāṃ ca svataṃtreṇa vihāriṇā

sanatkumāra uvāca //
ityākarṇya maheśasya vacanaṃ garuḍadhvajaḥ //
pratyuvāca vinītātmā natakassāñjalirhariḥ

viṣṇuruvāca //
tavāṃśasaṃbhavatvācca bhrātṛtvācca tathā śriyaḥ //
mayā na nihataḥ saṃkhye tvamenaṃ jahi dānavam

mahābalo mahāvīro jeyassarvadivaukasām //
anyeṣāṃ cāpi deveśa satyametadbravīmyaham

mayā kṛto raṇastena ciraṃ devānvitena vai //
madupāyo na pravṛttastasmindānavapuṃgave

tatparākramatastuṣṭo varaṃ brūhītyahaṃ khalu //
iti madvacanaṃ śrutvā sa vavre varamuttamam

madbhaginyā mayā sārddhaṃ madgehe sasuro vasa //
madadhīno mahāviṣṇo ityahaṃ tadgṛhaṃ gataḥ

sanatkumāra uvāca//
iti viṣṇorvacaśśrutvā śakarassa maheśvaraḥ //
vihasyovāca suprītassadayo bhaktavatsalaḥ

maheśvara uvāca //
he viṣṇo suravarya tvaṃ śṛṇu madvākyamādarāt //
jalaṃdharaṃ mahādaityaṃ haniṣyāmi na saṃśayaḥ

svasthānaṃ gaccha nirbhīto devā gacchaṃtvapi dhruvam //
nirbhayā vītasaṃdehā hataṃ matvā'surādhipam

sanatkumāra uvāca //
iti śrutvā maheśasya vacanaṃ sa ramāpatiḥ //
sanirjaro jagāmāśu svasthānaṃ gatasaṃśayaḥ

etasminnaṃtare vyāsa sa daityendro'tivikramaḥ //
sannaddhairasuraissārddhaṃ śailaprāṃtaṃ yayau balī

kailāsamavarudhyātha mahatyā senayā yutaḥ //
saṃtasthau kālasaṃkāśaḥ kurvansiṃharavaṃ mahān

atha kolāhalaṃ śrutvā daityanādasamudbhavam //
cukrodhātimaheśāno mahālīlaḥ khalāṃtakaḥ // 2.5.20.४०
samādideśa saṃkhyāya svagaṇānsa mahābalān //
naṃdyādikānmahādevo mahotiḥ kautukī haraḥ

nandībhamukhasenānīmukhāssarve śivājñayā //
gaṇāśca samanahyaṃta yuddhāyā titvarānvitāḥ

avaterurgaṇāssarve kailāsātkrodhadurmadāḥ //
valgato raṇaśabdāṃśca mahāvīrā raṇāya hi

tatassamabhavadyuddhaṃ kailāsopatyakāsu vai //
pramathādhipadaityānāṃ ghoraṃ śastrāstrasaṃkulam

bherīmṛdaṃgaśaṃkhaughairnisvānairvīraharṣaṇaiḥ //
gajāśvarathaśabdaiśca nāditā bhūrvyakaṃpata

śaktitomarabāṇaughairmusalaiḥ pāśapaṭṭiśaiḥ //
vyarājata nabhaḥ pūrṇaṃ muktābhiriva saṃvṛtam

nihatairiva nāgāśvaiḥ pattibhirbhūrvyarājata //
vajrāhataiḥ parvatendraiḥ pūrvamāsītsusaṃvṛtā

pramathāhatadaityaughairdaityāhatagaṇaistathā //
vasāsṛṅmāṃsapaṃkāḍhyā bhūragamyābhavattadā

pramathāhatadaityaughānbhārgavassamajīvayat //
yuddhe punaḥ punaścaiva mṛtasaṃjīvanī balāt

dṛṣṭvā vyākulitāṃstāṃstu gaṇāssarve bhayārditāḥ //
śaśaṃsurdevadevāya sarve śukraviceṣṭitam

tacchrutvā bhagavānrudraścakāra krodhamulbaṇam //
bhayaṃkaro'tiraudraśca babhūva prajvalandiśaḥ

atha rudramukhātkṛtyā babhūvātīvabhīṣaṇā //
tālajaṃghodarī vaktrā stanāpīḍitabhūruhā

sā yuddhabhūmiṃ tarasā sasāda munisattama //
vicacāra mahābhīmā bhakṣayaṃtī mahāsurān

atha sā raṇamadhye hi jagāma gatabhīrdrutam //
yatrāste saṃvṛto daityavarendraissa hi bhārgavaḥ

svatejasā nabho vyāpya bhūmiṃ kṛtvā ca sā mune //
bhārgavaṃ svabhage dhṛtvā jagāmāṃtarhitā nabhaḥ

vidrutaṃ bhārgavaṃ dṛṣṭvā daityasainyagaṇāstathā //
pramlānavadanā yuddhānnirjagmuryuddhadurmadāḥ

atho'bhajyata daityānāṃ senā gaṇabhayārditā //
vāyuvegahatā yadvatprakīrṇā tṛṇasaṃhatiḥ

bhagnāṃ gaṇabhayāddaityasenāṃ dṛṣṭvātimarṣitāḥ //
niśuṃbhaśuṃbhau senānyau kālanemiśca cukrudhuḥ

trayaste varayāmāsurgaṇasenāṃ mahābalāḥ //
muṃcaṃtaśśaravarṣāṇi prāvṛṣīva balāhakāḥ

tato daityaśaraughāste śalabhānāmiva vrajāḥ //
rurudhuḥ khaṃ diśassarvā gaṇasenāmakaṃpayan

gaṇāśśaraśatairbhinnā rudhirāsāravarṣiṇaḥ //
vasaṃtakiṃśukābhāsā na prājānanhi kiṃcana

tataḥ prabhagnaṃ svabalaṃ vilokya nandyādilaṃbodarakārttikeyāḥ //
tvarānvitā daityavarānprasahya nivārayāmāsuramarṣaṇāste

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe jalaṃdharavadhopākhyāne sāmānyagaṇāsurayuddhavarṇanaṃ nāma viṃśo'dhyāyaḥ