Shiva Purana · Chapter 2.5.19

vyāsa uvāca //
sanatkumāra sarvajña nārade hi gate divi //
daityarāṭ kimakārṣītsa tanme vada suvistarāt

sanatkumāra uvāca //
tamāmaṃtrya gate daityaṃ nārade divi daityarāṭ //
tadrūpaśravaṇādāsīdanaṃgajvarapīḍitaḥ

atho jalaṃdharo daityaḥ kālādhīnaḥ pranaṣṭadhīḥ//
dūtamāhvāya yāmāsa saiṃhikeyaṃ vimohitaḥ

āgataṃ taṃ samālokya kāmākrāṃtamanāssa hi //
susaṃbodhya samācaṣṭa siṃdhuputro jalaṃdharaḥ

jalaṃdhara uvāca //
bhobho dūtavaraśreṣṭha sarvakāryaprasādhaka //
saiṃhikeya mahāprājña kailāsaṃ gaccha parvatam

tatrāsti yogī śaṃbhvākhya stapasvī ca jaṭādharaḥ //
bhasmabhūṣitasarvāṅgo virakto vijitendriyaḥ//५/
tatra gatveti vaktavyaṃ yoginaṃ dūta śaṃkaram //
jaṭādharaṃ viraktaṃ taṃ nirbhayena hṛdā tvayā

he yogiṃste dayāsindho jāyāratnena kiṃ bhavet //
bhūtapretapiśācādisevitena vanaukasā

mannāthe bhuvane yoginnocitā gatirīdṛśī //
jāyāratnamatastvaṃ me dehi ratnabhuje nijam

yāniyāni suratnāni trailokye tāni saṃti me //
madadhīnaṃ jagatsarvaṃ viddhi tvaṃ sacarācaram

indrasya gajaratnaṃ coccaiḥśravoratnamuttamam //
balādgṛhītaṃ sahasā pārijā tatarustathā

vimānaṃ haṃsasaṃyuktamaṃgaṇe mama tiṣṭhati //
ratnabhūtaṃ mahādivyamuttamaṃ vedhasodbhutam

mahāpadmādikaṃ divyaṃ nidhiratnaṃ svadasya ca //
chatraṃ me vāruṇaṃ gehe kāṃcanasrāvi tiṣṭhati

kiñjalkinī mahāmālā sarvadā'mlānapaṃkajā //
matpitussā mamaivāsti pāśaśca kaṃpatestathā

mṛtyorutkrāṃtidā śaktirmayā nītā balādvarā//
dadau mahyaṃ śucirdivye śuciśauce ca vāsasī /

evaṃ yogīndra ratnāni sarvāṇi vilasaṃti me //
atastvamapi me dehi svastrīratnaṃ jaṭādhara

//
sanatkumāra uvāca //
iti śrutvā vacastasya nandinā sa praveśitaḥ//
jagāmograsabhāṃ rāhurvismayodbhutalocanaḥ

tatra gatvā śivaṃ sākṣāddevadevaṃ mahāprabhum//
svatejodhvastatamasaṃ bhasmalepavirājitam

mahārājopacāre vilasaṃtaṃ mahādbhutam//
sarvāṅgasundaraṃ divyabhūṣaṇairbhūṣitaṃ haram

praṇanāma ca taṃ garvāttattejaḥ krāṃtavigrahaḥ//
nikaṭaṃ gatavāñchaṃbhossa dūto rāhusaṃjñakaḥ

atho tadagra āsīno vaktukāmo hi saiṃhikaḥ//
tryaṃbakaṃ sa tadā saṃjñāprerito vākyamabravīt

daityapannagasevyasya trailokyādhipatessadā //
dūto'haṃ preṣitastena tvatsakāśamihāgataḥ

// rāhuruvāca //
jalaṃdharobdhitanayassarvadaityajaneśvaraḥ //
trailokyasyeśvarassothābhavatsarvādhināyakaḥ

sa daityarājo balavāndevānāmaṃtakopamaḥ //
yoginaṃ tvāṃ samuddiśya sa yadāha śṛṇuṣva tat

mahādivyaprabhāvasya tasya daityapateḥ prabhoḥ //
sarvaratneśvarasya tvamājñāṃ śṛṇu vṛṣadhvaja

śmaśānavāsino nityamasthimālādharasya ca //
digaṃbarasya te bhāryā kathaṃ haimavatī śubham

ahaṃ ratnādhināthosmi sā ca strīratnasaṃjñitā //
tasmānmamaiva sā yogyā naiva bhikṣāśinastava

mama vaśyāstrayo lokā bhuṃje'haṃ makhabhāgakān //
yāni saṃti trilokesminratnāni mama sadmani

vayaṃ ratnabhujastvaṃ tu yogī khalu digambaraḥ //
svastrīratnaṃ dehi mahyaṃ rājñassukhakarāḥ prajāḥ

sanatkumāra uvāca //
vadatyevaṃ tathā rāhau bhrūmadhyācchūlapāṇinaḥ //
abhavatpuruṣo raudrastīvrāśanisamasvanaḥ

siṃhāsyapracalajihvassajjvālanayano mahān //
ūrddhvakeśaśśuṣkatanurnṛsiṃha iva cāparaḥ

mahātanurmahābāhustālajaṃgho bhayaṃkaraḥ //
abhidudrāva vegena rāhuṃ sa puruṣo drutam

sa taṃ khāditu māyāntaṃ dṛṣṭvā rāhurbhayāturaḥ //
adhāvadāta vegena bahistasya ca dadhāra tam

rāhuruvāca //
devadeva maheśāna pāhi māṃ śaraṇā gatam //
surā'suraissadā vandyaḥ paramaiśvaryavān prabhuḥ

brāhmaṇaṃ māṃ mahādeva khādituṃ samupāgataḥ //
puruṣoyaṃ taveśāna sevakotibhayaṃkaraḥ

etasmādrakṣa deveśa śaraṇāgatavatsalaḥ //
na khādeta yathāyaṃ māṃ namaste'stu muhurmuhuḥ

sanatkumāra uvāca //
mahādevo vacaḥ śrutvā brāhmaṇasya tadā mune //
abravītsvagaṇaṃ taṃ vai dīnānāthapriyaḥ prabhuḥ

mahādeva uvāca //
prabhuṃ ca brāhmaṇaṃ dūtaṃ rāhvākhyaṃ śaraṇāgatam //
śaraṇyā rakṣaṇīyā hi na daṇḍyā gaṇasattama

sanatkumāra uvāca //
ityuktau girijeśena sagaṇaḥ karuṇātmanā //
rāhuṃ tatyāja sahasā brāhmaṇeti śrutākṣaraḥ

rāhuṃ tyaktvāmbare sotha puruṣo dīnayā girā //
śivopakaṃṭhamāgatya mahādevaṃ vyajijñapat

puruṣa uvāca //
devadeva mahādeva karuṇākara śaṃkara //
tyājitaṃ mama bhakṣyaṃ te śaraṇāgatavatsalaḥ

kṣudhā māṃ bādhate svāminkṣutkṣāmaścāsmi sarvathā //
kiṃ bhakṣyaṃ mama deveśa tadājñāpaya māṃ prabho

sanatkumāra uvāca //
ityākarṇya vacastasya puruṣasya mahāprabhuḥ //
pratyuvācādbhutotiḥ sa kautukī svahitaṃkaraḥ

maheśvara uvāca //
bubhukṣā yadi te'tīva kṣudhā tvāṃ bādhate yadi //
saṃbhakṣayātmanaśśīghraṃ māṃsaṃ tvaṃ hastapādayoḥ

sanatkumāra uvāca //
śivenaivamājñaptaścakhāda puruṣassvakam //
hastapādodbhavaṃ māṃsaṃ śiraśśeṣo' bhavadyathā

dṛṣṭvā śirovaśeṣaṃ tu suprasannassadāśivaḥ //
puruṣaṃ bhīmakarmāṇaṃ tamuvāca savismayaḥ

śiva uvāca //
he mahāgaṇa dhanyastvaṃ madājñāpratipālakaḥ //
saṃtuṣṭaścāsmi te'tīva karmaṇānena sattama

tvaṃ kīrtimukhasaṃjño hi bhava maddvārakassadā //
mahāgaṇo mahāvīrassarvaduṣṭabhayaṃkaraḥ

matpriyastvaṃ madarcāyāṃ sadā pūjyo'hi majjanaiḥ //
tvadarcāṃ ye na kurvaṃti naiva te matpriyaṃkarāḥ

sanatkumāra uvāca //
iti śaṃbhorvaraṃ prāpya puruṣaḥ prajaharṣa saḥ //
tadāprabhṛti deveśa dvāre kīrtimukhaḥ sthitaḥ

pūjanīyo viśeṣeṇa sa gaṇaśśivapūjane //
nārcayaṃtīha ye pūrvaṃ teṣāmarcā vṛthā bhavet

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalaṃdharavadhopākhyāne dūtasaṃvādo nāma ekonaviṃśo'dhyāyaḥ