Shiva Purana · Chapter 2.4.12

brahmovāca //
nihataṃ tārakaṃ dṛṣṭvā devā viṣṇupurogamāḥ //
tuṣṭuvuśśāṃkariṃ bhaktyā sarve'nye muditānanāḥ

devā ūcuḥ //
namaḥ kalyāṇarūpāya namaste viśvamaṃgala//
viśvabaṃdho namaste'stu namaste viśvabhāvana

namostu te dānavavaryahaṃtre bāṇāsuraprāṇaharāya deva //
pralaṃbanāśāya pavitrarūpiṇe namonamaśśaṃkaratāta tubhyam

tvameva karttā jagatāṃ ca bharttā tvameva harttā śucija prasīda //
prapañcabhūtastava lokabiṃbaḥ prasīda śambhvātmaja dīnabaṃdho

devarakṣākara svāminrakṣa nassarvadā prabho//
devaprāṇāvana kara prasīda karuṇākara

hatvā te tārakaṃ daityaṃ parivārayutaṃ vibho //
mocitāssakalā devā vipadbhyaḥ parameśvara

brahmovāca//
evaṃ stutaḥ kumāro'sau devairviṣṇumukhaiḥ prabhuḥ //
varāndadāvabhinavānsarvebhyaḥ kramaśo mune

śailānnirīkṣya stuvatastatassa giriśātmajaḥ //
suprasannataro bhūtvā provāca pradadadvarān

skanda uvāca //
yūyaṃ sarve parvatā hi pūjanīyāstapasvibhiḥ //
karmibhirjñānibhiścaiva sevyamānā bhaviṣyatha

śaṃbhorviśiṣṭarūpāṇi liṃgarūpāṇi caiva hi //
bhaviṣyatha na saṃdehaḥ parvatā vacanānmama

yo'yaṃ mātāmaho me'dya himavānparvatottamaḥ //
tapasvināṃ mahābhāgaḥ phalado hi bhaviṣyati

devā ūcuḥ //
evaṃ dattvā varānhatvā tārakaṃ cāsurādhipam //
tvayā kṛtāśca sukhino vayaṃ sarve carācarāḥ

idānīṃ khalu suprītyā kailāsaṃ giriśālayam //
jananī janakau draṣṭuṃ śivāśaṃbhū tvamarhasi

brahmovāca//
ityuktvā nikhilā devā viṣṇvādyā prāptaśāsanāḥ //
kṛtvā mahotsavaṃ bhūri sakumārā yayurgirim

kumāre gacchati vibhau kailāsaṃ śaṃkarālayam //
mahāmaṃgalamuttasthau jayaśabdo babhūva ha

āruroha kumāro'sau vimānaṃ paramarddhimat //
sarvatolaṃkṛtaṃ ramyaṃ sarvopari virājitam

ahaṃ viṣṇuśca samudau tadā cāmaradhāriṇau//
guha mūrdhni mahāprītyā mune'bhūva hyataṃdritau

indrādyā amarāssarve kurvaṃto guhasevanam //
yathocitaṃ caturdikṣu jagmuśca pramudāstadā

śaṃbhorjayaṃ prabhāṣaṃtaḥ prāpuste śaṃbhuparvatam //
sānaṃdā viviśustatroccarito maṃgaladhvaniḥ

dṛṣṭvā śivaṃ śivāṃ caiva sarve viṣṇvādayo drutam //
praṇamya śaṃkaraṃ bhaktyā karau baddhvā vinamrakāḥ

kumāro'pi vinītātmā vimānādavatīrya ca //
praṇanāma mudā śaṃbhuṃ śivāṃ siṃhāsanasthitām

atha dṛṣṭvā kumāraṃ taṃ tanayaṃ prāṇavallabham //
tau daṃpatī śivau devau mumudāte'ti nārada

mahāprabhussamutthāpya tamutsaṃge nyaveśayat //
mūrdhni jaghrau mudā snehāttaṃ pasparśa kareṇa ha

mahānaṃdabharaḥ śaṃbhuścakāra mukhacuṃbanam //
kumārasya mahāsnehāt tārakārermahāprabhoḥ

śivāpi taṃ samutthāpya svotsaṃge saṃnyaveśayat //
kṛtvā mūrdhni mahāsnehāt tanmukhābjaṃ cucumba hi

tayostadā mahāmodo vavṛdhe'tīva nārada//
daṃpatyoḥ śivayostāta bhavācāraṃ prakurvatoḥ

tadotsavo mahānāsīnnānāvidhiḥ śivālaye //
jayaśabdo namaśśabdo babhūvātīva sarvataḥ

tatassuragaṇāssarve viṣṇvādyā munayastathā //
supraṇamya mudā śaṃbhuṃ tuṣṭuvussaśivaṃ mune

devā ūcuḥ //
devadeva mahādeva bhaktānāmabhayaprada //
namo namaste bahuśaḥ kṛpākara maheśvara

adbhutā te mahādeva mahālīlā sukhapradā //
sarveṣāṃ śaṃkara satāṃ dīnabaṃdho mahāprabho

evaṃ mūḍhadhiyaścājñāḥ pūjāyāṃ te sanātanam //
āvāhanaṃ na jānīmo gatiṃ naiva prabhodbhutām

gaṃgāsaliladhārāya hyādhārāya guṇātmane //
namaste tridaśeśāya śaṃkarāya namonamaḥ /३२//
vṛṣāṃkāya maheśāya gaṇānāṃ pataye namaḥ //
sarveśvarāya devāya trilokapataye namaḥ

saṃhartre jagatāṃ nātha sarveṣāṃ te namo namaḥ //
bhartre kartre ca deveśa triguṇeśāya śāśvate

visaṃgāya pareśāya śivāya paramātmane //
niṣprapaṃcāya śuddhāya paramāyāvyayāya ca

daṇḍahastāya kālāya pāśahastāya te namaḥ //
vedamaṃtrapradhānāya śatajihvāya te namaḥ

bhūtaṃ bhavyaṃ bhaviṣyacca sthāvaraṃ jaṃgamaṃ ca yat //
tava dehātsamutpannaṃ sarvathā parameśvara

pāhi nassarvadā svāminprasīda bhagavanprabho //
vayaṃ te śaraṇāpannāḥ sarvathā parameśvara

śitikaṇṭhāya rudrāya svāhākārāya te namaḥ //
arūpāya sarūpāya viśvarūpāya te namaḥ

śivāya nīlakaṃṭhāya citābhasmāṃgadhāriṇe //
nityaṃ nīlaśikhaṃḍāya śrīkaṇṭhāya namonamaḥ

sarvapraṇatadehāya saṃyamapraṇatāya ca //
mahādevāya śarvāya sarvārcitapadāya ca

tvaṃ brahmā sarvadevānāṃ rudrāṇāṃ nīlalohitaḥ //
ātmā ca sarvabhūtānāṃ sāṃkhyaiḥ puruṣa ucyase

parvatānāṃ sumerustvaṃ nakṣatrāṇāṃ ca candramā //
ṛṣīṇāṃ ca vaśiṣṭhastvaṃ devānāṃ vāsavastathā

akārassarvavedānāṃ trātā bhava maheśvara //
tvaṃ ca lokahitārthāya bhūtāni pariṣiṃcasi

maheśvara mahābhāga śubhāśubhanirīkṣaka //
āpyāyāsmānhi deveśa kartṝnvai vacanaṃ tava

rūpakoṭisahasreṣu rūpakoṭiśateṣu te //
aṃtaṃ gaṃtuṃ na śaktāḥ sma devadeva namostu te

// brahmovāca //
iti stutvākhilā devā viṣṇvādyā pramukhasthitāḥ //
muhurmuhussupraṇamya skaṃdaṃ kṛtvā purassaram

devastutiṃ samākarṇya śivassarveśvarassvarāṭ //
suprasanno babhūvātha vijahāsa dayāparaḥ

uvāca suprasannātmā viṣṇvādīnsurasattamān //
śaṃkaraḥ parameśāno dīnabaṃdhussatāṃ gatiḥ

śiva uvāca //
he hare he vidhe devā vākyaṃ me śṛṇutādarāt //
sarvathāhaṃ satāṃ trātā devānāṃ vaḥ kṛpānidhiḥ

duṣṭahaṃtā trilokeśaśśaṃkaro bhaktavatsalaḥ //
kartā bhartā ca hartā ca sarveṣāṃ nirvikāravān

yadā yadā bhavedduḥkhaṃ yuṣmākaṃ devasattamāḥ //
tadā tadā māṃ yūyaṃ vai bhajaṃtu sukhahetave

brahmovāca //
ityājñaptastadā devā viṣṇvādyāssamunīśvarāḥ //
śivaṃ praṇamya saśivaṃ kumāraṃ ca mudānvitāḥ

kathayaṃto yaśo ramyaṃ śivayośśāṃkareśca tat //
ānandaṃ paramaṃ prāpya svadhāmāni yayu rmune

śivopi śivayā sārddhaṃ sagaṇaḥ parameśvaraḥ //
kumāreṇayutaḥ prītyovāsa tasmingirau mudā

ityevaṃ kathitaṃ sarvaṃ kaumāraṃ caritaṃ mune //
śaivaṃ ca sukhadaṃ divyaṃ kimanyacchrotumicchasi

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṃḍe svāmikārtikacaritagarbhitaśivāśivacaritavarṇanaṃ nāma dvādaśo'dhyāyaḥ