Shiva Purana · Chapter 2.4.11

brahmovāca //
etasminnaṃtare tatra krauñcanāmācalo mune //
ājagāma kumārasya śaraṇaṃ bāṇapīḍita

palāyamāno yo yuddhādasoḍhā teja aiśvaram//
tutodātīva sa krauñcaṃ koṭyāyutabalānvitaḥ

praṇipatya kumārasya sa bhaktyā caraṇāmbujam //
premanirbharayā vācā tuṣṭāva guhamādarāt

krauṃca uvāca //
kumāra skaṃda deveśa tārakāsuranāśaka //
pāhi māṃ śaraṇāpannaṃ bāṇāsuranipīḍitam

saṃgarātte mahāsena samucchinnaḥ palāyitaḥ //
nyapīḍayacca māgatya hā nātha karuṇākara

tatpīḍitaste śaraṇamāgato'haṃ suduḥkhitaḥ //
palāyamāno deveśa śarajanmandayāṃ kuru

daityaṃ taṃ nāśaya vibho bāṇāhvaṃ māṃ sukhīkuru //
daityaghnastvaṃ viśeṣeṇa devāvanakarassvarāṭ

brahmovāca //
iti krauṃcastutasskandaḥ prasanno bhaktapālakaḥ //
gṛhītvā śaktimatulāṃ svāṃ sasmāra śivo dhiyā

cikṣepa tāṃ samuddiśya sa bāṇaṃ śaṃkarātmajaḥ //
mahāśabdo babhūvātha jajvaluśca diśo nabhaḥ

sabalaṃ bhasmasātkṛtvāsuraṃ taṃ kṣaṇamātrataḥ //
guhopakaṃṭhaṃ śaktissā jagāma paramā mune //2.4.11.१ ०//
tataḥ kumāra provāca krauṃcaṃ girivaraṃ prabhuḥ //
nirbhayassvagṛhaṃ gaccha naṣṭassa sabalo'suraḥ

tacchutvā svāmivacanaṃ mudito girirāṭ tadā //
stutvā guhaṃ tadārātiṃ svadhāma pratyapadyata

tataḥ skando maheśasya mudā sthāpitavānmune //
trīṇi liṃgāni tatraiva pāpaghnāni vidhānataḥ

pratijñeśvaranāmādau kapāleśvaramādarāt //
kumāreśvaramevātha sarvasiddhipradaṃ trayam

punassarveśvarastatra jayastaṃbhasamīpataḥ //
staṃbheśvarābhidhaṃ liṃgaṃ guhaḥ sthāpitavānmudā

tatassarve surāstatra viṣṇuprabhṛtayo mudā//
liṃgaṃ sthāpitavaṃtaste devadevasya śūlinaḥ

sarveṣāṃ śivaliṃgānāṃ mahimābhūttadādbhutaḥ//
sarvakāmapradaścāpi muktido bhaktikāriṇām

tatassarve surā viṣṇupramukhāḥ prītamānasāḥ //
aicchangirivaraṃ gaṃtuṃ puraskṛtya guhaṃ mudā

tasminnavasare śeṣaputraḥ kumuda nāmakaḥ //
ājagāma kumārasya śaraṇaṃ daityapīḍitaḥ

pralaṃbākhyo'suro yo hi raṇādasmātpalāyitaḥ //
sa tatropadravaṃ cakre prabalastārakānugaḥ

so'tha śeṣasya tanayaḥ kumudo'hipatermahān //
kumāraśaraṇaṃ prāptastuṣṭāva girijātmajam

kumuda uvāca //
devadeva mahādeva varatāta mahāprabho//
pīḍito'haṃ pralaṃbena tvāhaṃ śaraṇamāgataḥ

pāhi māṃ śaraṇāpannaṃ pralaṃbā surapīḍitam //
kumāra skanda deveśa tārakāre mahāprabho

tvaṃ dīnabaṃdhuḥ karuṇāsindhurānatavatsalaḥ //
khalanigrahakartā hi śaraṇyaśca satāṃ gatiḥ

kumudenastutaścetthaṃ vijñaptastadvadhāya hi //
svāśca śaktiṃ sa jagrāha smṛtvā śivapadāṃbujau

cikṣepa tāṃ samuddiśya pralaṃbaṃ girijāsutaḥ //
mahāśabdo babhūvātha jajvaluśca diśo nabhaḥ

taṃ sāyutabalaṃ śaktirdrutaṃ kṛtvā ca bhasmasāt //
guhopakaṃṭhaṃ sahasājagāmākliṣṭavāriṇī

tataḥ kumāraḥ provāca kumudaṃ nāgabālakam //
nirbhayaḥ svagṛhaṃ gaccha naṣṭassa sabalo'suraḥ

tacchutvā guhavākyaṃ sa kumudohipatessutaḥ //
stutvā kumāraṃ natvā ca pātālaṃ mudito yayau

evaṃ kumāravijayaṃ varṇitaṃ te munīśvara //
caritaṃ tārakavadhaṃ paramāścaryakārakam

sarvapāpaharaṃ divyaṃ sarvakāmapradaṃ nṛṇām //
dhanyaṃ yaśasyamāyuṣyaṃ bhuktimuktipradaṃ satām

ye kīrtayaṃti suyaśo'mitabhāgyayutā narāḥ //
kumāracaritaṃ divyaṃ śiva lokaṃ prayāṃti te

śroṣyaṃti ye ca tatkīrtiṃ bhaktyā śraddhānvitā janāḥ //
muktiṃ prāpsyanti te divyāmiha bhuktvā paraṃ sukham

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṃḍe bāṇapralaṃbavadha kumāravijayavarṇanaṃ nāmaikādaśo'dhyāyaḥ