Shiva Purana · Chapter 2.4.10

brahmovāca //
nivārya vīrabhadraṃ taṃ kumāraḥ paravīrahā//
samaicchattārakavadhaṃ smṛtvā śivapadāmbujau

jagarjātha mahātejāḥ kārtikeyo mahābalaḥ //
sannaddhaḥ so'bhavatkruddha sainyena mahatā vṛtaḥ

tadā jayajayetyuktaṃ sarvairdervergaṇai stathā //
saṃstuto vāgbhiriṣṭābhistadaiva ca surarṣibhiḥ

tārakasya kumārasya saṃgrāmo'tīva dussahaḥ//
jātastadā mahāghorassarvabhūta bhayaṃkaraḥ

śaktihastau ca tau vīrau yuyudhāte parasparam //
sarveṣāṃ paśyatāṃ tatra mahāścaryavatāṃ mune

śaktinirbhinnadehau tau mahāsādhanasaṃyutau//
parasparaṃ vaṃcayaṃtau siṃhāviva mahābalau

vaitālikaṃ samāśritya tathā khecarakaṃ matam //
pāpaṃ taṃ ca samāśritya śaktyā śaktiṃ vijaghnatuḥ

ebhirmaṃtrairmahāvīrau cakraturyuddhamadbhutam //
anyonyaṃ sādhakau bhūtvā mahābalaparākramau

mahābalaṃ prakurvatau parasparavadhaiṣiṇau//
jaghnatuśśaktidhārābhī raṇe raṇaviśāradau

mūrdhni kaṃṭhe tathā corvorjānvoścaiva kaṭītaṭe//
vakṣasyurasi pṛṣṭhe ca cicchiduśca parasparam

tadā tau yudhyamānau ca hantukāmau mahābalau //
valgantau vīraśabdaiśca nānāyuddhaviśāradau

/
abhavanprekṣakāssarve devā gaṃdharvakinnarāḥ //
ūcuḥ parasparaṃ tatra kosminyuddhe vijeṣyate

tadā nabhogatā vāṇī jagau devāṃśca sāṃtvayan //
asuraṃ tārakaṃ cātra kumāro'yaṃ haniṣyati

mā śocyatāṃ suraiḥ sarvai sukhena sthīyatāmiti//
yuṣmadarthaṃ śaṃkaro hi putrarūpeṇa saṃsthitaḥ

śrutvā tadā tāṃ gagane samīritāṃ vācaṃ śubhāṃ sapramathessamāvṛtaḥ //
nihaṃtukāmaḥ sukhitaḥ kumārako daityādhipaṃ tārakamāśvabhūttadā

śaktyā tayā mahābāhurājaghānastanāṃtare //
kumāraḥ sma ruṣāviṣṭastārakāsuramojasā

taṃ prahāramanādṛtya tārako daityapuṃgavaḥ //
kumāraṃ cāpi saṃkruddhassvaśaktyā saṃjaghāna saḥ

tena śaktiprahāreṇa śāṃkarirmūcchi to'bhavat //
muhūrtāccetanāṃ prāpa stūyamāno maharṣibhiḥ

yathā siṃho madonmatto haṃtukāmastathāsuram//
kumārastārakaṃ śaktyā sa jaghāna pratāpavān

evaṃ parasparaṃ tau hi kumāraścāpi tārakaḥ //
yuyudhāte'tisaṃrabdhau śaktiyuddhaviśāradau

abhyāsaparamāvāstāmanyonyaṃ vijigīṣayā //
padātinau yudhyamānnau citrarūpau tarasvinau

vividhairghātapuṃjaistāvanyonyaṃ vini jaghnatuḥ //
nānāmārgānprakurvantau garjaṃtau suparākramau

avalokaparāssarve devagaṃdharvakinnarāḥ//
vismayaṃ paramaṃ jagmurnocuḥ kiṃcana tatra te

na vavau pavamānaśca niṣprabho'bhūddivākaraḥ //
cacāla vasudhā sarvā saśailavanakānanā

etasminnaṃtare tatra himālayamukhā dharāḥ //
snehārditāstadā jagmuḥ kumāraṃ ca parīpsavaḥ

tatassa dṛṣṭvā tānsarvānbhayabhītāṃśca śāṃkariḥ//
parvatāngirijāputro babhāṣe paribodhayan

kumāra uvāca//
mā khidyatāṃ mahābhāgā mā ciṃtāṃ kurvatāṃ nagāḥ //
ghātayāmyadya pāpiṣṭhaṃ sarveṣāṃ vaḥ prapaśya tām

evaṃ samāśvāsya tadā parvatānnirjarāngaṇān //
praṇamya girijāṃ śaṃbhumādade śaktimutprabhām

taṃ tārakaṃ haṃtumanāḥ karaśaktirmahāprabhuḥ //
virarāja mahāvīraḥ kumāraśśaṃbhubālakaḥ

śaktyā tayā jaghānātha kumārastārakāsuram //
tejasāḍhyaśśaṃkarasya lokakleśakaraṃ ca tam

papāta sadyassahasā viśīrṇāṃgo'suraḥ kṣitau //
tārakākhyo mahāvīrassarvāsuragaṇādhipaḥ

kumāreṇa hatassotivīrassa khalu tārakaḥ //
layaṃ yayau ca tatraiva sarveṣāṃ paśyatāṃ mune

tathā taṃ patitaṃ dṛṣṭvā tārakaṃ balavattaram //
na jaghāna punarvīrassa gatvā vyasumāhave

hate tasminmahādaitye tārakākhye mahābale //
kṣayaṃ praṇītā bahavo'surā devagaṇaistadā

kecidbhītāḥ prāṃjalayo babhūvustatra cāhave//
chinnabhinnāṃgakāḥ kecinmṛtā daityāssahasraśaḥ

kecijjātāḥ kumārasya śaraṇaṃ śaraṇārthinaḥ //
vadantaḥ pāhi pāhīti daityāḥ sāṃjalayastadā

kiyaṃtaśca hatāstatra kiyaṃtaśca palāyitāḥ //
palāyamānā vyathitā stāḍitā nirjjarairgaṇaiḥ

sahasraśaḥ praviṣṭāste pātāle ca jijīṣavaḥ//
palāyamānāste sarve bhagnāśā dainyamāgatāḥ

evaṃ sarvaṃ daityasainyaṃ bhraṣṭaṃ jātaṃ munīśvara //
na kecittatra saṃtasthurgaṇadevabhayāttadā

āsīnniṣkaṃṭakaṃ sarvaṃ hate tasmindurātmani//
te devāḥ sukhamāpannāssarve śakrādayastadā

evaṃ vijayamāpannaṃ kumāraṃ nikhilāssurāḥ //
babhūvuryugapaddhṛṣṭāstrilokāśca mahāsukhā

tadā śivo'pi taṃ jñātvā vijayaṃ kārtikasya ca //
tatrājagāma sa mudā sagaṇaḥ priyayā saha

svātmajaṃ svāṃkamāropya kumāraṃ sūryavarcasam //
lālayāmāsa suprītyā śivā ca snehasaṃkulā

himālayastadāgatya svaputraiḥ parivāritaḥ //
sabaṃdhussānugaśśaṃbhuṃ tuṣṭāva ca śivāṃ guham

tato devagaṇāssarve munayassiddhacāraṇāḥ //
tuṣṭuvuśśāṃkariṃ śaṃbhuṃ girijāṃ tuṣitāṃ bhṛśam

puṣpavṛṣṭiṃ sumahatīṃ cakruścopasurāstadā //
jagurgaṃdharvapatayo nanṛtuścāpsarogaṇāḥ

vāditrāṇi tathā nedustadānīṃ ca viśeṣataḥ //
jayaśabdo namaḥ śabdo babhūvoccairmuhurmuhuḥ

tato mayācyutaścāpi saṃtuṣṭobhūdviśeṣataḥ //
śivaṃ śivāṃ kumāraṃ ca saṃtuṣṭāva samādarāt

kumāramagrataḥ kṛtvā harikendramukhāssurāḥ //
cakrurnīrājanaṃ prītyā munayaścāpare tathā

gītavāditraghoṣeṇa brahmaghoṣeṇa bhūyasā //
tadotsavo mahānāsītkīrtanaṃ ca viśeṣataḥ

gītavādyaissuprasannaistathā sāñjalibhirmune //
stūyamāno jagannāthassarvairdaivairgaṇairabhūta

tatassa bhagavānrudro bhavānyā jagadaṃbayā //
sarvaiḥ stuto jagāmātha svagiriṃ svagaṇairvṛtaḥ

iti śrī śivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe tārakā suravadhadevotsavavarṇanaṃ nāma daśamo'dhyāyaḥ