શિવ પુરાણ · અધ્યાય 2.4.11

બ્રહ્મોવાચ ॥
એતસ્મિન્નંતરે તત્ર ક્રૌઞ્ચનામાચલો મુને ॥
આજગામ કુમારસ્ય શરણં બાણપીડિત

પલાયમાનો યો યુદ્ધાદસોઢા તેજ ઐશ્વરમ્॥
તુતોદાતીવ સ ક્રૌઞ્ચં કોટ્યાયુતબલાન્વિતઃ

પ્રણિપત્ય કુમારસ્ય સ ભક્ત્યા ચરણામ્બુજમ્ ॥
પ્રેમનિર્ભરયા વાચા તુષ્ટાવ ગુહમાદરાત્

ક્રૌંચ ઉવાચ ॥
કુમાર સ્કંદ દેવેશ તારકાસુરનાશક ॥
પાહિ માં શરણાપન્નં બાણાસુરનિપીડિતમ્

સંગરાત્તે મહાસેન સમુચ્છિન્નઃ પલાયિતઃ ॥
ન્યપીડયચ્ચ માગત્ય હા નાથ કરુણાકર

તત્પીડિતસ્તે શરણમાગતોઽહં સુદુઃખિતઃ ॥
પલાયમાનો દેવેશ શરજન્મન્દયાં કુરુ

દૈત્યં તં નાશય વિભો બાણાહ્વં માં સુખીકુરુ ॥
દૈત્યઘ્નસ્ત્વં વિશેષેણ દેવાવનકરસ્સ્વરાટ્

બ્રહ્મોવાચ ॥
ઇતિ ક્રૌંચસ્તુતસ્સ્કન્દઃ પ્રસન્નો ભક્તપાલકઃ ॥
ગૃહીત્વા શક્તિમતુલાં સ્વાં સસ્માર શિવો ધિયા

ચિક્ષેપ તાં સમુદ્દિશ્ય સ બાણં શંકરાત્મજઃ ॥
મહાશબ્દો બભૂવાથ જજ્વલુશ્ચ દિશો નભઃ

સબલં ભસ્મસાત્કૃત્વાસુરં તં ક્ષણમાત્રતઃ ॥
ગુહોપકંઠં શક્તિસ્સા જગામ પરમા મુને ॥2.4.11.૧ ૦॥
તતઃ કુમાર પ્રોવાચ ક્રૌંચં ગિરિવરં પ્રભુઃ ॥
નિર્ભયસ્સ્વગૃહં ગચ્છ નષ્ટસ્સ સબલોઽસુરઃ

તચ્છુત્વા સ્વામિવચનં મુદિતો ગિરિરાટ્ તદા ॥
સ્તુત્વા ગુહં તદારાતિં સ્વધામ પ્રત્યપદ્યત

તતઃ સ્કન્દો મહેશસ્ય મુદા સ્થાપિતવાન્મુને ॥
ત્રીણિ લિંગાનિ તત્રૈવ પાપઘ્નાનિ વિધાનતઃ

પ્રતિજ્ઞેશ્વરનામાદૌ કપાલેશ્વરમાદરાત્ ॥
કુમારેશ્વરમેવાથ સર્વસિદ્ધિપ્રદં ત્રયમ્

પુનસ્સર્વેશ્વરસ્તત્ર જયસ્તંભસમીપતઃ ॥
સ્તંભેશ્વરાભિધં લિંગં ગુહઃ સ્થાપિતવાન્મુદા

તતસ્સર્વે સુરાસ્તત્ર વિષ્ણુપ્રભૃતયો મુદા॥
લિંગં સ્થાપિતવંતસ્તે દેવદેવસ્ય શૂલિનઃ

સર્વેષાં શિવલિંગાનાં મહિમાભૂત્તદાદ્ભુતઃ॥
સર્વકામપ્રદશ્ચાપિ મુક્તિદો ભક્તિકારિણામ્

તતસ્સર્વે સુરા વિષ્ણુપ્રમુખાઃ પ્રીતમાનસાઃ ॥
ઐચ્છન્ગિરિવરં ગંતું પુરસ્કૃત્ય ગુહં મુદા

તસ્મિન્નવસરે શેષપુત્રઃ કુમુદ નામકઃ ॥
આજગામ કુમારસ્ય શરણં દૈત્યપીડિતઃ

પ્રલંબાખ્યોઽસુરો યો હિ રણાદસ્માત્પલાયિતઃ ॥
સ તત્રોપદ્રવં ચક્રે પ્રબલસ્તારકાનુગઃ

સોઽથ શેષસ્ય તનયઃ કુમુદોઽહિપતેર્મહાન્ ॥
કુમારશરણં પ્રાપ્તસ્તુષ્ટાવ ગિરિજાત્મજમ્

કુમુદ ઉવાચ ॥
દેવદેવ મહાદેવ વરતાત મહાપ્રભો॥
પીડિતોઽહં પ્રલંબેન ત્વાહં શરણમાગતઃ

પાહિ માં શરણાપન્નં પ્રલંબા સુરપીડિતમ્ ॥
કુમાર સ્કન્દ દેવેશ તારકારે મહાપ્રભો

ત્વં દીનબંધુઃ કરુણાસિન્ધુરાનતવત્સલઃ ॥
ખલનિગ્રહકર્તા હિ શરણ્યશ્ચ સતાં ગતિઃ

કુમુદેનસ્તુતશ્ચેત્થં વિજ્ઞપ્તસ્તદ્વધાય હિ ॥
સ્વાશ્ચ શક્તિં સ જગ્રાહ સ્મૃત્વા શિવપદાંબુજૌ

ચિક્ષેપ તાં સમુદ્દિશ્ય પ્રલંબં ગિરિજાસુતઃ ॥
મહાશબ્દો બભૂવાથ જજ્વલુશ્ચ દિશો નભઃ

તં સાયુતબલં શક્તિર્દ્રુતં કૃત્વા ચ ભસ્મસાત્ ॥
ગુહોપકંઠં સહસાજગામાક્લિષ્ટવારિણી

તતઃ કુમારઃ પ્રોવાચ કુમુદં નાગબાલકમ્ ॥
નિર્ભયઃ સ્વગૃહં ગચ્છ નષ્ટસ્સ સબલોઽસુરઃ

તચ્છુત્વા ગુહવાક્યં સ કુમુદોહિપતેસ્સુતઃ ॥
સ્તુત્વા કુમારં નત્વા ચ પાતાલં મુદિતો યયૌ

એવં કુમારવિજયં વર્ણિતં તે મુનીશ્વર ॥
ચરિતં તારકવધં પરમાશ્ચર્યકારકમ્

સર્વપાપહરં દિવ્યં સર્વકામપ્રદં નૃણામ્ ॥
ધન્યં યશસ્યમાયુષ્યં ભુક્તિમુક્તિપ્રદં સતામ્

યે કીર્તયંતિ સુયશોઽમિતભાગ્યયુતા નરાઃ ॥
કુમારચરિતં દિવ્યં શિવ લોકં પ્રયાંતિ તે

શ્રોષ્યંતિ યે ચ તત્કીર્તિં ભક્ત્યા શ્રદ્ધાન્વિતા જનાઃ ॥
મુક્તિં પ્રાપ્સ્યન્તિ તે દિવ્યામિહ ભુક્ત્વા પરં સુખમ્

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં ચતુર્થે કુમારખંડે બાણપ્રલંબવધ કુમારવિજયવર્ણનં નામૈકાદશોઽધ્યાયઃ