Shiva Purana · Chapter 2.3.5

nārada uvāca //
antarhitāyāndevyāṃ tu durgāyāṃ svagṛheṣu ca //
gateṣvamaravṛndeṣu kimabhūttadanantaram

kathaṃ menāgirīśau ca tepāte paramantapaḥ //
kathaṃ sutā'bhavattasya menāyāntāta tadvada

// brahmovāca //
vipravarya sutaśreṣṭha śṛṇu taccaritaṃ mahat //
praṇamya śaṃkaraṃ bhaktyā vacmi bhaktivivarddhanam

upadiśya gate tāta suravṛnde girīśvaraḥ //
haryādau menakā cāpi tepāte paramantapaḥ//

aharniśaṃ śivāṃ śambhuṃ cintayantau ca dampatī //
samyagāredhaturnityaṃ bhaktiyuktena cetasā

giripriyātīva mudānarca devīṃ śivena sā //
dānandadau dvijebhyaśca sadā tattoṣahetave

caitramāsaṃ samārabhya saptaviṃśativatsarān //
śivāṃ sampūjayāmāsāpattyārthinyanvahaṃ ratā

aṣṭamyāmupavāsantu kṛtvādānnavamītithau //
modakairbalipiṣṭaiśca pāyasairgandhapuṣpakaiḥ

gaṅgāyāmauṣadhiprasthe kṛtvā mūrtiṃ mahīmayīm //
umāyāḥ pūjayāmāsa nānāvastusamarpaṇaiḥ

kadācitsā nirāhārā kadācitsā dhṛtavratā //
kadācitpavanāhārā kadācijjalabhughyabhūt

śivāvinyastacetaskā saptaviṃśativatsarān //
nināya menakā prītyā paraṃ sā mṛṣṭavarcasā

saptaviṃśativarṣānte jaganmātā jaganmayī //
suprītābhavadatyarthamumā śaṃkarakāminī

anugrahāya menāyāḥ purataḥ parameśvarī //
āvirbabhūva sā devī santuṣṭā tatsubhaktitaḥ

divyāvayavasaṃyuktā tejomaṇḍalamadhyagā//
uvāca vihasantī sā menāṃ pratyakṣatāṃ gatā

devyuvāca // varaṃ brūhi mahāsādhvi yatte manasi vartate //
suprasannā ca tapasā tavāhaṃ girikāmini

yatprārthitaṃ tvayā mene tapovratasamādhinā //
dāsye te'haṃ ca tatsarvaṃ vāñchitaṃ yadyadā bhavet

tatassā menakā devīṃ pratyakṣāṃ kālikāntadā //
dṛṣṭvā ca praṇanāmātha vacanaṃ cedamabravīt

menovāca //
devi pratyakṣato rūpandṛṣṭantava mayā'dhunā //
tvāmahaṃ stotumicchāmi prasannā bhava kālike

// brahmovāca //
atha sā menayetyuktā kālikā sarvamohinī //
bāhubhyāṃ suprasannātmā menakāṃ pariṣasvaje

tataḥ prāptamahājñānā menakā kālikāṃ śivam //
tuṣṭāva vāgbhi riṣṭābhirbhaktyā pratyakṣatāṃ gatām

menovāca //
mahāmāyāṃ jagaddhātrīṃ caṇḍikāṃ lokadhāriṇīm //
praṇamāmi mahādevīṃ sarvakāmārthadāyinīm

nityānandakarīṃ māyāṃ yoganidrāṃ jagatprasūm //
praṇamāmi sadāsiddhāṃ śubhasārasamālinīm

mātāmahīṃ sadānandāṃ bhaktaśokavināśinīm //
ākalpaṃ vanitānāṃ ca prāṇināṃ buddhirūpiṇīm

sā tvaṃ baṃdhacchedaheturyatīnāṃ kaste geyo mādṛśībhiḥ prabhāvaḥ //
hiṃsāyā vātharvavedasya sā tvaṃ nityaṃ kāmaṃ tvaṃ mameṣṭaṃ vidhehi

nityānityairbhāvahīnaiḥ parāstaistattanmātrairyojyate bhūtavargaḥ //
teṣāṃ śaktistvaṃ sadā nityarūpā kāle yoṣā yogayuktā samarthā

yonirdharitrī jagatāṃ tvameva tvameva nityā prakṛtiḥ parastāt //
yathā vaśaṃ kriyate brahmarūpaṃ sā tvaṃ nityā me prasīdādya mātaḥ

tvaṃ jātavedogataśaktirugrā tvaṃ dāhikā sūryakarasya śaktiḥ //
āhlādikā tvaṃ bahucandrikā yā tāntvāmahaṃ staumi namāmi caṇḍīm

yoṣāṇāṃ satpriyā ca tvaṃ nityā tvaṃ cordhvaretasām //
vāṃchā tvaṃ sarvajagatāṃ dhāyā ca tvaṃ yathā hareḥ

yā ceṣṭarūpāṇi vidhāya devī sṛṣṭisthitānāśamayī ca kartrī //
brahmācyutasthāṇuśarīrahetussā tvaṃ prasīdādya punarnamaste

brahmovāca //
tata itthaṃ stutā durgā kālikā punareva hi //
uvāca menakāṃ devīṃ vāṃchitaṃ varayetyuta

// umovāca //
prāṇapriyā mama tvaṃ hi himācalavilāsinī //
yadicchasi dhruvandāsye nādeyaṃ vidyate mama

iti śrutvā maheśānyāḥ pīyūṣasadṛśaṃ vacaḥ //
uvāca parituṣṭā sā menakā girikāminī

menovāca //
śive jayajaya prājñe maheśvari bhavāmbike //
varayogyāsmahaṃ cette vṛṇe bhūyo varaṃ varam

prathamaṃ śataputrā me bhavantu jagadambike //
bahvāyuṣo vīryavanta ṛddhisiddhisamanvitāḥ

paścāttathaikā tanayā svarūpaguṇaśālinī //
kuladvayānaṃdakarī bhuvanatrayapūjitā

sutā bhava mama śive devakāryārthameva hi //
rudrapatnī bhava tathā līlāṃ kuru bhavāmbike

// brahmovāca //
tacchrutvā menakoktaṃ hi prāha devī prasannadhīḥ //
smitapūrvaṃ vacastasyāḥ pūrayantī manoratham

// devyuvāca //
śataputrāssaṃ bhavantu bhavatyā vīryasaṃyutāḥ //
tatraiko balavānmukhyaḥ pradhamaṃ saṃbhaviṣyati //

sutāhaṃ saṃbhaviṣyāmi santuṣṭā tava bhaktitaḥ //
deva kāryaṃ kariṣyāmi sevitā nikhilaissuraiḥ

brahmovāca //
evamuktvā jagaddhātrī kālikā parameśvarī //
paśyantyā menakāyāstu tatraivāntardadhe śivā

menakāpi varaṃ labdhvā maheśānyā abhī psitam //
mudaṃ prāpāmitāṃ tāta tapaḥkleśopyanaśyata

diśi tasyāṃ namaskṛtya suprahṛṣṭamanāssatī //
jayaśabdaṃ proccaraṃtī svasthānampraviveśa ha

atha tasmai svapataye śaśaṃsa suvaraṃ ca tam //
svacihnabuddhamiva vai suvācā punaruktayā

śrutvā śailapatirhṛṣṭo'bhavanmenāvaco hi tat //
praśaśaṃsa priyāṃ prītyā śivābhaktiratāṃ ca tām

kālakrameṇā'tha tayoḥ pravṛtte surate mune //
garbho babhūva menāyā vavṛdhe pratyahaṃ ca saḥ

asūta sā nāgavadhūpabhogyaṃ sutamuttamam //
samudrabaddhasatsakhyaṃ mainākābhidhamadbhutam

vṛtraśatrāvapi kruddhe vedanāśaṃ sapakṣakam //
pavikṣatānāṃ devarṣe pakṣacchidi varāṅgakam

pravaraṃ śataputrāṇāṃ mahābalaparākramam //
svodbhavānāṃ mahīdhrāṇāṃ parvatendraikadhiṣṭhitam

āsīnmahotsavastatra himācalapure'dbhutaḥ //
dampatyoḥ pramudādhikyaṃ babhūva kleśasaṃkṣayaḥ

dānandadau dvijātibhyo'nyebhyaśca pradadau dhanam //
śivāśivapadadvandve sneho'bhūdadhikastayoḥ

iti śrīśivamahāpurāṇe dvitīyāyāṃ ru० saṃ० tṛtīye pārvatīkhaṃḍe menāvaralābhavarṇano nāma paṃcamo'dhyāyaḥ