Shiva Purana · Chapter 2.3.4

brahmovāca //
itthaṃ devaiḥ stutā devī durgā durgārtināśinī //
āvirbabhūva devānāṃ purato jagadaṃbikā

rathe ratnamaye divye saṃsthitā paramādbhute //
kiṃkiṇījālasaṃyukte mṛdusaṃstaraṇe vare

koṭisūryādhikābhāsa ramyāvayavabhāsinī//
svatejorāśimadhyasthā vararūpā samacchavi

anūpamā mahāmāyā sadāśivavilāsinī //
triguṇā nirguṇā nityā śivalokanivāsinī

tridevajananī caṇḍī śivā sarvārtināśinī//
sarvamātā mahānidrā sarvasvajanatāriṇī

tejorāśeḥ prabhāvāttu sā tu dṛṣṭvā suraiśśivā //
tuṣṭuvustāṃ punaste vai surā darśanakāṃkṣiṇaḥ

atha devagaṇāssarve viṣṇvādyā darśanepsavaḥ //
dadṛśurjagadambāṃ tāṃ tatkṛpāṃ prāpya tatra hi

babhūvānandasandohassarveṣāṃ tridivaukasām//
punaḥ punaḥ praṇemustāṃ tuṣṭuvuśca viśeṣataḥ

devā ūcuḥ //
śive śarvāṇi kalyāṇi jagadamba maheśvari //
tvāṃ natāssarvathā devā vayaṃ sarvārtināśinīm

/
na hi jānanti deveśi vedaśśāstrāṇi kṛtsnaśaḥ //
atīto mahimā dhyānaṃ tava vāṅmanasośśive

atadvyāvṛttitastāṃ vai cakitaṃ cakitaṃ sadā //
abhidhatte śrutirapi pareṣāṃ kā kathā matā

jānanti bahavo bhaktāstvatkṛpāṃ prāpya bhaktitaḥ //
śaraṇāgatabhaktānāṃ na kutrāpi bhayādikam

vijñaptiṃ śṛṇu suprītā yasyā dāsāssadāmbike //
tava devi mahādevi hīnato varṇayāmahe

purā dakṣasutā bhūtvā saṃjātā haravallabhā //
brahmaṇaśca pareṣāṃ vā nāśayatvamakaṃmahat

pitṛto'nādaraṃ prāpyātyajaḥ paṇavaśāttanum //
svalokamagamastvaṃ vālabhadduḥkhaṃ haro'pi hi

na hi jātamprapūrṇaṃ taddevakāryaṃ maheśvari//
vyākulā munayo devāśśaraṇantvāṃ gatā vayam

pūrṇaṃ kuru maheśāni nirjarāṇāṃ manoratham //
sanatkumāravacanaṃ saphalaṃ syādyathā śive

avatīrya kṣitau devi rudrapatnī punarbhava//
līlāṃ kuru yathāyogyaṃ prāpnuyurnirjarāssukham

sukhī syāddevi rudro'pi kailāsācalasaṃsthitaḥ //
sarve bhavantu sukhino duḥkhaṃ naśyatu kṛtsnaśaḥ

// brahmovāca //
iti procyāmarāssarve viṣṇvādyāḥ premasaṃkulāḥ //
maunamāsthāya saṃtasthurbhaktinamrā tmamūrtayaḥ

śivāpi suprasannābhūdākarṇyāmarasaṃstutim //
ākalayyātha taddhetuṃ saṃsmṛtya svaprabhuṃ śivam

uvācomā tadā devī sambodhya vibudhāṃśca tān //
vihasya māpatimukhānsadayā bhaktavatsalā

umovāca //
he hare he vidhe devā munayaśca gatavyathāḥ //
sarve śṛṇuta madvākyaṃ prasannāhaṃ na saṃśayaḥ

caritaṃ mama sarvatra trailokyasya sukhāvaham //
kṛtaṃ mayaivaṃ sakalaṃ dakṣamohādikaṃ ca tat

avatāraṃ kariṣyāmi kṣitau pūrṇaṃ na saṃśayaḥ //
bahavo hetavo'pyatra tadvadāmi mahādarāt

purā himācalo devā menā cātisubhaktitaḥ //
sevāṃ me cakratustāta jananīvatsatītanoḥ

idānīṃ kurutassevāṃ subhaktyā mama nityaśaḥ //
menā viśeṣatastatra sutātvenātra saṃśayaḥ

rudro gacchatu yūyaṃ cāvatāraṃ himavadgṛhe //
ataścāvatariṣyāmi duḥkhanāśo bhaviṣyati

sarve gacchata dhāma svaṃ svaṃ sukhaṃ labhatāṃ ciram //
avatīrya sutā bhūtvā menāyā dāsya utsukham//

harapatnī bhaviṣyāmi suguptaṃ matamātmanaḥ //
adbhutā śivalīlā hi jñānināmapi mohinī

yāvatprabhṛti me tyaktā svatanurdakṣajā surāḥ //
pitṛto'nādaraṃ dṛṣṭvā svāminastatkratau gatā

tadāprabhṛti sa svāmī rudraḥ kālāgnisaṃjñakaḥ //
digambaro babhūvāśu maccintanaparāyaṇaḥ

mama roṣaṃ kratau dṛṣṭvā pitustatra gatā satī //
atyajatsvatanuṃ prītyā dharmajñeti vicārataḥ//

yogyabhūtsadanaṃ tyaktvā kṛtvā veṣamalaukikam //
na sehe virahaṃ satyā madrūpāyā maheśvaraḥ

mama hetormahāduḥkhī sa babhūva kuveṣabhṛt //
atyajatsa tadārabhya kāmajaṃ sukhamuttamam

anyacchṛṇuta he viṣṇo he vidhe munayaḥ surāḥ //
mahāprabhormaheśasya līlāṃ bhuvanapālinīm

vidhāya mālāṃ suprītyā mamāsthnāṃ virahākulaḥ //
na śāntiṃ prāpa kutrāpi prabuddho 'pyeka eva saḥ

itastato rurodoccairanīśa iva sa prabhuḥ //
yogyāyogyaṃ na bubudhe bhramansarvatra sarvadā

itthaṃ līlāṃ haro'kārṣīddarśayankāmināṃ prabhuḥ //
ūce kāmukavadvāṇīṃ virahavyākulāmiva

vastuto'vikṛto'dīno'styajitaḥ parameśvaraḥ //
paripūrṇaḥ śivaḥ svāmī māyādhīśo'khileśvaraḥ

anyathā mohatastasya kiṃ kāmācca prayojanam //
vikāreṇāpi kenāśu māyālipto na sa prabhuḥ

rudro'tīvecchati vibhussa me kartuṃ karagraham //
avatāraṃ kṣitau menāhimācalagṛhe surāḥ

ataścāvatariṣyāmi rudrasantoṣahetave //
himāgapatnyāṃ menāyā laukikīṃ gatimāśritā

bhaktā rudrapriyā bhūtvā tapaḥ kṛtvā sudussaham //
devakāryaṃ kariṣyāmi satyaṃ satyaṃ na saṃśayaḥ

gacchata svagṛhaṃ sarve bhava bhajata nityaśaḥ //
tatkṛpāto'khilaṃ duḥkhaṃ vinaśyati na saṃśayaḥ

bhaviṣyati kṛpālostu kṛpayā maṃgalaṃ sadā //
vandyā pūjyā triloke'haṃ tajjāyeti ca hetutaḥ

// brahmovāca //
ityuktvā jagadambā sā devānāṃ paśyatāntadā //
antardadhe śivā tāta svaṃ lokamprāpa vai drutam /

viṣṇvādayassurāssarve munayaśca mudānvitāḥ//
kṛtvā taddiśi saṃnāmaṃ svasvadhāmāni saṃyayuḥ

itthaṃ durgāsucaritaṃ varṇitaṃ te munīśvara //
sarvadā sukhadaṃ nṝṇāṃ bhuktimuktipradāyakam

ya idaṃ śṛṇuyānnityaṃ śrāvayedvā samāhitaḥ //
paṭhedvā pāṭhayedvāpi sarvānkāmāna vāpnuyāt

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṃḍe devasāntvanaṃ nāma caturtho'dhyāyaḥ