Shiva Purana · Chapter 2.3.6

// brahmovāca //
atha saṃsmaraturbhaktyā dampatī tau bhavāmbikām //
prasūtihetave tatra devakāryārthamādarāt

tatassā caṇḍikā yogāttyaktadehā purā pituḥ //
īhayā bhatituṃ bhūyassamaicchadriridārataḥ

satyaṃ vidhātuṃ svavacaḥ prasannākhilakāmadā //
pūrṇāṃśācchailacitte sā viveśātha maheśvarī

virarāja tatassotipramadopūrvasudyutiḥ //
hutāśana ivādhṛṣyastejorāśirmahāmanāḥ

tato girissvapriyāyāṃ paripūrṇaṃ śivāṃśakam //
samādhimatvātsamaye samadhatta suśaṃkare

samadhatta gireḥ patnī garbhaṃ devyāḥ prasādataḥ //
citte sthitāyāḥ karuṇākarāyāḥ sukhadaṃ gireḥ

giripriyā sarvajagannivāsāsaṃśrayādhikam //
vireje sutarāṃ menā tejomaṇḍalagā sadā

sukhodayaṃ svabhartuśca menā dauhṛdalakṣaṇam //
dadhau nidānandevānāmānandasyepsitaṃ śubham

deha sādādasaṃpūrṇabhūṣaṇā lodhrasaṃmukhā //
svalpabhendukṣaye kālaṃ viceṣyarkṣā vibhāvarī

tadānanaṃ mṛtsurabhināyaṃ tṛptiṃ girīśvaraḥ //
mune rahasyupāghrāya premādhikyaṃ babhūva tat

menā spṛhāvatī keṣu na me śaṃsati vastuṣu //
kiṃcidiṣṭaṃ hriyāpṛcchadanuvelaṃ sakhī giriḥ

upetya dauhadaṃ śalyaṃ yadvavre'paśyadāśu tat //
ānītaṃ neṣṭamasyāddhā nāsādhyaṃ tridivai'pi hi

pracīyamānāvayavā nistīrya dohadavyathām //
reje menā bālalatā naddhapatrādhikā yathā

girissagarbhāṃ mahiṣīmamaṃsta dharaṇīmiva //
nidhānagarbhāmabhyantarlīnavahniṃ śamīmiva

priyāprīteśca manasaḥ svārjitadraviṇasya ca //
samunnataiḥ śruteḥ prājñaḥ kriyāścakre yathocitāḥ

dadarśa kāle menāṃ sa pratītaḥ prasavonmukhīm //
abhritāṃ ca divaṃ garbhagṛhe bhiṣagadhiṣṭhite

dṛṣṭvā priyāṃ śubhāṅgī vai mumodātigirīśvaraḥ //
garbhasthajagadambāṃ hi mahātejovatīntadā

tasminnavasare devā mune viṣṇvādayastathā //
munayaśca samāgamya garbhasthāṃ tuṣṭuvuśśivām

devā ūcuḥ //
durge jaya jaya prājñe jagadamba maheśvari //
satyavrate satyapare trisatye satyarūpiṇī

satyasthe satyasuprīte satyayone ca satyataḥ //
satyasatye satyanetre prapannāḥ śaraṇaṃ ca te

śivapriye maheśāni devaduḥkhakṣayaṃkari //
trailokyamātā śarvāṇī vyāpinī bhaktavatsalā

āvirbhūya trilokeśi devakāryaṃ kuruṣva ha //
sanāthāḥ kṛpayā te hi vayaṃ sarve maheśvari

tvattaḥ sarve ca sukhino labhante sukhamuttamam //
tvāmvinā na hi kiṃcidvai śobhate tribhaveṣvapi

brahmovāca //
itthaṃ kṛtvā maheśānyā garbhasthāyā bahustutim //
prasannamanaso devāssvaṃ svaṃ dhāma yayustadā

vyatīte navame māse daśame māsi pūrṇataḥ //
garbhasthāyā gatindradhre kālikā jagadambikā

tadā susamayaścāsīcchāntabhagrahatārakaḥ //
nabhaḥ prasannatāṃ yātaṃ prakāśassarvadikṣu hi

mahī maṃgalabhūyiṣṭhā savanagrāmasāgarā //
sarassravantīvāpīṣu puphulluḥ paṃkajāni vai

vavuśca vividhā vātāssukhasparśā munīśvara //
mumudussādhavassarve'satānduḥkhamabhūddrutam

dundubhīnvādayāmāsurnabhasyāgatya nirjarāḥ //
puṣpavṛṣṭirabhūttatra jagurgandharvasattamāḥ

vidyādharastriyo vyomni nanṛtuścāpsarāstathā //
tadotsavo mahānāsīddevādīnāṃ nabhaḥsthale

tasminnavasare devī pūrvaśaktiśśivā satī //
āvirbabhūva purato menāyā nijarūpataḥ

vasaṃtartau madhau māse navamyāṃ mṛgadhiṣṇyake //
arddharātre samutpannā gaṃgeva śaśimaṇḍalāt

samaye tatsvarūpeṇa menakā jaṭharācchivā //
samudbhūya samutpannā sā lakṣmīriva sāgarāt

tatastasyāṃ tu jātāyāṃ prasanno'bhūttadā bhavaḥ //
anukūlo vavau vāyurgambhīro gaṃdhayukśubhaḥ

babhūva puṣpavṛṣṭiśca toyavṛṣṭi purassaram //
jajvaluścāgnayaḥ śāntā jagarjuśca tadā ghanāḥ

tasyāṃ tu jāyamānāyāṃ sarvasvaṃ samapadyata //
himavannagare tatra sarva duḥkhaṃ kṣayaṃ gatam

tasminnavasare tatra viṣṇvādyāssakalāssurāḥ //
ājagmuḥ sukhinaḥ prītyā dadṛśurjagadambikām// /

tuṣṭuvustāṃ śivāmambāṃ kālikāṃ śivakāminīm //
divyārūpāṃ mahāmāyāṃ śivalokanivāsinīm

/
// devā ūcuḥ //
jagadamba mahādevi sarvasiddhividhāyini //
devakāryakarī tvaṃ hi sadātastvāṃ namāmahe

sarvathā kuru kalyāṇaṃ devānāṃ bhaktavatsale //
menāmanorathaḥ pūrṇaḥ kṛtaḥ kuru harasya ca

// brahmovāca //
itthaṃ stutvā śivāṃ devīṃ viṣṇvādyā supraṇamya tām //
svaṃsvaṃ dhāma yayuḥ prītāśśaṃsantastadgatiṃ parām

tāntu dṛṣṭvā tathā jātāṃ nīlotpaladalaprabhāma//
śyāmā sā menakā devī mudamāpāti nārada

divyarūpaṃ vilokyānu jñānamāpa giripriyā //
vijñāya parameśānīṃ tuṣṭāvātipraharṣitā

menovāca //
jagadamba maheśāni kṛtātikaruṇā tvayā //
āvirbhūtā mama puro vilasantī yadambike

tvamādyā sarvaśaktīnāṃ trilokajananī śive //
śivapriyā sadā devī sarvadevastutā parā

kṛpāṃ kuru maheśāni mama dhyānasthitā bhava //
etadrūpeṇa pratyakṣaṃ rūpaṃ dhehi sutāsamam

brahmovāca//
ityākarṇya vacastasyā menāyā bhūdharastriyāḥ//
pratyuvāca śivā devī suprasavāmaaripriyām

devyuvāca//
he mene tvaṃ purā māṃ ca susevitavatī ratā //
tvadbhaktyā suprasannāhaṃ varandātuṃ gatāntikam

varaṃ brūhīti madvāṇīṃ śrutvā te tadvaro vṛtaḥ //
sutā bhava mahādevī sā me devahitaṃ kuru

tathā dattvā varaṃ te'haṃ gatā svampadamādarāt //
samayaṃ prāpya tanayā bhavante girikāmini

divyarūpaṃ dhṛtaṃ medya yatte matsmaraṇaṃ bhavet//
anyathā martyabhāvena tavājñānaṃ bhavenmayi

yuvāṃ māṃ putribhāvena divyabhāvena vā sakṛt //
cintayantau kṛtasnehau yātāsstho madgatimparām

devakāryaṃ kariṣyāmi līlāṃ kṛtvā dbhutāṃ kṣitau //
śambhupatnī bhaviṣyāmi tārayiṣyāmi sajjanān

brahmovāca//
ityuktvāsīcchivā tūṣṇīmambikā svāttmamāyayā//
paśyantyāṃ mātari prītyā sadyo''bhūttanayā tanuḥ

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe pārvatījanmavarṇanaṃ nāma ṣaṣṭo'dhyāyaḥ