Shiva Purana · Chapter 2.3.3

nārada uvāca //
vidhe prājña mahādhīmanvada me vadatāṃ vara //
tataḥ paraṃ kimabhavaccaritaṃ viṣṇusadguro

adbhuteyaṃ kathā proktā menā pūrvagatiḥ śubhā //
vivāhaśca śrutassamyakparamaṃ caritaṃ vada

menāṃ vivāhya sa giriḥ kṛtavānkiṃ tataḥ param //
pārvatī kathamutpannā tasyāṃ vai jagadambikā

tapassudussahaṃ kṛtvā kathaṃ prāpa patiṃ haram //
etatsarvaṃ samācakṣva vistarācchāṃkaraṃ yaśaḥ

// brahmovāca //
mune tvaṃ śṛṇu suprītyā śāṃkaraṃ suyaśaḥ śubham//
yacchrutvā brahmahā śuddhyetsarvānkāmānavāpnuyāt

yadā menāvivāhantu kṛtvāgacchadgirirgṛham//
tadā samutsavo jātastriṣu lokeṣu nārada

himācalo'pi suprītaścakāra paramotsavam//
bhūsurānbaṃdhuvargāṃśca parānānarca saddhiyā

sarve dvijāśca santuṣṭā dattvāśīrvacanaṃ varam //
yayustasmai svasvadhāma baṃdhuvargāstathāpare

himācalo'pi suprīto menayā sukhade gṛhe //
reme'nyatra ca susthāne nandanādivaneṣvapi

tasminnavasare devā mune viṣṇvādayo'khilāḥ //
munayaśca mahātmānaḥ prajagmurbhūdharāntike

dṛṣṭvā tānāgatāndevānpraṇanāma mudā giriḥ //
saṃmānaṃ kṛtavānbhaktyā praśaṃsansva vidhiṃ mahān

sāñjalirnataśīrṣo hi sa tuṣṭāva subhaktitaḥ //
romodgamo mahānāsīdgireḥ premāśravo'patan

tataḥ praṇamya suprīto himaśailaḥ prasannadhīḥ //
uvāca praṇato bhūtvā mune viṣṇvādikānsurān

himācala uvāca //
adya me saphalaṃ janma saphalaṃ sumahattapaḥ //
adya me saphalaṃ jñānamadya me saphalāḥ kriyāḥ

dhanyo'hamadya saṃjāto dhanyā me sakalā kṣitiḥ //
dhanyaṃ kulaṃ tathā dārāssarvaṃ dhanyaṃ na saṃśayaḥ

yataḥ samāgatā yūyaṃ militvā sarva ekadā //
māṃ nideśayata prītyocitaṃ mattvā svasevakam

// brahmovāca //
iti śrutvā mahīdhrasya vacanaṃ te surāstadā //
ūcurharyādayaḥ prītāḥ siddhiṃ matvā svakāryataḥ

devā ūcuḥ //
himācala mahāprājña śṛṇva smadvacanaṃ hitam //
yadarthamāgatāssarve tadbrūmaḥ prītito vayam

yā purā jagadambomā dakṣakanyā'bhavadgire //
rudrapatnī hi sā bhūtvā cikrīḍe suciraṃ bhuvi

pitṛto'nādaraṃ prāpya saṃsmṛtya svapaṇaṃ satī //
jagāma svapadaṃ tyaktvā taccharīraṃ tadāmbikā

sā kathā viditā loke tavāpi himabhūdhara//
evaṃ sati mahālābho bhaveddevagaṇasya hi

sarvasya bhavataścāpi syussarve te vaśāssurāḥ

//brahmovāca//
ityākarṇya vacasteṣāṃ haryādīnāṃ girīśvaraḥ//
tathāstviti prasannātmā provāca na ca sādaram

atha te ca samādiśya tadvidhimparamādarāt//
svayaṃ jagmuśca śaraṇamumāyāśśaṃkara striyaḥ

susthale manasā sthitvā sasmarurjagadambikām //
praṇamya bahuśastatra tuṣṭuvuḥ śraddhayā surāḥ

devā ūcuḥ //
devyume jagatāmamba śivalokanivāsinī //
sadāśivapriye durge tvāṃ namāmo maheśvari

śrīśaktiṃ pāvanāṃ śāntāṃ puṣṭimparamapāvanīm//
vayannāmāmahe bhaktyā mahadavyaktarūpiṇīm

śivāṃ śivakarāṃ śuddhāṃ sthūlāṃ sūkṣmāṃ parāyaṇām //
antarvidyāsuvidyābhyāṃ suprītāṃ tvāṃ namāmahe

tvaṃ śraddhā tvaṃ dhṛtistvaṃ śrīstvameva sarvagocarā //
tvandīdhitissūryyagatā svaprapañcaprakāśinī

yā ca brahmāṇḍasaṃsthāne jagajjīveṣu yā jagat //
āpyāyayati brahmāditṛṇāntaṃ tāṃ namāmahe

gāyatrī tvaṃ vedamātā tvaṃ sāvitrī sarasvatī

tvaṃ vārtā sarvajagatāṃ tvaṃ trayī dharmarūpiṇī

nidrā tvaṃ sarvabhūteṣu kṣudhā tṛptistvameva hi//
tṛṣṇā kāntiśchavistuṣṭissarvānandakarī sadā

tvaṃ lakṣmīḥ puṇyakartṝṇāṃ tvaṃ jyeṣṭhā pāpināṃ sadā //
tvaṃ śāntiḥ sarvajagatāṃ tvaṃ dhātrī prāṇapoṣiṇī /३३//
tvantasvarūpā bhūtānāṃ pañcānāmapi sārakṛt //
tvaṃ hi nītibhṛtāṃ nītirvyavasāyasvarūpiṇī

gītistvaṃ sāmavedasya granthistvaṃ yajuṣāṃ hutiḥ //
ṛgvedasya tathā mātrātharvaṇasya parā gatiḥ

samastagīrvāṇagaṇasya śaktistamomayī dhātṛguṇaikadṛśyā //
rajaḥ prapaṃcāttu bhavaikarūpā yā na śrutā bhavyakarī stuteha

saṃsārasāgarakarālabhavāṅgaduḥkhanistārakāritaraṇiśca nivītahīnā //
aṣṭāṅgayogaparipālanakelidakṣāṃ vindhyāgavāsaniratāṃ praṇamāma tāṃ vai

nāsākṣi vaktrabhujavakṣasi mānase ca dhṛtyā sukhāni vitanoṣi sadaiva jantoḥ //
nidreti yāti subhagā jagatī bhavā naḥ sā naḥ prasīdaṃtu bhavasthitipālanāya

brahmovāca //
iti stutvā maheśānīṃ jagadambāmumāṃ satīm //
supreyamanasaḥ sarve tasthuste darśanepsavaḥ

iti śrīśivamahāpurāṇe ditīyāyāṃ rudrasaṃhitāyāṃ tṛtīye pārvatīkhaṃḍe devastutirnāma tṛtīyo'dhyāyaḥ