Shiva Purana · Chapter 2.3.31

// brahmovāca //
tayorbhaktiṃ śive jñātvā parāmavyabhicāriṇīm //
sarve śakrādayo devāścicinturiti nārada

devā ūcuḥ //
ekāntabhaktyā śailaścetkanyāṃ tasmai pradāsyati //
dhruvaṃ nirvāṇatā sadyassa prāpsyati ca bhārate

anantaratnādhāraścetpṛthvī tyaktvā prayāsyati //
ratnagarbhābhidhā bhūmirmithyaiva bhavitā dhruvam

sthāvaratvaṃ parityajya divyarūpaṃ vidhāya saḥ //
kanyāṃ śūlabhṛte dattvā śivalokaṃ gamiṣyati

mahādevasya sārūpyaṃ lapsyate nātra saṃśayaḥ //
tatra bhuktvā varānbhogāṃstato mokṣamavāpsyati

brahmovāca //
ityālocya surāssarve kṛtvā cāmantraṇaṃ mithaḥ //
prasthāpayitumaicchaṃste guruṃ tatra suvismitāḥ

tataḥ śakrādayo devāssarve guruniketanam//
jagmuḥ prītyā savinayā nārada svārthasādhakāḥ

gatvā tatra guruṃ natvā sarve devāssavāsavāḥ//
cakrurnivedanaṃ tasmai gurave vṛttamādarāt

/
// devā ūcuḥ //
guro himālayagṛhaṃ gacchāsmatkāryyasiddhaye //
tatra gatvā prayatnena kuru nindāñca śūlinaḥ

pinākinā vinā durgā varaṃ nānyaṃ variṣyati //
anicchayā sutāṃ dattvā phalaṃ tūrṇaṃ labhiṣyati

kālenaivādhunā śaila idānīṃ bhuvi tiṣṭhatu//
anekaratnādhāraṃ taṃ sthāpaya tvaṃ kṣitau gurau

// brahmovāca //
iti devavacaḥ śrutvā pradadau karṇayoḥ karam //
na svīcakāra sa gurussmarannāma śiveti ca

atha smṛtvā mahādevaṃ bṛhaspatirudāradhīḥ//
uvāca devavaryāṃśca dhikkṛtvā ca punaḥ punaḥ

bṛhaspatiruvāca //
sarve devāssvārthaparāḥ parārthadhvaṃsakārakāḥ //
kṛtvā śaṃkaraniṃdā hi yāsyāmi narakaṃ dhruvam

kaścinmadhye ca yuṣmākaṃ gacchecchailāntikaṃ surāḥ //
saṃpādayetsvābhimataṃ śailendraṃ pratibodhya ca

anicchayā sutāṃ dattvā sukhaṃ tiṣṭhatu bhārate //
tasmai bhaktyā sutāṃ dattvā mokṣaṃ prāpsyati niścitam

paścātsaptarṣayassarve bodhayiṣyanti parvatam //
pinākinā vinā durgā varaṃ nānyaṃ variṣyati

athavā gacchata surā brahmalokaṃ savāsavāḥ //
vṛttaṃ kathayata svaṃ tatsa vaḥ kāryaṃ kariṣyati

brahmovāca //
tacchrutvā te samālocyājagmurmama sabhāṃ surāḥ //
sarve nivedayāṃcakrurnatvā tadgatamādarāt

devānāṃ tadvacaḥ śrutvā śivanindākaraṃ tadā //
vedavaktā vilapyāhaṃ tānavocaṃ surānmune

brahmovāca //
nāhaṃ kartuṃ kṣamo vatsāḥ śivanindāṃ sudussahām //
saṃpadvināśa rūpāñca vipadāṃ bījarūpiṇīm

surā gacchata kailāsaṃ santoṣayata śaṃkaram //
prasthāpayata taṃ śīghraṃ himālayagṛhaṃ prati

sa gacchedupaśaileśamātmanindāṃ karotu vai //
paranindāvināśāya svanindā yaśase matā

brahmovāca //
śrutveti madvaco devā māṃ praṇamya mudā ca te //
kailāsaṃ prayayuḥ śīghraṃ śailānāmadhipaṃ girim/२४//
tatra gatvā śivaṃ dṛṣṭvā praṇamya natamastakāḥ//
sukṛtāṃjalayassarve tuṣṭuvustaṃ surā haram

// devā ūcuḥ //
devadeva mahādeva karuṇākara śaṃkara //
vayaṃ tvāṃ śaraṇāpannāḥ kṛpāṃ kuru namo'stu te

tvaṃ bhaktavatsalaḥ svāminbhaktakāryakarassadā //
dīnoddharaḥ kṛpāsindhurbhaktāpadvinimocakaḥ

// brahmovāca//
iti stutvā maheśānaṃ sarve devāssavāsavāḥ //
sarvaṃ nivedayāṃcakrustadvṛttaṃ tata ādarāt

tacchrutvā devavacanaṃ svīcakāra maheśvaraḥ //
devān suyāpayāmāsa tānāśvāsya vihasya saḥ

devā mumudire sarve śīghraṃ gatvā svamaṃdiram//
siddhaṃ matvā svakāryyaṃ hi praśaṃsantassadāśivam

tataḥ sa bhagavāñchambhurmaheśo bhaktavatsalaḥ //
prayayau śailabhūpañca māyeśo nirvikāravān

yadā śailassabhāmadhye samuvāsa mudānvitaḥ //
bandhuvargaiḥ parivṛtaḥ pārvatīsahitassvayam

etasminnantare tatra hyājagāma sadāśivaḥ //
daṇḍī chatrī divyavāsā bibhrattilakamujjvalam

kare sphaṭikamālāñca śālagrāmaṃ gale dadhat //
japannāma harerbhaktyā sādhuveṣadharau dvijaḥ

taṃ ca dṛṣṭvā samuttasthau sagaṇo'pi himālayaḥ //
nanāma daṇḍavadbhūmau bhaktyātithimapūrvakam

nanāma pārvatī bhaktyā prāṇeśaṃ viprarūpiṇam//
jñātvā taṃ manasā devī tuṣṭāva parayā mudā

āśiṣaṃ yuyuje viprassarveṣāṃ prītitaśśivaḥ//
śivāyā adhikaṃ tāta manobhilaṣitaṃ hṛdā

madhuparkādikaṃ sarvaṃ jagrāha brāhmaṇo mudā //
dattaṃ śailādhirājena himāṃgena mahādarāt

papraccha kuśalaṃ cāsya himādriḥ parvatottamaḥ//
taṃ dvijendraṃ mahāprītyā sampūjya vidhivanmune

punaḥ papraccha śaileśastaṃ tataḥ ko bhavāniti //
uvāca śīghraṃ viprendro girīdraṃ sādaraṃ vacaḥ

viprendra uvāca //
brāhmaṇo'haṃ giriśreṣṭha vaiṣṇavo budhasattamaḥ //
ghaṭikīṃ vṛtimāśritya bhramāmi dharaṇītale

manoyāyī sarva gāmī sarvajñohaṃ gurorbalāt //
paropakārī śuddhātmā dayāsindhurvikārahā

mayā jñātaṃ harāya tvaṃ svasutāṃ dātumicchasi//
imāṃ padmasamāṃ divyāṃ vararūpāṃ sulakṣaṇām

nirāśrayāyāsaṃgāya kurūpāyāguṇāya ca //
śmaśānavāsine vyālagrāhirūpāya yogine

digvāsase kugātrāya vyālabhūṣaṇadhāriṇe //
ajñātakulanāmne ca kuśīlāyāvihāriṇe

vibhūtidigdhadehāya saṃkruddhāyāvivekine //
ajñātavayase'tīva kujaṭādhāriṇe sadā

sarvāśrayāya bhramiṇe nāgahārāya bhikṣave
kumārganiratāyātha vedā'dhvatyāgine haṭhāt

iyaṃ te buddhiracala na hi maṃgaladā khalu //
vibodha jñānināṃ śreṣṭha nārāyaṇakulodbhava

na te pātrānurūpaśca pārvatīdānakarmaṇi //
mahājanaḥ smeramukhaḥ śrutamātrādbhaviṣyati

paśya śailādhipa tvaṃ ca na tasyaikosti bāndhavaḥ //
mahāratnākarastvañca tasya kiñciddhanaṃ na hi

bāndhavānmenakāṃ kudhrapate śīghraṃ sutāṃstathā //
sarvānpṛccha prayatnena paṇḍitānpārvatī vinā

rogiṇo nauṣadhaṃ śaśvadrocate girisattama //
kupathyaṃ rocate'bhīkṣṇaṃ mahādoṣakaraṃ sadā

brahmovāca //
ityuktvā brāhmaṇaḥ śīghraṃ sa vai bhuktvā mudānvitaḥ //
jagāma svālayaṃ śānto nānālīlākara śśivaḥ

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivamāyāvarṇanaṃ nāmaikatriṃśo'dhyāyaḥ