Shiva Purana · Chapter 2.3.30

// nārada uvāca//
vidhe tāta mahābhāga dhanyastvaṃ paramārthadṛk //
adbhuteyaṃ kathāśrāvi tvadanugrahato mayā

gate hare svaśaile hi pārvatī sarvamaṃgalā //
kiṃ cakāra gatā kutra tanme vada mahāmate

// brahmovāca //
śṛṇu suprītitastāta yajjātaṃ tadanantaram //
hare gate nijasthāne tadvadāmi śivaṃ smaran

pārvatyapi sakhīyuktā rūpaṃ kṛtvā tu sārthakam //
jagāma svapiturgehaṃ mahādeveti vādinī

pārvatyāgamanaṃ śrutvā menā ca sa himācalaḥ //
divyaṃ yānaṃ samāruhya prayayau harṣavihvalaḥ

purohitaśca paurāśca sakhyaścaivāpyanekaśaḥ //
samvandhinastathānye ca sarve te ca samāyayuḥ

bhrātaraḥ sakalā jagmurmainākapramukhāstadā //
jayaśabdaṃ prabruvanto mahāharṣasamanvitāḥ

saṃsthāpya maṃgalaghaṭaṃ rājavartmani rājite //
candanāgarukastūrīphalaśākhāsamanvite

sapurodhobrāhmaṇaiśca munibhirbrahmavādibhiḥ //
nārībhirnartakībhiśca gajendrādrisuśobhitaiḥ

paritaḥ parito raṃbhāstambhavṛndasamanvite//
patiputravatīyoṣitsamūhairdīpahastakaiḥ //2.3.30.१ ०//
dvijavṛndaiśca saṃyukte kurvadbhirmaṅgaladhvanim //
nānāprakāravādyaiśca śaṃkhadhvanibhiranvite

etasminnantare durgā jagāma svapurāntikam //
viśaṃtī nagaraṃ devī dadarśa pitarau punaḥ

suprasannau pradhāvantau harṣavihvalamānasau //
dṛṣṭvā kālī suprahṛṣṭā svālibhiḥ praṇanāma tau

tau sampūrṇāśiṣaṃ dattvā cakratustau svavakṣasi //
he vatse tvevamuccārya rudantau premavihvalau

tatassvakīyā apyasyā anyā nāryāpi saṃmudā //
bhrātṛstriyopi suprītyā dṛḍhāliṃganamādadhuḥ

sādhitaṃ hi tvayā samyaksukāryaṃ kulatāraṇam //
tvatsadācaraṇenāpi pāvitāḥ smākhilā vayam

iti sarve supraśaṃsya praṇemustāṃ praharṣitāḥ //
candanaiḥ suprasūnaiśca samānarcuśśivāṃ mudā

tasminnavasare devā vimānasthā mudāmbare //
puṣpavṛṣṭiṃ śubhāṃ cakrurnatvā tāṃ tuṣṭuvuḥ stavaiḥ

tadā tāṃ ca rathe sthāpya sarve śobhānvite vare //
puraṃ praveśayāmāsussarve viprādayo mudā

atha viprāḥ purodhāśca sakhyonyāśca striyaḥ śivām //
gṛhaṃ praveśayāmāsurbahumānapurassaram

striyo nirmacchanaṃ cakrurviprā yuyujurāśiṣaḥ //
himavānmenakā mātā mumodāti munīśvara

svāśramaṃ saphalaṃ mene kuputrātputrikā varā //
himavānnāradaṃ tvāñca saṃstuvan sādhusādhviti

brāhmaṇebhyaśca baṃdibhyaḥ parvatendro dhanaṃ dadau //
maṅgalaṃ pāṭhayāmāsa sa dvijebhyo mahotsavam

evaṃ svakanyayā hṛṣṭau pitarau bhrātarastathā //
jāmayaśca mahāprītyā samūṣuḥ prāṃgaṇe mune

tatassa himavān tāta suprahṛṣṭāḥ prasannadhīḥ //
sammānya sakalānprītyā snātuṃ gaṃgāṃ jagāma ha

etasminnaṃtare śaṃbhussulīlo bhaktavatsalaḥ //
sunartakanaṭo bhūtvā menakāsaṃnidhiṃ yayau

śṛṃgaṃ vāme kare dhṛtvā dakṣiṇe ḍamaru tathā //
pṛṣṭhe kaṃthāṃ raktavāsā nṛtyagānaviśāradaḥ

tatassunaṭarūposau menakāyā gaṇe mudā //
cakre sunṛtyaṃ vividhaṃ gānaṃ cātimanoharam

śṛṃgaṃ ca ḍamaruṃ tatra vādayāmāsa sudhvanim //
mahatīṃ vividhāṃ tatra sa cakāra manoharām

tāṃ draṣṭuṃ nāgarāssarve puruṣāśca striyastathā //
ājagmussahasā tatra bālā vṛddhā api dhruvam

śrutvā sugītaṃ taddṛṣṭvā sunṛtyaṃ ca manoharam //
sahasā mumuhussarve menāpi ca tadā mune

/
mūrcchāṃ saṃprāpya sā durgā sudṛṣṭvā hṛdi śaṃkaram //
triśūlādikacihnāni bibhrataṃ cātisundaram

vibhūtivibhūṣitaṃ ramyamasthimālāsamanvitam //
trilocanojjvaladvaktraṃ nāgāyajñopavītakam

varaṃ vṛṇvityuktavantaṃ gauravarṇaṃ maheśvaram //
dīnabandhu dayāsindhuṃ sarvathā sumanoharam

hṛdayasthaṃ haraṃ dṛṣṭvedṛśaṃ sā praṇanāma tam //
varaṃ vavre mānasaṃ hi patirme tvaṃ bhaveti ca

/
varaṃ dattvā śivaṃ cātha tādṛśaṃ prītito hṛdā //
antardhāya punastatra sunanartta sa bhikṣukaḥ

tato menā suratnāni svarṇapātrasthitāni ca //
tasmai dātuṃ yayau prītyā tadbhūti prītamānasaḥ

tāni na svīcakārāsau bhikṣāṃ yāce śivāṃ ca tām //
punassunṛtyaṃ gānaśca kautukātkartumudyataḥ

menā tadvacanaṃ śrutvā cukopāti suvismitā //
bhikṣukaṃ bhartsayāmāsa bahiṣkartumiyeṣa sā

etasminnantare tatra gaṃgāto girirāyayau //
dadarśa purato bhikṣuṃ prāṃgaṇasthaṃ narākṛtim

śrutvā menāmukhādvṛttaṃ tatsarvaṃ sucukopa saḥ //
ājñāṃ cakārānucarānbahiṣkartuñca taṃ naṭam

mahāgnimiva duḥsparśaṃ prajvalantaṃ sutejasam //
na śaśāka bahiṣkartuṃ kopi taṃ munisattama

tatassa bhikṣukastāta nānālīlāviśāradaḥ //
darśayāmāsa śailāya svaprabhāvamanantakam

śailo dadarśa taṃ tatra viṣṇurūpadharaṃ drutam //
kirīṭinaṃ kuṇḍalinaṃ pītavastraṃ caturbhujam

yadyatpuṣpādikaṃ dattaṃ pūjākāle gadābhṛte //
gātre śirasi tatsarvaṃ bhikṣukasya dadarśa ha

tato dadarśa jagatāṃ sraṣṭāraṃ sa caturmukham //
raktavarṇaṃ paṭhantañca śrutisūktaṃ girīśvaraḥ

tatassūryyasvarūpañca jagaccakṣussvarūpakam //
dadarśa girirājassa kṣaṇaṃ kautukakāriṇām

tato dadarśa taṃ tāta rudrarūpaṃ mahādbhutam //
pārvatī sahitaṃ ramyaṃ vihasantaṃ sutejasam

tatastejassvarūpañca nirākāraṃ niraṃjanam //
nirupādhiṃ nirīhañca mahādbhutamarūpakam

evaṃ bahūni rūpāṇi tasya tatra dadarśa saḥ //
suvismito babhūvāśu paramānandasaṃyutaḥ

athāsau bhikṣuvaryyo hi tasmāttasyāśca sūtikṛt //
bhikṣāṃ yayāce durgāntāṃ nānyajjagrāha kiñcana

na svīcakāra śailaindro mohitaśśivamāyayā //
bhikṣuḥ kiṃcinna jagrāha tatraivāntardadhe tataḥ

tadā babhūva sujñānaṃ menāśaileśayoriti //
āvāṃ śivo vañcayitvā svasthānaṃ gatavānprabhuḥ

tayorvicintya tatraiva śive bhaktirabhūtparā //
mahāmokṣakarī divyā sarvānandapradāyinī

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṃḍe pārvatīpratyāgamanamahotsavavarṇanaṃ nāma triṃśo'dhyāyaḥ