Shiva Purana · Chapter 2.3.32

// brahmovāca //
brāhmaṇasya vacaḥ śrutvā menovāca himālayam //
śokenāsādhunayanā hṛdayena vidūyatā

menovāca //
śṛṇu śailendra madvākyaṃ pariṇāme sukhāvaham //
pṛccha śaivavarānsarvānkimuktaṃ brāhmaṇena ha

nindānena kṛtā śambhorvaiṣṇavena dvijanmanā //
śrutvā tāṃ me mano'tīva nirviṇṇaṃ hi nageśvara

tasmai rudrāya śaileśa na dāsyāmi sutāmaham //
kurūpaśīlanamme hi sulakṣaṇayutāṃ nijām

na manyase vaco cenme mariṣyāmi na saṃśayaḥ //
tyakṣyāmi ca gṛhaṃ sadyo bhakṣayiṣyāmi vā viṣam

gale baddhvāṃbikāṃ rajjvā yāsyāmi gahanaṃ vanam //
mahāmbudhau majjayiṣye tasmai dāsyāmi no sutām

ityuktvāśu tathā gatvā menā kopālayaṃ śucā //
tyaktvā hāraṃ rudantī sā cakāra śayanaṃ bhuvi

etasminnantare tāta śambhunā sapta eva te //
saṃsmṛtā ṛṣayassadyo virahavyākulātmanā

ṛṣayaścaiva te sarve śambhunā saṃsmṛtā yadā //
tadā''jagmuḥ svayaṃ sadyaḥ kalpavṛkṣā ivāpare

arundhatī tathā''yātā sākṣātsiddhirivāparā //
tāndraṣṭvā sūryasaṃkāśānvijahau svajapaṃ haraḥ

sthitvāgre ṛṣayaḥ śreṣṭhaṃ natvā stutvā śivaṃ mune //
menire ca tadātmānaṃ kṛtārthaṃ te tapasvinaḥ

tato vismayamāpannā nama skṛtya sthitāḥ punaḥ //
procuḥ prāñjalayaste vai śivaṃ lokanamaskṛtam

ṛṣaya ūcuḥ //
sarvotkṛṣṭaṃ mahārāja sārvabhauma divaukasām //
svabhāgyaṃ varṇyate'smābhiḥ kiṃ punassakalottamam

tapastaptaṃ tridhā pūrvaṃ vedādhyayanamuttamam //
agnayaśca hutāḥ pūrvaṃ tīrthāni vividhāni ca

vāṅmanaḥkāyajaṃ kiṃcitpuṇyaṃ smaraṇasambhavam //
tatsarvaṃ saṃgataṃ cādya smaraṇānugrahāttava

yo vai bhajati nityaṃ tvāṃ kṛtakṛtyo bhavennaraḥ //
kiṃ puṇyaṃ varṇyate teṣāṃ yeṣāṃ ca smaraṇaṃ tava

sarvotkṛṣṭā vayaṃ jātāḥ smaraṇātte sadāśiva //
manorathapathaṃ naiva gacchasi tvaṃ kathaṃcana

vāmanasya phalaṃ yadvajjanmāndhasya dṛśau yathā //
vācālatvañca mūkasya raṃkasya nidhidarśanam

paṅgorgirivarākrāntirvandhyāyaḥ prasavastathā //
darśanaṃ bhavatastadvajjātaṃ no durlabhaṃ prabho

adya prabhṛti lokeṣu mānyāḥ pūjyā munīśvarāḥ //
jātāste darśanādeva svamuccaiḥ padamāśritāḥ

atra kiṃ bahunoktena sarva thā mānyatāṃ gatāḥ //
darśanāttava deveśa sarvadeveśvarasya hi

pūrṇānāṃ kiñca kartavyamasti cetparamā kṛpā //
sadṛśaṃ sevakānāṃ tu deyaṃ kāryaṃ tvayā śubham

// brahmovāca //
ityevaṃ vacanaṃ śrutvā teṣāṃ śambhurmaheśvaraḥ //
laukikācāramāśritya ramyaṃ vākyamupādade

śiva uvāca //
ṛṣayaśca sadā pūjyā bhavantaśca viśeṣataḥ //
yuṣmākaṃ kāraṇādviprāḥ smaraṇaṃ ca mayā kṛtam

mamāvasthā bhavadbhiśca jñāyate hyupakārikā //
sādhanīyā viśeṣeṇa lokānāṃ siddhihetave

devānāṃ duḥkhamutpannaṃ tā rakātsudurātmanaḥ //
brahmaṇā ca varau dattaḥ kiṃ karomi durāsadaḥ

mūrtayo'ṣṭau ca yāḥ proktā madīyāḥ paramarṣayaḥ //
tāssarvā upakārāya na tu svārthāya tatsphuṭam

tathā ca kartukāmohaṃ vivāhaṃ śivayā saha //
tayā vai sutapastaptaṃ duṣkaraṃ paramarṣibhiḥ

tasyai paraṃ phalaṃ deyamabhīṣṭaṃ taddhitāvaham //
etādṛśaḥ paṇo me hi bhaktānandapradaḥ sphuṭam

pārvatīvacanādbhikṣurūpo yāto girergṛham //
ahaṃ pāvitavānkālīṃ yato līlāviśāradaḥ

māṃ jñātvā tau paraṃ brahma dampatī parabhaktitaḥ //
dātukāmāvabhūtāṃ ca svasutāṃ vedarītitaḥ

devapreraṇayāhaṃ vai kṛtavānasmi nindanam //
tadā svasya ca tadbhaktiṃ vihantuṃ vaiṣṇṇavātmanā

tacchrutvā tau sunirviṇṇo taddhīnau saṃbabhūvatuḥ //
svakanyāṃ necchato dātuṃ mahyaṃ hi munayo'dhunā

tasmādbhavanto gacchantu himācalagṛhaṃ dhruvam //
tatra gatvā girivaraṃ tatpatnīñca prabodhaya

kathanīyaṃ prayatnena vacanaṃ vedasammitam //
sarvathā karaṇīyantadyathā syātkāryyamuttamam

udvāhaṃ kartumicchāmi tatputryā saha sattamāḥ //
svīkṛtasta dvivāho me varo dattaśca tādṛśaḥ

atra kiṃ bahunoktena bodhanīyo himālayaḥ //
tathā menā ca boddhavyā devānāṃ syāddhitaṃ yathā

bhavadbhiḥ kalpito yo vai vidhissyādadhikastataḥ //
bhavatāñcaiva kāryyaṃ tu bhavantaḥ kāryyabhāginaḥ

// brahmovāca //
ityevaṃ vacanaṃ śrutvā munayaste'malāśayāḥ //
ānandaṃ lebhire sarve prabhuṇānugrahīkṛtāḥ

vayaṃ dhanyā abhūvam̐śca kṛtakṛtyāśca sarvathā //
vaṃdyā yātāśca sarveṣāṃ pūjanīyā viśeṣataḥ

brahmaṇā viṣṇunā yo vai vandyassarvārthasādhakaḥ//
sosmānpreṣayate preṣyānkārye lokasukhāvahe

ayaṃ vai jagatāṃ svāmī pitā sā jananī matā//
ayaṃ yuktaśca sambandho varddhatāṃ candravatsadā

brahmovāca//
ityuktvā hyṛṣayo divyā namaskṛtya śivaṃ tadā //
gatā ākāśamārgeṇa yatrāsti himavatpuram

dṛṣṭvā tāṃ ca puraṃ divyā mṛṣayaste'tivismitāḥ //
varṇayantaśca svaṃ puṇyamabruvanvai parasparam

// ṛṣaya ūcuḥ //
puṇyavanto vayaṃ dhanyā dṛṣṭvaitaddhimava tpuram //
yasmādevaṃvidhe kāryye śivenaiva niyojitāḥ

alakāyāśca svargācca bhogavatyāstathā punaḥ //
viśeṣeṇāmarāvatyā dṛśya te puramuttamam

sugṛhāṇi suramyāṇi sphaṭikairvividhairvaraiḥ //
maṇibhirvā vicitrāṇi racitānyaṅgaṇāni ca

sūryakāntāśca maṇayaścandrakāntāstathaiva ca //
gṛhe gṛhe vicitrāśca vṛkṣātsvargasamudbhavāḥ

toraṇānāṃ tathā lakṣmīrdṛśyate ca gṛhegṛhe //
vividhāni vicitrāṇi śukahaṃsairvimānakaiḥ

vitānāni vicitrāṇi cailavattoraṇaissaha //
jalāśayānyanekāni dīrghikā vividhāḥ sthitāḥ

udyānāni vicitrāṇi prasannaiḥ pūjitānyatha //
narāśca devatāssarve striyaścāpsarasastathā

karmabhūmau yājñikāśca paurāṇāssvargakāmyayā //
kurvanti te vṛthā sarve vihāya himavatpuram

yāvanna dṛṣṭametacca tāvatsvargaparā narāḥ //
dṛṣṭrametadyadā viprāḥ kiṃ svargeṇa prayojanam

// brahmovāca //
ityevamṛṣivaryyāste varṇayantaḥ puraśca tat//
gatā haimālayaṃ sarve gṛhaṃ sarvasamṛddhimat

tāndraṣṭvā sūryasaṃkāśān himavānvismito'bravīt //
dūrādākāśamārgasthānmunīnsapta sutejasaḥ

// himavānuvāca //
saptaite sūryyasaṃkāśāḥ samāyāṃti madantike //
pūjā kāryyā prayatnena munīnāṃ ca mayādhunā

vayaṃ dhanyā gṛhasthāśca sarveṣāṃ sukhadāyinaḥ//
yeṣāṃ gṛhe samāyānti mahātmāno yadīdṛśāḥ

brahmovāca//
etasminnantare caivākāśādetya bhuvi sthitān //
sanmukhe himavāndṛṣṭvā yayau mānapurassaram

kṛtāṃjalirnataskandhaḥ saptarṣīnsupraṇamya saḥ //
pūjāṃ cakāra teṣāṃ vai bahumānapurassaram

hitāssaptarṣayaste ca himavantannageśvaram//
gṛhītvocuḥ prasannāsyā vacanaṃ maṅgalālayam

yathāgrataśca tānkṛtvā dhanyā mama gṛhāśramaḥ //
ityuktvāsanamānīya dadau bhaktipurassaram

āsaneṣūpaviṣṭeṣu tadājñaptassvayaṃ sthitaḥ //
uvāca himavām̐statra munīñjyotirmayāstadā

himālaya uvāca //
dhanyo hi kṛtakṛtyohaṃ saphalaṃ jīvita mama //
lokeṣu darśanīyohaṃ bahutīrthasamo mataḥ

yasmādbhavanto madgehamāgatā viṣṇurūpiṇaḥ //
pūrṇānāṃ bhavatāṃ kāryyaṃ kṛpaṇānāṃ gṛheṣu kim

tathāpi kiñcitkāryaṃ ca sadṛśaṃ sevakasya me //
kathanīyaṃ sudayayā saphalaṃ syājjanurmama

iti śrīśivamahāpurāṇe dvitīyāyāṃ rudrasaṃhitāyāntṛtīye pārvatīkhaṇḍe saptarṣyāgamanavarṇanaṃ nāma dvātriṃśo'dhyāyaḥ