Shiva Purana · Chapter 2.3.27

pārvatyuvāca //
śṛṇu dvijendra jaṭila madvṛttaṃ nikhilaṃ khalu //
sakhyuktaṃ me'dya yatsatyaṃ tattathaiva na cānyathā

manasā vacasā sākṣātkarmmaṇā patibhāvataḥ //
satyaṃ bravīmi no'satyaṃ vṛto vai śaṃkaro yā

jānāmi durllabhaṃ vastu kathamprāpyaṃ mayā bhavet //
tathāpi mana autsukyāttapyate'dya tapo mayā

// brahmovāca //
ityuktvā vacanantasmai sthitā sā girijā tadā //
uvāca brāhmaṇastatra tacchrutvā pārvatīvacaḥ

brāhmaṇa uvāca //
etāvatkālaparyyantammamecchā mahatī hyabhūt //
kiṃ vastu kāṃkṣatī devī kurute sumahattapaḥ

tajjñātvā nikhilaṃ devi śrutvā tvanmukhapaṃkajāt //
ito gacchāmyahaṃ sthānādyathecchasi tathā kuru

na kathyate tvayā mahyaṃ mitratvaṃ niṣphalambhavet //
yathā kāryyaṃ tathā bhāvi kathanīyaṃ sukhena ca

// brahmovāca //
ityuktvā vacanaṃ tasya yāvadgantumiyeṣa saḥ //
tāvacca pārvatī devī praṇamyovāca taṃ dvijam

// pārvatyuvāca //
kiṃ gamiṣyasi viprendra sthito bhava hitaṃ vada //
ityukte ca tayā tatra sthitvovāca sa daṇḍadhṛk

dvija uvāca //
yadi śrotumanā devi māṃ sthāpayasi bhaktitaḥ //
vadāmi tattvaṃ tatsarvaṃ yena te vayunambhavet

jānāmyahaṃ mahādevaṃ sarvathā gurudharmmataḥ //
pravadāmi yathārthaṃ hi sāvadhānatayā śṛṇu

vṛṣadhvajo mahādevo bhasmadigdho jaṭādharaḥ //
vyāghracarmmāṃbaradharaḥ saṃvīto gajakṛttinā

kapāladhārī sarpaughaissarvagātreṣu veṣṭitaḥ //
viṣadigdho'bhakṣyabhakṣo virūpākṣo vibhīṣaṇaḥ

avyaktajanmā satataṃ gṛhabhogavivarjitaḥ //
digaṃbaro daśabhujo bhūta pretānvitassadā

kena kāraṇena tvaṃ taṃ bhartāraṃ samīhase //
kva jñānaṃ te gataṃ devi tadvadādya vicārataḥ

pūrvaṃ śrutaṃ mayā caiva vratantasya bhayaṃkaram //
śṛṇu te nigadāmyadya yadi te śravaṇe ruciḥ

dakṣasya duhitā sādhvī satī vṛṣabhavāhanam//
vavre patiṃ purā daivāttatsaṃbhogaḥ pariśrutaḥ

kapālijāyeti satī dakṣeṇa parivarjitā //
yajñe bhāgapradānāya śaṃbhuścāpi vivarjitaḥ

sā tathaivāpamānena bhṛśaṃ kopākulā satī //
tatyājāsūnpriyāṃstatra tayā tyaktaśca śaṃkaraḥ

tvaṃ strīratnaṃ tava pitā rājā nikhila bhūbhṛtām //
tathāvidhaṃ patiṃ kasmādugreṇa tapasehase

dattvā suvarṇamudrāṃ ca grahītuṃ kācamicchasi //
hitvā ca caṃdanaṃ śubhraṃ kardamaṃ leptumicchasi

sūryyatejaḥ parityajya khadyotadyutimicchasi //
cīnāṃśukaṃ vihāyaiva carmmāṃbaramihecchasi

gṛhavāsamparityajya vanavāsaṃ samīhase //
lohamicchasi deveśa tyaktvā śevadhimuttamam

indrādilokapālāṃśca hitvā śivamanu vratā //
naitatsūktaṃ hi lokeṣu viruddhaṃ dṛśyate'dhunā

kva tvaṃ kamalapatrākṣī kvāsau vai trivilocanaḥ //
śaśāṃkavadanā tvaṃ ca paṃcavaktraḥ śivassmṛtaḥ

veṇī śirasi te divyā sarpiṇīva vibhāsitā //
jaṭājūṭaṃ śivasyeva prasiddhamparicakṣate

caṃdanaṃ ca tvadīyāṃge citābhasma śivasya ca //
kva dukūlaṃ tvadīyaṃ vai śāṃkaraṃ kva gajājinam

bhūṣaṇāni divyāni kva sarpāśśaṃkarasya ca //
kva carā devatāssarvāḥ kva ca bhūtabalipriyaḥ

kva vā mṛdaṃgavādaśca kva ca taḍḍamarustathā //
kva ca bherīkalāpaśca kva ca śṛṃgaravo'śubhaḥ

kva ca ḍhakkāmayaḥ śabdo galanādaḥ kva cāśubhaḥ //
bhavatyāśca śivasyaiva na yuktaṃ rūpamuttamam

yadi dravyaṃ bhavettasya kathaṃ syātsa digambaraḥ //
vāhanaṃ ca balīvardassāmagrī kāpi tasya na

vareṣu ye guṇāḥ proktā nārīṇāṃ sukhadāyakāḥ //
tanmadhye hi virūpākṣe ekopi na guṇaḥ smṛtaḥ

tavāpi kāmo dayito dagdhastena hareṇa ca //
anādarastadā dṛṣṭo hitvā tvāmanyato gataḥ

jātirna dṛśyate tasya vidyājñānaṃ tathaiva ca //
sahāyāśca piśācā hi viṣaṃ kaṇṭhe hi dṛśyate

ekākī ca sadā nityaṃ virāgī ca viśeṣataḥ //
tasmāttvaṃ hi hare naiva mano yoktuṃ tu cārhasi

kva ca hārastvadīyo vai kva ca tanmuṇḍamālikā //
aṃgarāgaḥ kva te divyaḥ citābhasma kva tattanau

sarvaṃ viruddhaṃ rūpādi tava devi harasya ca //
mahyaṃ na rocate hyetadyadicchasi tathā kuru

asadvastu ca yatkiṃcit tatsarvaṃ svayamīhase //
nirvartaya manastasmānnocedicchasi tatkuru

brahmovāca //
ityevaṃ vacanaṃ śrutvā tasya viprasya pārvatī //
uvāca kruddhamanasā śivanindāparaṃ dvijam

itiśrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṃḍe brahmacāripratāraṇavākyavarṇanaṃ nāma saptaviṃśo'dhyāyaḥ