Shiva Purana · Chapter 2.3.28

pārvatyuvāca //
etāvaddhi mayā jñātaṃ kaścidanyoyamāgataḥ //
idānīṃ sakalaṃ jñātamavadhyastvamviśeṣataḥ

tvayoktaṃ viditaṃ deva tadalīkaṃ na cānyathā //
yadi tvayoditaṃ syādvai viruddhaṃ nocyate tvayā

kadāciddṛśyate tādṛk veṣadhārī maheśvaraḥ //
svalīlayā parabrahma svarāgopāttavigrahaḥ

brahmacārisvarūpeṇa pratārayitumudyataḥ//
āgataśchalasaṃyuktaṃ vacovādīḥ kuyuktitaḥ/

śaṃkarasya svarūpaṃ tu jānāmi suviśeṣataḥ //
śivatattvamato vacmi suvicāryya yathārhataḥ

vastuto nirguṇo brahma saguṇaḥ kāraṇena saḥ //
kuto jātirbhavettasya nirguṇasya guṇātmanaḥ

sa sarvāsāṃ hi vidyānāmadhiṣṭhānaṃ sadāśivaḥ //
kiṃ tasya vidyayā kāryyaṃ pūrṇasya paramātmanaḥ

vedā ucchvāsarūpeṇa purā dattāśca viṣṇave //
śaṃbhunā tena kalpādau tatsamaḥ ko'sti suprabhuḥ

sarveṣāmādibhūtasya vayomānaṃ kutastataḥ //
prakṛtistu tato jātā kiṃ śaktestasya kāraṇam

ye bhajaṃti ca taṃ prītyā śaktīśaṃ śaṃkaraṃ sadā //
tasmai śaktitrayaṃ śaṃbhuḥ sa dadāti sadāvyayam

tasyaiva bhajanājjīvo mṛtyuṃ jayati nirbhayaḥ //
tasmānmṛtyuṃjayannāma prasiddhambhuvanatraye

tasyaiva pakṣapātena viṣṇurviṣṇutvamāpnuyāt //
brahmatvaṃ ca yathā brahmā devā devatvameva ca /१२//
darśanārthaṃ śivasyādau yathā gacchati devarāṭ//
bhūtādayastatparasya dvārapālāśśivasya tu

daṇḍaiśca mukuṭaṃ viddhaṃ mṛṣṭaṃ bhavati sarvataḥ //
kiṃ tasya bahupakṣeṇa svayameva mahāprabhuḥ

kalyāṇarūpiṇastasya sevayeha na kiṃ bhavet//
kiṃ nyūnaṃ tasya devasya māmicchati sadāśivaḥ

saptajanmadaridraḥ syātsevenno yadi śaṃkaram //
tasyaitatsevanālloko lakṣmīḥ syādanapāyinī

yadagre siddhayoṣṭau ca nityaṃ nṛtyaṃti toṣitum//
avāṅmukhāssadā tatra taddhitaṃ durllabhaṃ kutaḥ

yadyasya maṃgālānīha sevate śaṃkarasya na//
yathāpi maṃgalantasya smaraṇādeva jāyate

yasya pūjāprabhāveṇa kāmāssiddhyanti sarvaśaḥ //
kuto vikārastasyāsti nirvikārasya sarvadā

śiveti maṃgalannāma mukhe yasya nirantaram //
tasyaiva darśanādanye pavitrāssaṃti sarvadā

yadyapūtambhavedbhasma citāyāśca tvayoditam //
nityamasyāṃgagaṃ devaiśśirobhirddhāryate katham

yo devo jagatāṃ kartā bhartā hartā guṇānvitaḥ //
nirguṇaśśivasaṃjñaśca sa vijñeyaḥ kathambhavet

aguṇaṃ brahmaṇo rūpaṃ śivasya paramātmanaḥ //
tatkathaṃ hi vijānanti tvādṛśāstadbahirmukhāḥ

durācārāśca pāpāśca devebhyaste vinirgatāḥ //
tattvaṃ te naiva jānanti śivasyāguṇarūpiṇaḥ

śivanindāṃ karotīha tattvamajñāya yaḥ pumān //
ājanmasaṃcitaṃ puṇyaṃ bhasmībhavati tasya tat

tvayā niṃdā kṛtā yātra harasyāmita tejasaḥ //
tvatpūjā ca kṛtā yanme tasmātpāpambhajāmyaham

śivavidveṣiṇaṃ dṛṣṭvā sacelaṃ snānamācaret //
śivavidveṣiṇaṃ dṛṣṭvā prāyaścitaṃ samācaret

re re duṣṭa tvayā coktamahaṃ jānāmi śaṃkaram //
niścayena na vijñātaśśiva eva sanātanaḥ

yathā tathā bhavedrudro yathā vā bahurūpavān //
mamābhīṣṭatamo nityaṃ nirvikārī satāṃ priyaḥ

viṣṇurbrahmāpi na samastasya kvāpi mahātmanaḥ //
kuto'nye nirjarādyāśca kālādhīnāssadaivatam

iti budhyā samālokya svayā satyā sutattvataḥ //
śivārthaṃ vanamāgatya karomi vipulaṃ tapaḥ

sa eva parameśānassarveśo bhaktavatsalaḥ //
saṃprāptumme'bhilāṣo hi dīnānugrahakārakam

brahmovāca //
ityuktvā girijā sā hi girīśvarasutā mune //
virarāma śivaṃ dadhyo nirvikāreṇa cetasā

tadākarṇya vaco devyā brahmacārī sa vai dvijaḥ //
punarvacanamākhyātuṃ yāvadeva pracakrame

uvāca girijā tāvatsvasakhīṃ vijayāṃ drutam //
śiva saktamanovṛttiśśivaniṃdāparāṅmukhī

girijovāca //
vāraṇīyaḥ prayatnena sakhyayaṃ hi dvijādhamaḥ //
punarvaktumanāścaiva śivaniṃdāṃ kariṣyati

na kevalambhavetpāpaṃ nindāṃ kartuśśivasya hi //
yo vai śṛṇoti tannindāṃ pāpabhāk sa bhavediha

śivanindākaro vadhyassarvathā śivakiṃkaraiḥ //
brāhmaṇaścetsa vai tyājyo gantavyaṃ tatsthalāddrutam

ayaṃ duṣṭaḥ punarnindāṃ kariṣyati śivasya hi //
brāhmaṇatvādavadhyaścaittyājyo'dṛśyaśca sarvathā

hitvaitatsthalamadyeva yāsyāmo'nyatra mā ciram //
yathā saṃbhāṣaṇaṃ na syādanenā'viduṣā punaḥ

brahmovāca //
ityuktvā comayā yāvatpādamutkṣipyate mune //
asau tāvacchivassākṣādālaṃbe priyayā svayam

kṛtvā svarūpaṃ subhagaṃ śivādhyānaṃ yathā tathā //
darśayitvā śivāyai tāmuvācāvāṅmukhīṃ śivaḥ

śiva uvāca //
kutra yāsyasi māṃ hitvā na tvaṃ tyājyā mayā punaḥ //
prasanno'smi varaṃ brūhi nādeyamvidyate tava //

adyaprabhṛti te dāsastapobhiḥ krīta eva te //
krīto'smi tavasaundaryātkṣaṇamekaṃ yugāya te

tyajyatāṃ ca tvayā lajjā mama patnī sanātanī //
girije tvaṃ hi sadbudhyā vicāraya maheśvari

mayā parīkṣitāsi tvaṃ bahudhā dṛḍhamānase //
tatkṣamasvāparādhamme lokalīlānusāriṇaḥ

na tvādṛśīmpraṇayinīṃ paśyāmi ca trilokake //
sarvathāhaṃ tavādhīnassvakāmaḥ pūryyatāṃ śive

ehi priye matsakāśaṃ patnī tvaṃ me varastava //
tvayā sākaṃ drutaṃ yāsye svagṛhamparvattottamam

brahmovāca //
ityukte devadevena pārvatī mudamāpa sā //
tapojātaṃ tu yatkaṣṭaṃ tajjahau ca purātanam

sarvaḥ śramo vinaṣṭobhūtsa tyāstu munisattama //
phale jāte śramaḥ pūrvo jantornāśamavāpnuyāt

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṃḍe pārvatyāśśivarūpadarśanaṃ nāmāṣṭāviṃśo'dhyāyaḥ