Shiva Purana · Chapter 2.3.26

// brahmovāca //
gateṣu teṣu muniṣu svaṃ lokaṃ śaṃkaraḥ svayam //
parīkṣituṃ tapo devyā aicchatsūtikaraḥ prabhuḥ

parīkṣā chadmanā śaṃbhurdraṣṭuṃ tāṃ tuṣṭamānasaḥ//
jāṭilaṃ rūpamāsthāya sa yayau pārvatīvanam

atīva sthaviro vipradehadhārī svatejasā //
prajvalanmanasā hṛṣṭo daṃḍī chatrī babhūva saḥ

tatrāpaśyatsthitāṃ devīṃ sakhībhiḥ parivāritām //
vedikopari śuddhāṃ tāṃ śivāmiva vidhoḥ kalām

śaṃbhu nirīkṣya tāṃ devīṃ brahmacārisvarūpavān //
upakaṃṭhaṃ yayau prītyā tadā'sau bhaktavatsalaḥ

āgataṃ taṃ tadā dṛṣṭvā brāhmaṇaṃ tejasādbhutam //
apūjayacchivā devī sarvapūjopahārakaiḥ

susatkṛtaṃ saṃvidhābhiḥ pūjitaṃ parayā mudā //
pārvatī kuśalaṃ prītyā papraccha dvijamādarāta

// pārvatyuvāca //
brahmacārisvarūpeṇa kastvaṃ hi kuta āgataḥ //
idaṃ vanaṃ bhāsayase vada vedavidāṃ vara

// vipra uvāca //
ahamicchābhigāmī ca vṛddho vipratanussudhīḥ //
tapasvī sukhado'nyeṣāmupakārī na saṃśayaḥ

kā tvaṃ kasyāsi tanayā kimartha vijane vane //
tapaścarasi durdharṣaṃ munibhiḥ prapadairapi

na bālā na ca vṛddhāsi taruṇī bhāsi śobhanā //
kathaṃ patiṃ vinā tīkṣṇaṃ tapaścarasi vai vane

ki tvaṃ tapasvinī bhadre kasyacitsahacāriṇī //
tapasvī sa na puṣṇāti devi tvāṃ ca gato'nyataḥ

vada kasya kule jātā kaḥ pitā tava kā vidhā //
mahāsaubhāgyarūpā tvaṃ vṛthā tava taporatiḥ

kiṃ tvaṃ vedaprasūrlakṣmīḥ kiṃ surūpā sarasvatī //
etāsu madhye kā vā tvaṃ nāhaṃ tarkitumutsahe

// pārvatyuvāca //
nāhaṃ vedaprasūrvipra na lakṣmīśca sarasvatī //
ahaṃ himācalasutā sāṃprataṃ nāma pārvatī

purā dakṣasutā jātā satī nāmānyajanmani //
yogena tyaktadehā'haṃ yatpitrā ninditaḥ patiḥ

atra janmani saṃprāptaśśivo'pi vidhivaibhavāt //
māṃ tyaktvā bhasmasātkṛtya manmathaṃ sa jagāma ha

prayāte śaṃkare tāpodvijitāhaṃ piturgṛhāt //
āgatā tapase vipra sudṛḍhā svarṇadītaṭe

kṛtvā tapaḥ kaṭhoraṃ ca suciraṃ prāṇavallabham //
na prāpyāgnau vivikṣantī tvaṃ dṛṣṭvā saṃsthitā kṣaṇam

gaccha tvaṃ praviśāmyagnau śivenāṃgīkṛtā na hi //
yatra yatra janurlapsye variṣyāmi śivaṃ varam

brahmovāca //
ityuktvā pārvatī vahnau tatpuraḥ praviveśa sā //
niṣidhyamānā purato brāhmaṇena punaḥ punaḥ

vahnipraveśaṃ kurvatyāḥ pārvatyāstatprabhāvataḥ//
babhūva tatkṣaṇaṃ sadyo vahni ścaṃdanapaṃkavat

kṣaṇaṃ tadaṃtare sthitvā hyutpataṃtī divaṃ dvijaḥ //
punaḥ papraccha sahasā vihasansutanuṃ śivaḥ

dvija uvāca //
aho tapaste kiṃ bhadre na buddhaṃ kiṃcideva hi //
na dagdho vahninā deho na ca prāptaṃ manīṣitam

atassatyaṃ nikāmaṃ vai vada devi manoratham //
mamāgre vipravaryasya sarvānaṃdapradasya hi

yathāvidhi tvayā devi kīrtyatāṃ sarvathātmanā //
tasmānmaitrī ca saṃjātā kāryyaṃ gopyaṃ tvayā na hi

kimicchasi varaṃ devi praṣṭumicchāmyataḥ param //
tvayyeva tadasau devi phalaṃ sarvaṃ pradṛśyate

parārthe ca tapaścedvai tiṣṭhettu tapa eva tat //
ratnaṃ haste samādāya hitvā kācastu saṃcitaḥ

īdṛśaṃ tava sauṃdaryaṃ kathaṃ vyarthīkṛtaṃ tvayā //
hitvā vastrāṇyanekāni carmādi ca dhṛtaṃ tvayā

tatsarvaṃ kāraṇaṃ brūhi tapasastvasya satyataḥ //
tacchrutvā vipravaryo'haṃ yathā harṣamāvāpnuyām

brahmovāca //
iti pṛṣṭā tadā tena sakhīṃ prairayatāmbikā //
tanmukhenaiva tatsarvaṃ kathayāmāsa suvratā

tayā ca preritā tatra pārvatyā vijayābhidhā //
prāṇapriyā suvratajñā sakhī jaṭilamabravīt

sakhyuvāca //
śṛṇu sādho pravakṣyāmi pārvatīcaritaṃ param //
hetuṃ ca tapasassarvaṃ yadi tvaṃ śrotumicchasi

sakhā me girirājasya suteyaṃ himabhūbhṛtaḥ //
khyātā vai pārvatī nāmnā sā kālīti ca menakā

ūḍheyaṃ na ca kenāpi na vāñchati śivātparam //
trīṇi varṣasahasrāṇi tapaścaraṇasādhinī

tadarthaṃ me'nayā sakhyā prārabdhaṃ tapa īdṛśam //
tadatra kāraṇaṃ vakṣye śṛṇu sādho dvijottama

hitvendrapramukhāndevān hariṃ brahmāṇameva ca //
patiṃ pinākapāṇiṃ vai prāpnumicchati pārvatī

iyaṃ sakhī madīyā vai vṛkṣānāropa yatpurā //
teṣu sarveṣu saṃjātaṃ phalapuṣpādikaṃ dvija

rūpasārthāya janakakulālaṃkaraṇāya ca //
samuddiśya maheśānaṃ kāmasyānugrahāya ca

matsakhī nāradopadeśāttapastapati dāruṇam //
manorathaḥ kutastasyā na phaliṣyati tāpasa

yatte pṛṣṭaṃ dvijaśreṣṭha matsakhyā manasīpsitam //
mayā khyātaṃ ca tatprītyā kimanyacchrotumicchasi

brahmovāca //
ityevaṃ vacanaṃ śrutvā vijayāyā yathārthataḥ //
mune sa jaṭilo rudro vihasanvākyamabravīt

jaṭila uvāca //
sakhyedaṃ kathitaṃ tatra parihāsonumīyate //
yathārthaṃ cettadā devī svamukhenābhibhāṣatām

// brahmovāca //
ityukte ca tadā tena jaṭilena dvijanmanā //
uvāca pārvatī devī svamukhenaiva taṃ dvijam

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivājaṭilasaṃvādo nāma ṣaḍviṃśodhyāyaḥ