Shiva Purana · Chapter 2.3.24

// devā ūcuḥ //
namo rudrāya devāya madanāṃtakarāya ca //
stutyāya bhūribhāsāya trinetrāya namonamaḥ

śipiviṣṭāya bhīmāya bhīmākṣāya namonamaḥ//
mahādevāya prabhave triviṣṭapataye namaḥ

tvaṃ nāthaḥ sarvalokānāṃ pitā mātā tvamīśvaraḥ //
śaṃbhurīśaśśaṃkarosi dayālustvaṃ viśeṣataḥ

tvaṃ dhātā sarvajagatāṃ trātumarhasi naḥ prabho //
tvāṃ vinā kassamarthosti duḥkhanāśe maheśvara //

brahmovāca //
ityākarṇya vacasteṣāṃ surāṇāṃ nandikeśvaraḥ //
kṛpayā parayā yukto vijñaptuṃ śaṃbhumārabhat

// naṃdikeśvara uvāca //
viṣṇvādayassuragaṇā munisiddhasaṃghāstvāṃ draṣṭumeva suravaryya viśeṣayaṃti //
kāryārthino'suravaraiḥ paribhartsya mānāssamyak parābhavapadaṃ paramaṃ prapannāḥ

tasmāttvayā hi sarveśa trātavyā munayassurāḥ //
dīnabaṃdhurviśeṣeṇa tvamukto bhaktavatsalaḥ

// brahmovāca //
evaṃ dayāvatā śaṃbhurvijñapto naṃdinā bhṛśam //
śanaiśśanairuparamaddhyānādunmīlya cākṣiṇī

īśo'thoparataśśaṃbhustadā paramakovidaḥ //
samādheḥ paramātmāsau surānsarvānuvāca ha

śaṃbhuruvāca //
kasmādyūyaṃ samāyātā matsamīpaṃ sureśvaraḥ //
haribrahmādayassarve brūta kāraṇamāśu tat

brahmovāca //
iti śrutvā vacaśśambhossarve devā mudā'nvitāḥ //
viṣṇorvilokayāmāsurmukhaṃ vijñaptihetave

atha viṣṇurmahābhakto devānāṃ hitakārakaḥ //
madīritamuvācedaṃ surakāryaṃ mahattaram

tārakeṇa kṛtaṃ śaṃbho devānāṃ paramādbhutam //
kaṣṭātkaṣṭataraṃ devā vijñaptuṃ sarva āgatāḥ

he śaṃbho tava putreṇaurasena hi bhaviṣyati//
nihatastārako daityo nānyathā mama bhāṣitam

vicāryyetthaṃ mahādeva kṛpāṃ kuru namo'stu te //
devānsamuddhara svāmin kaṣṭāttārakanirmitāt

tasmāttvayā girijā deva śaṃbho grahītavyā pāṇinā dakṣiṇena //
pāṇigraheṇaiva mahānubhāvāṃ dattāṃ girīṃdreṇa ca tāṃ kuruṣva

viṣṇostadvacanaṃ śrutvā prasanno hyabravīcchivaḥ //
darśayan sadgatiṃ teṣāṃ sarveṣāṃ yogatatparaḥ

śiva uvāca //
yadā me svīkṛtā devī girijā sarvasuṃdarī //
tadā sarve sureṃdrāśca munayo ṛṣayastadā

sakāmāśca bhaviṣyanti na kṣamāśca pare pathi //
jīvayiṣyati durgā sā pāṇigrahaṇatassmaram

madano hi mayā dagdhassarveṣāṃ kāryyasiddhaye ///
brahmaṇo vacanādviṣṇo nātra kāryā vicāraṇā

evaṃ vimṛśya manasā kāryākāryavyavasthitau //
sudhīḥ sarvaiśca deveṃdra haṭhaṃ no kartumarhasi

dagdhe kāme mayā viṣṇo surakāryaṃ mahat kṛtam //
sarve tiṣṭhaṃtu niṣkāmā mayā saha suniścitam

yathā'haṃ ca surāssarve tathā yūyamayatnataḥ //
tapaḥ paramasaṃyuktāḥ kariṣyadhvaṃ suduṣkaram

yūyaṃ samādhinā tena madanena vinā surāḥ //
paramānaṃdasaṃyuktā nirvikārā bhavaṃtu vai

purāvṛttaṃ smarakṛtaṃ vismṛtaṃ yadvidhe hare //
mahendra munayo devā yattatsarvaṃ vimṛśyatām

mahādhanurdhareṇaiva madanena haṭhātsurāḥ //
sarveṣāṃ dhyānavidhvaṃsaḥ kṛtastena purāpurā

kāmo hi narakāyaiva tasmāt krodhobhijāyate //
krodhādbhavati saṃmoho mohācca bhraṃśate tapaḥ

kāmakrodhau parityājyau bhavadbhissurasattamaiḥ //
sarvaireva ca maṃtavyaṃ madvākyaṃ nānyathā kvacit

// brahmovāca //
evaṃ viśrāvya bhagavān mahādevo vṛṣadhvajaḥ //
surān pravācayāmāsa vidhiviṣṇū tathā munīm

tūṣṇīṃbhūto'bhavacchaṃbhurdhyānamāśritya vai punaḥ //
āste purā yathā sthāṇurgaṇaiśca parivāritaḥ

svātmānamātmanā śaṃbhurātmanyeva vyaciṃtayat //
niraṃjanaṃ nirābhāsaṃ nirvikāraṃ nirāmayam

parātparataraṃ nityaṃ nirmamaṃ niravagraham //
śabdātītaṃ nirguṇaṃ ca jñānagamyaṃ parātparam

evaṃ svarūpaṃ paramaṃ ciṃtayan dhyānamāsthitaḥ //
paramānaṃdasaṃmagno babhūva bahusūtikṛt

dhyānasthitaṃ ca sarveśaṃ dṛṣṭvā sarve divaukasaḥ //
hari śakrādayassarve naṃdinaṃ procurānatāḥ

// devā ūcuḥ //
kiṃ vayaṃ karavāmādya virakto dhyānamāsthitaḥ //
śaṃbhustvaṃ śaṃkara sakhassarvajñaḥ śucisevakaḥ

kenopāyena giriśaḥ prasannaḥ syādgaṇādhipa //
tadupāyaṃ samācakṣva vayaṃ tvaccharaṇaṃ gatāḥ // /

// brahmovāca /!
iti vijñāpito devairmune harṣādibhistadā //
pratyuvāca surāṃstānsa naṃdī śaṃbhupriyo gaṇaḥ

naṃdīśvara uvāca //
he hare he vidhe śakranirjarā munayastathā //
śṛṇudhvaṃ vacanaṃ me hi śivasaṃtoṣakārakam

yadi vo haṭha evādya śiva dāraparigrahe //
atidīnatayā sarve sunutiṃ kurutādarāt

bhaktervaśyo mahādevo na sādhāraṇatasturāḥ //
akāryamapi sadbhaktyā karoti parameśvaraḥ

evaṃ kuruta sarve hi vidhiviṣṇumukhāḥ surāḥ //
yathāgatena mārgeṇānyathā gacchata mā ciram

brahmovāca //
ityākarṇya vacastasya mune viṣṇvādayassurāḥ //
tatheti mattvā suprītyā śaṃkaraṃ tuṣṭuvurhi te

devadeva mahādeva karuṇāsāgara prabho //
samuddhara mahākleśāttrāhi naśśaraṇāgatān

brahmovāca //
ityevaṃ bahudīnoktyā tuṣṭuvuśśaṃkaraṃ surāḥ //
rurudussusvaraṃ sarve premavyākulamānasaḥ

harirmayā sudīnoktyā suvijñaptaṃ cakāra ha //
saṃsmaranmanasā śaṃbhuṃ bhaktyā paramayānvitaḥ

brahmovāca //
surairevaṃ stutaśśaṃbhurhariṇā ca mayā bhṛśam //
bhaktavātsalyato dhyānādviratobhūnmaheśvaraḥ

uvāca suprasannātmā haryādīnharṣayanharaḥ //
vilokya karuṇādṛṣṭyā śaṃkaro bhaktavatsalaḥ

śaṃkara uvāca //
he hare he vidhe devāśśakrādyā yugapatsame //
kimarthamāgatā yūyaṃ satyaṃ brūta mamāgrataḥ

hariruvāca //
sarvajñastvaṃ maheśāna tvaṃtaryāmyakhileśvaraḥ //
kiṃ na jānāsi cittasthaṃ tathā vacmyapi śāsanāt

tārakāsurato duḥkhaṃ saṃbhūtaṃ vividhaṃ mṛḍa //
sarveṣāṃ nastadarthaṃ hi prasanno'kāri vai suraiḥ

śivā sā janitā śailāttvadarthaṃ hi himālayāt //
tasyāṃ tvadudbhavātputrāttasya mṛtyurna cānyathā

iti datto brahmaṇā hi tasmai daityāya yadvaraḥ //
tadanyasmādamṛtyussa bādhate nikhilaṃ jagat

nāradasya nirdeśātsā karoti kaṭhinaṃ tapaḥ //
tattejasākhilaṃ vyāptaṃ trailokyaṃ sacarācaram

varaṃ dātuṃ śivāyai hi gaccha tvaṃ parameśvara //
devaduḥkhaṃ jahi svāminnasmākaṃ sukhamāvaha

devānāṃ me mahotsāho hṛdaye cāsti śaṃkara //
vivāhaṃ tava saṃdraṣṭuṃ tattvaṃ kuru yathocitam

ratyai yadbhavatā datto varastasya parātpara //
prāpto'vasara evāśu saphalaṃ svapaṇaṃ kuru

brahmovāca //
ityuktvā taṃ praṇamyaiva viṣṇurdevā maharṣayaḥ //
saṃstūya vividhaistotraissaṃtasthustatpuro'khilāḥ

bhaktādhīnaḥ śaṃkaro'pi śrutvā devavacastadā //
vihasya pratyuvācāśu vedamaryādarakṣakaḥ

// śaṃkara uvāca //
he hare he vidhe devāśśṛṇutādarato'khilāḥ //
yathocitamahaṃ vacmi saviśeṣaṃ vivekataḥ

nocitaṃ hi vidhānaṃ vai vivāhakaraṇaṃ nṛṇām //
mahānigaḍasaṃjño hi vivāho dṛḍhabandhanaḥ //2.3.24.६०/
kusaṃgā bahavo loke strīsaṃgastatra cādhikaḥ //
uddharetsakalabaṃdhairna strīsaṃgātpramucyate

lohadārumayaiḥ pāśairdṛḍhaṃ baddho'pi mucyate //
stryādipāśasusaṃbaddho mucyate na kadācana

varddhaṃte viṣayāśśaśvanmahābaṃdhanakāriṇaḥ //
viṣayākrāṃtamanasassvapne mokṣo'pi durlabhaḥ

sukhamicchatu cetprājño vidhivadviṣayām̐styajet //
viṣavadviṣayānāhurviṣayairyairnihanyate

jano viṣayiṇā sākaṃ vārtātaḥ patati kṣaṇāt //
viṣayaṃ prāhurācāryāssitāliteṃdravāruṇīm

yadyapyevaṃ hi jānāmi sarvaṃ jñānaṃ viśeṣataḥ //
tathāpyahaṃ kariṣyāmi prārthanāṃ saphalāṃ ca vaḥ

bhaktādhīno'hamevāsmi tadvaśātsarvakārya kṛt //
ayathocitakartā hi prasiddho bhuvanatraye

kāmarūpādhipasyaiva paṇaśca saphalaḥ kṛtaḥ //
sudakṣiṇasya bhūpasya bhaimabaṃdhagatasya hi / ६८ //
gautamakleśakartāhaṃ tryaṃbakātmā sukhāvahaḥ //
tatkaṣṭapradaduṣṭānāṃ śāpadāyī viśeṣataḥ

viṣaṃ pītaṃ surārthaṃ hi bhaktavatsalabhāvadhṛk //
devakaṣṭaṃ hṛtaṃ yatnātsarvadaiva mayā surāḥ

bhaktārthamasahaṃ kaṣṭaṃ bahuśo bahuyatnataḥ //
viśvānara munerduḥkhaṃ hṛtaṃ gṛhapatirbhavan

kiṃ bahūktena ca hare vidhe satyaṃ bravīmyaham //
matpaṇo'stīti yūyaṃ vai sarve jānītha tattvataḥ

yadā yadā vipattirhi bhaktānāṃ bhavati kvacit //
tadā tadā haramyāśu tatkṣaṇātsarvaśassadā

jāne'haṃ tārakādduḥkhaṃ sarveṣāṃ vassamutthitam//
asurā ttaddhariṣyāmi satyaṃsatyaṃ vadāmyaham

nāsti yadyapi me kācidvihārakaraṇe ruciḥ //
vivāhayiṣye girijā putrotpādanahetave

gacchata svagṛhāṇyeva nirbhayāssakalāḥ surāḥ //
kāryaṃ vassādhayiṣyāmi nātra kāryā vicāraṇā

// brahmovāca //
ityuktvā maunamāsthāya samādhistho'bhavaddharaḥ //
sarve viṣṇvādayo devāssvadhāmāni yayurmune

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe pārvatīvivāhasvīkāro nāma caturviśo'dhyāyaḥ