Shiva Purana · Chapter 2.3.23

// brahmovāca //
evaṃ tapatyāṃ pārvatyāṃ śivaprāptau munīśvara//
cirakālo vyatīyāya prādurbhūto haro na hi

himālayastadāgatya pārvatīṃ kṛtaniścayām//
sabhāryassasutāmātya uvāca parameśvarīm

himālaya uvāca//
mā khidyatāṃ mahābhāge tapasānena pārvatī //
rudro na dṛśyate bāle virakto nātra saṃśayaḥ

tvaṃ tanvī sukumārāṃgī tapasā ca vimohitā //
bhaviṣyasi na saṃdehassatyaṃ satyaṃ vadāmi te

tasmāduttiṣṭha caihi tvaṃ svagṛhaṃ varavarṇini //
kiṃ tena tava rudreṇa yena dagdhaḥ purā smaraḥ

ato hi nirvikāra tvāttvāmādātuṃ varāṃ harāḥ //
nāgamiṣyati deveśi taṃ kathaṃ prārthayiṣyasi

gaganastho yathā caṃdro grahītuṃ na hi śakyate //
tathaiva durgamaṃ śaṃbhuṃ jānīhi tvamihānaghe

// brahmovāca //
tathaiva menayā coktā tathā sahyādriṇā satī //
meruṇā maṃdareṇaiva mainākena tathaiva sā

evamanyaiḥ kṣitibhaiśca krauṃcādibhiranāturā //
tathaiva girijā proktā nānāvādavidhāyibhiḥ

// brahmovāca //
evaṃ proktā yadā tanvī sā sarvaistapasi sthitā //
uvāca prahasaṃtyeva himavaṃtaṃ śucismitā

pārvatyuvāca //
purā proktaṃ mayā tāta mātaḥ kiṃ vismṛtaṃ tvayā //
adhunāpi pratijñāṃ ca śṛṇudhvaṃ mama bāṃdhavāḥ

viraktosau mahādevo yena dagdhā ruṣā smaraḥ //
taṃ toṣayāmi tapasā śaṃkaraṃ bhaktavatsalam

sarve bhavaṃto gacchaṃtu svaṃ svaṃ dhāma praharṣitāḥ //
bhaviṣyatyeva tuṣṭo'sau nātra kāryyā vicāraṇā // १ ३//
dagdho hi madano yena yena dagdhaṃ girervanam //
tamānayiṣye cātraiva tapasā keva lena hi

tapobalena mahatā susevyo hi sadāśivaḥ //
jānīdhvaṃ hi mahābhāgāssatyaṃ satyaṃ vadāmi vaḥ

ābhāṣya caivaṃ girijā ca menakāṃ mainākabaṃdhuṃ pitaraṃ himālayam //
tūṣṇīṃ babhūvāśu subhāṣiṇī śivā samaṃdaraṃ parvatarājabālikā

jagmustathoktāḥ śivayā hi parvatā yathāgatenāpi vicakṣaṇāste //
praśaṃsamānā girijā muhurmuhussuvismitā hemanageśvarādyāḥ

gateṣu teṣu sūryeṣu sakhībhiḥ parivāritā //
tapastepe tadadhikaṃ paramārthasuniścayā // १-//
tapasā mahatā tena taptamāsīccarācaram //
trailokyaṃ hi muniśreṣṭha sadevāsuramānuṣam

tadā surāsurāḥ sarve yakṣakinnaracāraṇāḥ//
siddhāssādhyāśca munayo vidyādharamahoragāḥ//

saprajāpatayaścaiva guhyakāśca tathāpare //
kaṣṭāt kaṣṭataraṃ prāptāḥ kāraṇaṃ na viduḥ sma tat

sarve militvā śakrādyā gurumāmaṃtrya vihvalāḥ //
sumerau taptasarvāṃgā vidhiṃ māṃ śaraṇaṃ yayuḥ

tatra gatvā praṇamyāśu vihvalā naṣṭasutviṣaḥ //
ūcussarve ca saṃstūya hyaikapadyena māṃ hi te

devā ūcuḥ //
tvayā sṛṣṭamidaṃ sarvaṃ jagadetaccarācaram //
saṃtaptamati kasmādvai na jñātaṃ kāraṇaṃ vibho

tadbrūhi kāraṇaṃ brahman jñātumarhasi naḥ prabho //
dagdhabhūtatanūndevān tvatto nānyo'sti rakṣaka

// brahmovāca //
ityākarṇya vacasteṣāmahaṃ smṛtvā śivaṃ hṛdā //
vicārya manasā sarvaṃ girijāyāstapaḥ phalam

dagdhaṃ viśvamiti jñātvā taiḥ sarvairiha sādarāt //
haraye tatkathayituṃ kṣīrābdhimagamaṃ drutam

tatra gatvā hariṃ dṛṣṭvā vilasaṃtaṃ sukhāsane //
supraṇamya susaṃstūya prāvocaṃ sāṃjaliḥ suraiḥ

trāhi trāhi mahāviṣṇo taptānnaśśaraṇāgatān //
tapasogreṇa pārvatyāstapatyāḥ parameṇa hi //२९/
ityākarṇya vacasteṣāmasmadādi divaukasām //
śeṣāsane samāviṣṭo'smānuvāca rameśvaraḥ

// viṣṇuruvāca //
jñātaṃ sarvaṃ nidānaṃ me pārvatī tapasodya vai //
yuṣmābhissahitastvadya vrajāmi parameśvaram

mahādevaṃ prārthayāmo girijāprāpaṇāya tam //
pāṇigrahārthamadhunā lokānāṃ svastaye'marāḥ

varaṃ dātuṃ śivāyai hi devadeva pinākadhṛk //
yathā ceṣyati tatraiva kariṣyāmo'dhunā hi tat//२३/
tasmādvayaṃ gamiṣyāmo yatra rudro mahāprabhuḥ //
tapasogreṇa saṃyukto'dyāste paramamaṃgalaḥ

// brahmovāca //
viṣṇostadvacanaṃ śrutvā sarva ūcussurādayaḥ //
mahābhītā haṭhāt kruddhāddagdhukāmāt layaṃkarāt

devā ūcuḥ //
mahābhayaṃkaraṃ kruddhaṃ kālānalasamaprabham //
na yāsyāmo vayaṃ sarve virūpākṣaṃ mahāprabham

yathā dagdhaḥ purā tena madano duratikramaḥ //
tathaiva krodhayukto naḥ sa dhakṣyati na saṃśayaḥ

brahmovāca // tadākarṇya vacasteṣāṃ śakrādīnāṃ rameśvaraḥ //
sāṃtvayaṃstānsurānsarvānprovāca sa harirmune

// hariruvāca //
he surā madvacaḥ prītyā śṛṇutādarato'khilāḥ //
na vo dhakṣyati sa svāmī devānāṃ bhayanāśanaḥ

tasmādbhavadbhirgaṃtavyaṃ mayā sārddhaṃ vicakṣaṇaiḥ //
śaṃbhuṃ śubhakaraṃ matvā śaraṇaṃ tasya suprabho

śivaṃ purāṇaṃ puruṣamadhīśaṃ vareṇyarūpaṃ hi paraṃ purāṇam //
tapojuṣāṇāṃ paramātmarūpaṃ parātparaṃ taṃ śaraṇaṃ vrajāmaḥ

brahmovāca //
evamuktāstadā devā viṣṇunā prabhavi ṣṇunā //
jagmussarve tena saha draṣṭukāmāḥ pinākinam

prathamaṃ śailaputryāstattapo draṣṭuṃ tadāśramam //
jagmurmārgavaśātsarve viṣṇvādyassakutūhalāḥ

pārvatyāstu tapo dṛṣṭvā tejasā vyāpṛtāstadā //
praṇemustāṃ jagaddhātrīṃ tejorūpāṃ tapaḥ sthitām

praśaṃsaṃtastapastasyāssākṣātsiddhitanossurāḥ //
jagmustatra tadā te ca yatrāste vṛṣabhadhvajaḥ

tatra gatvā ca te devāstvāṃ mune praiṣayaṃstadā //
paśyato dūratastasthuḥ kāmabhasmakṛtoharāt

nārada tvaṃ śivasthānaṃ tadā gatvā'bhayassadā //
śivabhakto viśeṣeṇa prasannaṃ dṛṣṭavān prabhum

punarāgatya yatnena devānāhūya tāṃstataḥ //
nināya śaṃkarasthānaṃ tadā viṣṇvādikānmune

atha viṣṇvādayassarve tatra gatvā śivaṃ prabhum //
dadṛśussukhamāsīnaṃ prasannaṃ bhaktavatsalam

yogapaṭṭasthitaṃ śaṃbhuṃ gaṇaiśca parivāritam //
taporūpaṃ dadhānaṃ ca parameśvararūpiṇam

tato viṣṇurmayānye ca surasiddhamunīśvarāḥ//
praṇamya tuṣṭuvussūktairvedopaniṣadanvitaiḥ

iti śrīśivamahāpurāṇe dvitīyāyāṃ rudrasaṃhitāyāṃ tutīye pārvatīkhaṃḍe pārvatīsāṃtvanaśivadevadarśanavarṇanaṃ nāma trayoviṃśo'dhyāyaḥ