Shiva Purana · Chapter 2.3.22

brahmovāca //
tvayi devamune yāte pārvatī hṛṣṭamānasā //
tapassādhyaṃ haraṃ mene taporthaṃ mana ādadhe

tataḥ sakhyau samādāya jayāṃ ca vijayāṃ tathā//
mātaraṃ pitaraṃ caiva sakhībhyāṃ paryapṛcchata

prathamaṃ pitaraṃ gatvā himavantaṃ nageśvaram //
paryapṛcchatsupraṇamya vinayena samanvitā

sakhyāvūcatuḥ //
himavañcchrūyatāṃ putrī vacanaṃ kathyate'dhunā //
sā svayaṃ caiva dehasya rūpasyāpi tathā punaḥ

bhavato hi kulasyāsya sāphalyaṃ kartumicchati //
tapasā sādhanīyo'sau nānyathā dṛśyatāṃ vrajet

tasmācca parvataśreṣṭha dehyājñāṃ bhavatādhunā //
tapaḥ karotu girijā vanaṃ gatveti sādaram

brahmovāca //
ityevaṃ ca tadā pṛṣṭassakhībhyāṃ munisattama //
pārvatyā suvicāryātha girirājo'bravīdidam

himālaya uvāca //
mahyaṃ ca rocate'tyarthaṃ menāyai rucyatāṃ punaḥ //
yathedaṃ bhavitavyaṃ ca kimataḥ paramuttamam

sāphalyaṃ tu madīyasya kulasya ca na saṃśayaḥ //
mātre tu rucyate cedvai tataḥ śubhataraṃ nu kim

brahmovāca //
ityevaṃ vacanaṃ pitrā proktaṃ śrutvā tu te tadā //
jagmaturmātaraṃ sakhyau tadājñapte tayā saha

gatvā tu mātaraṃ tasyāḥ pārvatyāste ca nārada //
supraṇamya karo badhvocaturvacanamādarāt

sakhyāvūcatuḥ //
mātastvaṃ vacanaṃ putryāḥ śṛṇu devi namo'stu te //
suprasannatayā tadvai śrutvā kartumihārhasi

taptukāmā tu te putrī śivārthaṃ paramaṃ tapaḥ//
prāptānujñā pituścaiva tubhyaṃ ca paripṛcchati

iyaṃ svarūpasāphalyaṃ kartukāmā pativrate //
tvadājñayā yadi jāyeta tapyate ca tathā tapaḥ

// brahmovāca //
ityuktvā ca tatassakhyau tūṣṇīmāstāṃ munīśvara //
nāṃgīcakāra menā sā tadvākyaṃ khinnamānasā

tatassā pārvatī prāha svayamevātha mātaram //
karau baddhvā vinītātmā smṛtvā śivapadāṃbujam

pārvatyuvāca //
mātastaptuṃ gamiṣyāmi prātaḥ prāptuṃ maheśvaram //
anujānīhi māṃ gaṃtuṃ tapase'dya tapovanam

// brahmovāca //
ityākarṇya vacaḥ putryā menā duḥkha mupāgatā //
sopāhūya tadā putrīmuvāca vikalā satī

menovāca //
duḥkhitāsi śive putrī tapastaptuṃ purā yadi //
tapaścara gṛhe'dya tvaṃ na bahirgaccha pārvati

kutra yāsi tapaḥ kartuṃ devāssaṃti gṛhe mama //
tīrthāni ca samastāni kṣetrāṇi vividhāni ca

kartavyo na haṭhaḥ putri gaṃtavyaṃ na bahiḥ kvacit //
sādhitaṃ kiṃ tvayā pūrvaṃ punaḥ kiṃ sādhayiṣyasi

śarīraṃ komalaṃ vatse tapastu kaṭhinaṃ mahat //
evasmāttu tvayā kāryaṃ tapo'tra na bahirvraja

strīṇāṃ tapovanagatirna śrutā kāmanārthinī //
tasmāttvaṃ putri mā kārṣīstaporthaṃ gamanaṃ prati

// brahmovāca //
ityevaṃ bahudhā putrī tanmātrā vinavāritā //
saṃvede na sukhaṃ kiṃcidvinārādhya maheśvaram

taponiṣiddhā tapase vanaṃ gaṃtuṃ ca menayā //
hetunā tena someti nāma prāpa śivā tadā

atha tāṃ dukhitāṃ jñātvā menā śailapriyā śivām //
nideśaṃ sā dadau tasyāḥ pārvatyāstapase mune

māturājñāṃ ca saṃprāpya suvratā munisattama //
tataḥ svāṃte sukhaṃ lebhe pārvatī smṛtaśaṃkarā

mātaraṃ pitaraṃ sātha praṇipatya mudā śivā //
sakhībhyāṃ ca śivaṃ smṛtvā tapastaptuṃ samudgatā

hitvā matānyanekāni vastrāṇi vividhāni ca//
valkalāni dhṛtānyāśu mauṃjīṃ baddhvā tu śobhanām

hitvā hāraṃ tathā carmma mṛgasya paramaṃ dhṛtam //
jagāma tapase tatra gaṃgāvataraṇaṃ prati

śaṃbhunā kurvatā dhyānaṃ yatra dagdho manobhavaḥ//
gaṃgāvataraṇo nāma prastho himavatassa ca

haraśūnyo'tha dadṛśe sa prastho himabhūbhṛtaḥ //
kālyā tatretya bhostāta pārvatyā jagadambayā

yatra sthitvā purā śaṃbhustaptavāndustaraṃ tapaḥ //
tatra kṣaṇaṃ tu sā sthitvā babhūva virahārditā

hā hareti śivā tatra rudantī sā giressutā //
vilalāpātiduḥkhārtā cintāśokasamanvitā

tataścireṇa sā mohaṃ dhairyyā tsaṃstabhya pārvatī //
niyamāyā'bhavattatra dīkṣitā himavatsutā

tapaścakāra sā tatra śṛṃgitīrthe mahottame //
gaurīśikhara nāmāsīttattapaḥkaraṇāddhi tat

suṃdarāśca drumāstatra pavitrāśśivayā mune //
āropitāḥ parīkṣārthaṃ tapasaḥ phalabhāginaḥ

bhūbhiśuddhiṃ tataḥ kṛtvā vedīṃ nirmāya sundarī //
tathā tapassamārabdhaṃ munīnāmapi duṣkaram

vigṛhya manasā sarvāṇīṃdriyāṇi sahāśu sā //
samupasthānike tatra cakāra paramaṃ tapaḥ // ३९ /
grīṣme ca parito vahniṃ prajvalaṃtaṃ divāniśam //
kṛtvā tasthau ca tanmadhye satataṃ japatī manuma

satataṃ caiva varṣāsu sthaṃḍile susthirāsanā //
śilāpṛṣṭhe ca saṃsiktā babhūva jaladhārayā

śīte jalāṃtare śaśvattasthau sā bhaktitatparā//
anāhārātapattatra nīhāre niśāsu ca

evaṃ tapaḥ prakurvāṇā paṃcākṣarajape ratā //
dadhyau śivaṃ śivā tatra sarvakāmaphalapradam

svāropitācchubhānvṛkṣānsakhībhissiṃcatī mudā//
pratyahaṃ sāvakāśe sā tatrātithyamakalpayat

vātaścaiva tathā śītavṛṣṭiśca vividhā tathā//
dussaho'pi tathā gharmmastayā sehe sucittayā

duḥkhaṃ ca vividhaṃ tatra gaṇitaṃ na tayāgatam //
kevalaṃ mana ādhāya śive sāsītsthitā mune

prathamaṃ phalabhogena dvitīyaṃ parṇabhojanaiḥ//
tapaḥ prakurvatī devī kramānninye'mitāḥ samāḥ

tataḥ parṇānyapi śivā nirasya himavatsutā//
nirāhārābhavaddevī tapaścaraṇasaṃratā

āhāre tyaktaparṇābhūdyasmāddhimavataḥ sutaḥ //
tena devairaparṇeti kathitā nāmataḥ śivā

ekā pādasthitā sāsīcchivaṃ saṃsmṛtya pārvatī//
paṃcākṣaraṃ japaṃtī ca manuṃ tepe tapo mahat

cīravalkalasaṃvītā jaṭāsaṃghātadhāriṇī//
śivaciṃtanasaṃsaktā jigāya tapasā munīm

evaṃ tasyāstapasyantyā ciṃtayaṃtyā maheśvaram //
trīṇi varṣa sahasrāṇi jagmuḥ kālyāstapovane

ṣaṣṭivarṣasahasrāṇi yatra tepe tapo haraḥ //
tatra kṣaṇamathoṣitvā ciṃtayāmāsa sā śivā

niyamasthāṃ mahādeva kiṃ māṃ jānāsi nādhunā //
yenāhaṃ suciraṃ tena nānuyātā tavoratā

loke vede ca giriśo munibhirgīyate sadā //
śaṃkarasya hi sarvajñassarvātmā sarvadarśanaḥ

sarvabhūtiprado devassarvabhāvānubhāvanaḥ //
bhaktābhīṣṭaprado nityaṃ sarvakleśanivāraṇaḥ

sarvakāmānparityajya yadi cāhaṃ vṛṣadhvaje//
anuraktā tadā sotra saṃprasīdatu śaṃkaraḥ

yadi nārada tatroktamaṃtro japtaśśarākṣaraḥ //
subhaktyā vidhinā nityaṃ saṃprasīdatu śaṃkaraḥ

yadi bhaktyā śivasyāhaṃ nirvikārā yathoditam //
sarveśvarasya cātyaṃtaṃ saṃprasīdatu śaṃkaraḥ

evaṃ ciṃtayatī nityaṃ tepe sā suciraṃ tapaḥ //
adhomukhī nirvikārā jaṭāvalkaladhāriṇī

tathā tayā tapastaptaṃ munīnāmapi duṣkaram //
smṛtvā ca puruṣāstatra paramaṃ vismayaṃ gatāḥ

tattapodarśanārthaṃ hi samājagmuśca te'khilāḥ //
dhanyānnijānmanyamānā jagaduśceti sammatāḥ

mahatāṃ dharmmavṛddheṣu gamanaṃ śreya ucyate //
pramāṇaṃ tapaso nāsti mānyo dharmmassadā budhaiḥ

śrutvā dṛṣṭvā tapo'syāstu kimanyaiḥ kriyate tapaḥ //
asmāttapo'dhikaṃ loke na bhūtaṃ na bhaviṣyati

jalpaṃta iti te sarve supraśasya śivātapaḥ //
jagmuḥ svaṃ dhāma muditāḥ kaṭhināṃgāśca ye hyapi

anyacchṛṇu maharṣe tvaṃ prabhāvaṃ tapaso'dhunā //
pārvatyā jagadambāyāḥ parāścaryyakaraṃ mahat

tadāśramagatā ye ca svabhāvena virodhinaḥ //
tepyāsam̐statprabhāveṇa virodharahi tāstadā

siṃhā gāvaśca satataṃ rāgādidoṣasaṃyutāḥ //
tanmahimnā ca te tatra nābādhaṃta parasparam

athānye ca muniśreṣṭha mārjjārā mūṣakādayaḥ //
nisargādvairiṇo yatra vikriyaṃte sma na kvacit

vṛkṣāśca saphalāstatra tṛṇāni vividhāni ca //
puṣpāṇi ca vicitrāṇi tatrāsanmunisattama

tadvanaṃ ca tadā sarvaṃ kailāsenopamānvitam //
jātaṃ ca tapastasyāssiddhirūpamabhūttadā

iti śrīśivamahāpurāṇe dvitīyāyāṃ rudrasaṃ० tṛtīye pārvatī० pārvatītapova० nāma dvāviṃśo'dhyāyaḥ