Shiva Purana · Chapter 2.3.21

nārada uvāca //
vidhe tāta mahāprājña viṣṇuśiṣya trilokakṛt //
adbhuteyaṃ kathā proktā śaṃkarasya mahātmanaḥ

bhasmībhūte smare śaṃbhutṛtīyanayanāgninā //
tasminpraviṣṭe jaladhau vada tvaṃ kimabhūttataḥ

kiṃ cakāra tato devī pārvatī kudharātmajaḥ //
gatā kutra sakhībhyāṃ sā tadvadādya dayānidhe

// brahmovāca //
śṛṇu tāta mahāprājña caritaṃ śaśimaulinaḥ //
mahotikārakasyaiva svāmino mama cādarāt

yadāhacchaṃbhunetrodbhavo hi madanaṃ śuciḥ //
mahāśabdo'dbhuto'bhūdvai yenākāśaḥ prapūritaḥ

tena śabdena mahatā kāmaṃ dagdhaṃ samīkṣya ca//
sakhībhyāṃ saha bhītā sā yayau svagṛhamākulā

tena śabdena himavānparivārasamanvitaḥ //
vismito'bhūdatikliṣṭassutāṃ smṛtvā gatāṃ tataḥ

jagāma śokaṃ śaileśo sutāṃ dṛṣṭvātivihvalām //
rudatīṃ śaṃbhuvirahādāsasādācaleśvaraḥ

āsādya pāṇinā tasyā mārjayannayanadvayam //
mā bibhīhi śive'rodīrityuktvā tāṃ tadāgrahīt

kroḍe kṛtvā sutāṃ śīghraṃ hima vānacaleśvaraḥ //
svamālayamathāninye sāṃtvayannativihvalām

aṃtarhite smaraṃ dagdhvā hare tadvirahācchivā //
vikalābhūd bhṛśaṃ sā vai lebhe śarma na kutracit

piturgṛhaṃ tadā gatvā militvā mātaraṃ śivā //
punarjātaṃ tadā mene svātmānaṃ sā dharātmajā //

niniṃda ca svarūpaṃ sā hā hatāsmītyathābravīt //
sakhībhirbodhitā cāpi na bubodha girīndrajā

svapatī ca pibaṃtī ca sā snātī gacchatī śivā //
tiṣṭhaṃtī ca sakhīmadhye na kiṃcitsukhamāpa ha

dhiksvarūpaṃ madīyaṃ ca tathā janma ca karma ca //
iti bruvaṃtī satataṃ smaraṃtī haraceṣṭitam

evaṃ sā pārvatī śaṃbhuvirahotkliṣṭamānasā //
sukhaṃ na lebhe kiṃcidrā'bravīcchivaśiveti ca

nivasaṃtī piturggehe pinākigatacetanā //
śuśocātha śivā tāta mumoha ca muhurmuhuḥ

śailādhirājopyatha menakāpi mainākamukhyāstanayāśca sarve//
tāṃ sāṃtvayāmāsuradīnasattvā haraṃ visasmāra tathāpi no sā

atha devamune dhīmanhimava tprastare tadā //
niyojito balabhidāgamastvaṃ kāmacārataḥ

tatastvaṃ pūjitastena bhūdhareṇa mahātmanā //
kuśalaṃ pṛṣṭavāṃstaṃ vai tadāviṣṭo varāsane

tataḥ provāca śaileśaḥ kanyācaritamāditaḥ //
harasevānvitaṃ kāmadahanaṃ ca hareṇa ha

śrutvāvoco mune tvaṃ tu taṃ śaileśaṃ śivaṃ bhaja //
tamāmaṃtryodatiṣṭhastvaṃ saṃsmṛtya manasā śivam

taṃ samutsṛjya rahasi kālīṃ tāmagamaṃstvarā //
lokopakārako jñānī tvaṃ mune śivavallabhaḥ

āsādya kālīṃ saṃbodhya taddhite sthita ādarāt//
avocastvaṃ vacastathyaṃ sarveṣāṃ jñānināṃ varaḥ

nārada uvāca //
śṛṇu kāli vaco me hi satyaṃ vacmi dayārataḥ//
sarvathā te hitakaraṃ nirvikāraṃ sukāmadam

sevitaśca mahādevastvayeha tapasā vinā //
garvavatyā yadadhvaṃsīddīnānugrahakārakaḥ

viraktaśca sa te svāmī mahāyogī maheśvaraḥ //
visṛṣṭavānsmaraṃ dagdhvā tvāṃ śive bhaktavatsalaḥ

tasmāttvaṃ sutapoyuktā ciramārādhayeśvaram //
tapasā saṃskṛtāṃ rudrassa dvitīyāṃ kariṣyati

tvaṃ cāpi śaṃkaraṃ śambhuṃ na tyakṣyasi kadācana //
nānyaṃ patiṃ haṭhāddevi grahīṣyasi śivādṛte

// brahmovāca // //
ityākarṇyavacaste hi mune sā bhūdharātmajā //
kiṃciducchvasitā kālī prāha tvāṃ sāṃjalirmudā

śivovāca //
tvaṃ tu sarvajña jagatāmupakārakara prabho //
rudrasyārādhanārthāya maṃtraṃ dehi mune hi me

na sidyati kriyā kāpi sarveṣāṃ sadguruṃ vinā //
mayā śrutā purā satyaṃ śrutireṣā sanātanī

brahmovāca //
iti śrutvā vacastasyāḥ pārvatyā munisattamaḥ //
paṃcākṣaraṃ śambhumantraṃ vidhipūrvamupādiśaḥ

avocaśca vacastāṃ tvaṃ śraddhāmutpādayanmune//
prabhāvaṃ mantrarājasya tasya sarvādhikaṃ mune

nārada uvāca //
śṛṇu devi manorasya prabhāvaṃ paramādbhutam //
yasya śravaṇamātreṇa śaṃkarastu prasīdati

maṃtroyaṃ sarvamaṃtrāṇāmadhirājaśca kāmadaḥ //
bhuktimuktiprado'tyaṃtaṃ śaṃkarasya mahāpriyaḥ

subhage yena japtena vidhinā so'cirād drutam //
ārādhitaste pratyakṣo bhaviṣyati śivo dhruvam

ciṃtayatī ca tadrūpaṃ niyamasthā śarākṣaram //
japa mantraṃ śive tvaṃ hi saṃtuṣyati śivo drutam

evaṃ kuru tapa sādhvi tapassādhyo maheśvaraḥ //
tapasyeva phalaṃ sarvaiḥ prāpyate nānyathā kvacit

// brahmovāca //
evamuktvā tadā kālīṃ nārada tvaṃ śivapriyaḥ//
yādṛcchiko'gamastvaṃ tu svargaṃ devahite rataḥ

pārvatī ca tadā śrutvā vacanaṃ tava nārada //
suprasannā tadā prāpa paṃcākṣaramanūttamam

//
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe nāradopadeśo nāmaikaviṃśo'dhyāyaḥ