Shiva Purana · Chapter 2.3.20

nārada uvāca // //
vidhe netrasamudbhūtavahnijvālā harasya sā //
gatā kutra vada tvaṃ taccaritraṃ śaśimaulinaḥ

// brahmovāca // //
yadā bhasma cakārāśu tṛtīyanayanānalaḥ //
śambhoḥ kāmaṃ prajajvāla sarvato viphalastadā

hāhākāro mahānāsīttrailokye sacarācare/
sarvadevarṣayastāta śaraṇaṃ māṃ yayurdrutam

sarve nivedayāmāsustaddukhaṃ mahyamākulāḥ //
supraṇamya susaṃstutya karau baddhvā natānanā

tacchrutvāhaṃ śivaṃ smṛtvā taddhetuṃ suvimṛśya ca //
gatastatra vinītātmā trilokāvanahetave

saṃdagdhukāmaḥ sa śucijvālāmālātidīpitaḥ //
staṃbhito'raṃ mayā śaṃbhuprasādāptasutejasā

atha krodhamayaṃ vahniṃ dagdhukāma jagattrayam //
vāḍavāṃtakamārṣaṃ ca saumyajvālāmukhaṃ mune

taṃ vāḍavatanumahaṃ samādāya śivecchayā //
sāgaraṃ samagāṃ lokahitāya jagatāṃ patiḥ

āgataṃ māṃ samālokya sāgarassāṃjalirmune //
dhṛtvā ca pauruṣaṃ rūpamāgatassaṃnidhiṃ mama

supraṇamyātha māṃ siṃdhussaṃstūya ca yathā vidhi //
sa māmuvāca suprītyā sarvalokapitāmaham

sāgara uvāca //
kimarthamāgato'si tvaṃ brahmannatrākhilādhipa //
tannideśaya suprītyā matvā māṃ ca svasevakam

athāhaṃ sāgaravacaśśrutvā prītipurassaram //
prāvocaṃ śaṃkaraṃ smṛtvā laukikaṃ hitamāvahan

brahmovāca //
śṛṇu tāta mahādhīmansarvalokahitāvaha //
vacmyahaṃ prītitassiṃdho śivecchāprerito hṛdā

ayaṃ krodho maheśasya vāḍavātmā mahāprabhuḥ //
dagdhvā kāmaṃ drutaṃ sarvaṃ dagdhukāmo'bhavattataḥ

prārthito'haṃ suraiśśīghraṃ pīḍitaiśśaṃkarecchayā //
tatrāgatya drutaṃ taṃ vai tāta staṃbhitavāñśucim

vāḍavaṃ rūpamādhatta tamādāyāga totra ha //
nirdiśāmi jalādhāra tvāmahaṃ karuṇākaraḥ

ayaṃ krodhī maheśasya vāḍavaṃ rūpamāśritaḥ //
jvālāmukhastvayā dhāryyo yāvadābhūtasaṃplavam

yadātrāhaṃ samāgamya vatsyāmi saritāṃ pate //
tadā tvayā parityājyaḥ krodho'yaṃ śāṃkaro'dbhutaḥ

bhojanaṃ toyametasya tava nityaṃ bhaviṣyati //
yatnādevāvadhāryyo'yaṃ yathā nopaiti cāṃtaram

brahmovāca //
ityukto hi mayā siṃdhuraṃgīcakre tadā dhuvam //
grahītuṃ vāḍavaṃ vahniṃ raudraṃ cāśakyamanyataḥ

tataḥ praviṣṭo jaladhau sa vāḍavatanuḥ śuciḥ //
vāryoghānsudahaṃstasya jvālāmālābhidīpitaḥ

tatassaṃtuṣṭacetaskassvaṃ dhāmāhaṃ gato mune //
aṃtardhānamagātsiṃdhurdivyarūpaḥ praṇamya mām

svāsthyaṃ prāpa jagatsarvaṃ nirmuktaṃ tadbhavādbhayāt //
devā babhūvuḥ sukhino munayaśca mahāmune २३ //
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṃḍe vaḍavānalacaritaṃ nāma viṃśo'dhyāyaḥ