શિવ પુરાણ · અધ્યાય 2.3.20

નારદ ઉવાચ ॥ ॥
વિધે નેત્રસમુદ્ભૂતવહ્નિજ્વાલા હરસ્ય સા ॥
ગતા કુત્ર વદ ત્વં તચ્ચરિત્રં શશિમૌલિનઃ

॥ બ્રહ્મોવાચ ॥ ॥
યદા ભસ્મ ચકારાશુ તૃતીયનયનાનલઃ ॥
શમ્ભોઃ કામં પ્રજજ્વાલ સર્વતો વિફલસ્તદા

હાહાકારો મહાનાસીત્ત્રૈલોક્યે સચરાચરે।
સર્વદેવર્ષયસ્તાત શરણં માં યયુર્દ્રુતમ્

સર્વે નિવેદયામાસુસ્તદ્દુખં મહ્યમાકુલાઃ ॥
સુપ્રણમ્ય સુસંસ્તુત્ય કરૌ બદ્ધ્વા નતાનના

તચ્છ્રુત્વાહં શિવં સ્મૃત્વા તદ્ધેતું સુવિમૃશ્ય ચ ॥
ગતસ્તત્ર વિનીતાત્મા ત્રિલોકાવનહેતવે

સંદગ્ધુકામઃ સ શુચિજ્વાલામાલાતિદીપિતઃ ॥
સ્તંભિતોઽરં મયા શંભુપ્રસાદાપ્તસુતેજસા

અથ ક્રોધમયં વહ્નિં દગ્ધુકામ જગત્ત્રયમ્ ॥
વાડવાંતકમાર્ષં ચ સૌમ્યજ્વાલામુખં મુને

તં વાડવતનુમહં સમાદાય શિવેચ્છયા ॥
સાગરં સમગાં લોકહિતાય જગતાં પતિઃ

આગતં માં સમાલોક્ય સાગરસ્સાંજલિર્મુને ॥
ધૃત્વા ચ પૌરુષં રૂપમાગતસ્સંનિધિં મમ

સુપ્રણમ્યાથ માં સિંધુસ્સંસ્તૂય ચ યથા વિધિ ॥
સ મામુવાચ સુપ્રીત્યા સર્વલોકપિતામહમ્

સાગર ઉવાચ ॥
કિમર્થમાગતોઽસિ ત્વં બ્રહ્મન્નત્રાખિલાધિપ ॥
તન્નિદેશય સુપ્રીત્યા મત્વા માં ચ સ્વસેવકમ્

અથાહં સાગરવચશ્શ્રુત્વા પ્રીતિપુરસ્સરમ્ ॥
પ્રાવોચં શંકરં સ્મૃત્વા લૌકિકં હિતમાવહન્

બ્રહ્મોવાચ ॥
શૃણુ તાત મહાધીમન્સર્વલોકહિતાવહ ॥
વચ્મ્યહં પ્રીતિતસ્સિંધો શિવેચ્છાપ્રેરિતો હૃદા

અયં ક્રોધો મહેશસ્ય વાડવાત્મા મહાપ્રભુઃ ॥
દગ્ધ્વા કામં દ્રુતં સર્વં દગ્ધુકામોઽભવત્તતઃ

પ્રાર્થિતોઽહં સુરૈશ્શીઘ્રં પીડિતૈશ્શંકરેચ્છયા ॥
તત્રાગત્ય દ્રુતં તં વૈ તાત સ્તંભિતવાઞ્શુચિમ્

વાડવં રૂપમાધત્ત તમાદાયાગ તોત્ર હ ॥
નિર્દિશામિ જલાધાર ત્વામહં કરુણાકરઃ

અયં ક્રોધી મહેશસ્ય વાડવં રૂપમાશ્રિતઃ ॥
જ્વાલામુખસ્ત્વયા ધાર્ય્યો યાવદાભૂતસંપ્લવમ્

યદાત્રાહં સમાગમ્ય વત્સ્યામિ સરિતાં પતે ॥
તદા ત્વયા પરિત્યાજ્યઃ ક્રોધોઽયં શાંકરોઽદ્ભુતઃ

ભોજનં તોયમેતસ્ય તવ નિત્યં ભવિષ્યતિ ॥
યત્નાદેવાવધાર્ય્યોઽયં યથા નોપૈતિ ચાંતરમ્

બ્રહ્મોવાચ ॥
ઇત્યુક્તો હિ મયા સિંધુરંગીચક્રે તદા ધુવમ્ ॥
ગ્રહીતું વાડવં વહ્નિં રૌદ્રં ચાશક્યમન્યતઃ

તતઃ પ્રવિષ્ટો જલધૌ સ વાડવતનુઃ શુચિઃ ॥
વાર્યોઘાન્સુદહંસ્તસ્ય જ્વાલામાલાભિદીપિતઃ

તતસ્સંતુષ્ટચેતસ્કસ્સ્વં ધામાહં ગતો મુને ॥
અંતર્ધાનમગાત્સિંધુર્દિવ્યરૂપઃ પ્રણમ્ય મામ્

સ્વાસ્થ્યં પ્રાપ જગત્સર્વં નિર્મુક્તં તદ્ભવાદ્ભયાત્ ॥
દેવા બભૂવુઃ સુખિનો મુનયશ્ચ મહામુને ૨૩ ॥
ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં તૃતીયે પાર્વતીખંડે વડવાનલચરિતં નામ વિંશોઽધ્યાયઃ