Shiva Purana · Chapter 2.3.19

// nārada uvāca//
brahmanvidhe mahābhāga kiṃ jātaṃ tadanaṃtaram//
kathaya tvaṃ prasādena tāṃ kathāṃ pāpanāśinīm

// brahmovāca //
śrūyatāṃ sā kathā tāta yajjātaṃ tadanaṃtaram //
tava snehātpravakṣyāmi śivalīlāṃ mudāvahām

dhairyasya vyasanaṃ dṛṣṭvā mahāyogī maheśvaraḥ //
viciṃtitaṃ manasyevaṃ vismito'titataḥ param

// śiva uvāca //
kimu vighnāḥ samutpannāḥ kurvatastapa uttamam //
kena me vikṛtaṃ cittaṃ kṛtamatra kukarmiṇā

kuvarṇanaṃ mayā prītyā parastryupari vai kṛtam //
jāto dharmavirodho'tra śrutisīmā vilaṃghitā

// brahmovāca //
viciṃtyetthaṃ mahāyogī parameśassatāṃ gatiḥ //
diśo vilokayāmāsa paritaśśaṃkitastadā

vāmabhāge sthitaṃ kāmaṃ dadarśākṛṣṭabāṇakam //
svaśaraṃ kṣeptukāmaṃ hi garvitaṃ mūḍhacetasam

taṃ dṛṣṭvā tādṛśaṃ kāmaṃ girīśasya parātmanaḥ //
saṃjātaḥ krodhasaṃmardastatkṣaṇādapi nārada/

kāmaḥ sthito'ntarikṣe sa dhṛtvā tatsaśaraṃ dhanuḥ //
cikṣepāstraṃ durnivāramamoghaṃ śaṃkare mune

babhūvāmoghamastraṃ tu moghaṃ tatparamātmani //
samaśāmyattatastasminsaṃkuddhe parameśvare

moghībhūte śive svestre bhayamāpāśu manmathaḥ //
cakaṃpe ca puraḥ sthitvā dṛṣṭvā mṛtyuṃjayaṃ prabhum

sasmāra tridaśānsarvānśakrādīnbhayavihvalaḥ //
sa smaro muniśārdūla svaprayāse nirarthake

kāmena susmṛtā devāśśakrādyāste munīśvara //
āyayuḥ sakalāste hi śaṃbhuṃ natvā ca tuṣṭuvuḥ

stutiṃ kurvatsu deveṣu kuddhasyāti harasya hi //
tṛtīyāttasya netrādvai nissasāra tato mahān

lalāṭa madhyagāttasmātsavahnirdrutasambhavaḥ //
jajvālorddhvaśikho dīptaḥ pralayāgnisamaprabhaḥ

utpatya gagane tūrṇaṃ niṣpatya dharaṇī tale //
bhrāmaṃbhrāmaṃ svaparitaḥ papāta medanīṃ pari // १६
bhasmasātkṛtavānsādho madanaṃ tāvadeva hi //
yāvacca marutāṃ vācaḥ kṣamyatāṃ kṣamyatāmiti

hate tasminsmare vīre deva duḥkhamupāgatāḥ //
rurudurvihvalāścātikrośataḥ kimabhūditi

//
śvetāṃgā vikṛtātmā ca girirājasutā tadā //
jagāma maṃdiraṃ svaṃ ca samādāya sakhījanam

kṣaṇamātraṃ ratistatra visaṃjñā sābhavattadā //
bhartṛmṛtyujaduḥkhena patitā sā mṛtā iva

jātāyāṃ caiva saṃjñāyāṃ ratiratyaṃtavihvalā//
vilalāpa tadā tatroccaraṃtī vividhaṃ vacaḥ

// ratiruvāca //
kiṃ karomi kva gacchāmi kiṃ kṛtaṃ daivatairiha //
matsvāminaṃ samāhūya nāśayāmāsuruddhatam

hā hā nātha smara svāminprāṇapriya sukhaprada //
idaṃ tu kimabhūdatra hā hā priya priyeti ca

// brahmovāca ///
itthaṃ vilapatī sā tu vadaṃtī bahudhā vacaḥ //
hastau pādau tadāsphālya keśānatroṭayattadā

tadvilāpaṃ tadā śrutvā tatra sarve vanecarāḥ //
abhavanduḥkhitāssarve sthāvarā api nārada

etasminnaṃtare tatra devāśśakrādayo'khilāḥ //
ratimūcussamāśvāsya saṃsmaraṃto maheśvaram

// devā ūcuḥ //
kiṃcidbhasma gṛhītvā tu rakṣa yatnādbhayaṃ tyaja//
jīvayiṣyati sa svāmī lapsyase tvaṃ punaḥ priyam

sukhadātā na kopyasti duḥkhadātā na kaścana //
sarvo'pi svakṛtaṃ bhuṃkte devāñśocasi vai vṛthā

/
// brahmovāca //
ityāśvāsya ratiṃ devāssarve śivamupāgatāḥ //
suprasādya śivaṃ bhaktyā vacanaṃ cedamabruvan

// devā ūcuḥ //
bhagavañchrūyatometadvacanaṃ naśśubhaṃ prabho//
kṛpāṃ kṛtvā maheśāna śaraṇāgatavatsala

suvicāraya suprītyā kṛti kāmasya śaṃkara //
kāmenaitatkṛtaṃ yatra na svārthaṃ tanmaheśvara

duṣṭena pīḍitairdevaistārakeṇā'khilairvibho //
karma tatkāritaṃ nātha nānyathā viddhi śaṃkara

ratirekākinī deva vilāpaṃ duḥkhitā satī //
karoti giriśa tvaṃ ca tāmāśvāsaya sarvadā

saṃhāraṃ kartukāmo'si krodhenānena śaṃkara //
daivataissaha sarveṣāṃ hatavāṃstaṃ yadi smaram

duḥkhaṃ tasyā raterdṛṣṭvā naṣṭaprāyāśca devatāḥ//
tasmāttvayā ca karttavyaṃ ratyāśokāpanodanam

// brahmovāca //
ityākarṇya vacasteṣāṃ prasanno bhagavāñchivaḥ //
devānāṃ sakalānāṃ ca vacanaṃ cedamabravīt

// śiva uvāca // //
devāśca ṛṣayassarve madvacaśśṛṇutādarāt //
matkopena ca yajjātaṃ tattathā nānyathā bhavat

anaṃgastāvadeva syātkāmo ratipatiḥ prabhuḥ //
yāvaccāvataretkṛṣṇo dharaṇyāṃ rukmiṇīpatiḥ

dvārakāyāṃ yadā sthitvā putrānutpādayiṣyati//
tadā kṛṣṇastu rukmiṇyāṃ kāmamutpādayiṣyati

pradyumnanāma tasyaiva bhaviṣyati na saṃśayaḥ //
jātamātraṃ tu taṃ putraṃ śaṃbarassaṃhariṣyati

hṛtvā prāsya samudraṃ taṃ śaṃbaro dānavottamaḥ //
mṛtaṃ jñātvā vṛthā mūḍho nagaraṃ svaṃ gamiṣyati

tāvacca nagaraṃ tasya rate stheyaṃ yathāsukham //
tatraiva svapateḥ prāptiḥ pradyumnasya bhaviṣyati

tatra kāmo militvā taṃ hatvā śambaramāhave //
bhaviṣyati sukhī devāḥ pradyumnākhyassvakāminīm

tadīyaṃ caiva yaddravyaṃ nītvā sa nagaraṃ punaḥ //
gamiṣyati tayā sārddhaṃ devāssatyaṃ vaco mama

brahmovāca //
iti śrutvā vacaśśaṃbhordevā ūcuḥ praṇamya tam //
kiṃciducchvasitāścitte karau baddhvā natāṃgakāḥ

devā ūcuḥ //
devadeva mahādeva karuṇāsāgara prabho //
śīghraṃ jīvaya kāmaṃ tvaṃ rakṣa prāṇān raterhara

brahmovāca//
ityākarṇyāmaravacaḥ prasannaḥ parameśvaraḥ//
punarbabhāṣe karuṇāsāgarassakaleśvaraḥ

śiva uvāca //
he devāssuprasanno'smi jīvayiṣyāmi cāṃtare //
kāmaḥ sa madgaṇo bhūtvā vihariṣyati nityaśaḥ

nākhyeyamidamākhyānaṃ kasyacitpuratassurāḥ //
gacchata svasthalaṃ dukhaṃ nāśayiṣyāmi sarvataḥ

brahmovāca //
ityuktvāṃtardadhe rudro devānāṃ stuvatāṃ tadā//
sarve devāssuprassannā babhūvurgatavismayāḥ

tatastāṃ ca samāśvāsya rudrasya vacane sthitāḥ//
uktvā vacastadīyaṃ ca svaṃ svaṃ dhāma yayurmune

kāmapatnī samādiṣṭaṃ nagaraṃ sā gatā tadā //
pratīkṣamāṇā taṃ kālaṃ rudrādiṣṭaṃ munīśvara

//
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe kāmanāśavarṇanaṃ nāmaikonaviṃśo'dhyāyaḥ