Shiva Purana · Chapter 2.3.18

// brahmovāca //
tatra gatvā smaro garvī śivamāyāvimohitaḥ //
mohakassamadhoścādau dharmaṃ vistārayansthitaḥ

vasaṃtasya ca yo dharmmaḥ prasasāra sa sarvataḥ //
tapasthāne maheśasyauṣadhiprasthe munīśvara

vanāni ca praphullāni pādapānāṃ mahāmune //
āsanviśeṣatastatra tatprabhāvānmunīśvara

puṣpāṇi sahakārāṇāmaśokavanikāsu vai //
virejussusmaroddīpakārāṇi surabhīṇyapi

kairavāṇi ca puṣpāṇi bhramarākalitāni ca //
babhūburmadanāveśakarāṇi ca viśeṣataḥ

sakāmoddīpanakaraṃ kokilākalakūjitam //
āsīdati suramyaṃ hi manoharamatipriyam

bhramarāṇāṃ tathā śabdā vividhā abhavanmune //
manoharāśca sarveṣāṃ kāmoddīpakarā api

caṃdrasya viśadā kāṃtirvikīrṇā hi samaṃtata //
kāmināṃ kāminīnāṃ ca dūtikā iva sābhavat

mānināṃ preraṇāyāsīttatkāle kāladīpikā //
mārutaśca sukhaḥ sādho vavau virahiṇo'priyaḥ

evaṃ vasaṃtavistāro madanāveśakārakaḥ //
vanaukasāṃ tadā tatra munīnāṃ dussaho'tyabhūt

acetasāmapi tadā kāmāsaktirabhūnmune //
sucetāsāṃ hi jīvānāṃ seti kiṃ varṇyate kathā//१ १ //
evaṃ cakāra sa madhussvaprabhāvaṃ sudussaham//
sarveṣā caiva jīvānāṃ kāmoddīpanakārakaḥ

akālanimitaṃ tāta madhorvīkṣya harastadā //
āścaryyaṃ paramaṃ mene svalīlāttatanuḥ prabhuḥ

atha līlākarastatra tapaḥ paramaduṣkaram //
tatāpa sa vaśīśo hi haro duḥkhaharaḥ prabhuḥ

vasaṃte prasṛte tatra kāmo ratisamanvitaḥ //
cūtaṃ bāṇaṃ samākṛṣya sthitastadvāmapārśvataḥ

svaprabhāvaṃ vitastāra mohayansakalāñjanān //
ratyāyuktaṃ tadā kāmaṃ dṛṣṭvā ko vā na mohitaḥ

evaṃ pravṛttasuratau śṛṃgāro'pi gaṇaissaha //
hāvabhāvayutastatra praviveśa harāṃtikam

madanaḥ prakaṭastatra nyavasaccittago bahiḥ //
na dṛṣṭavāṃstadā śaṃbhośchidraṃ yena praviśyate

yadā cāprāptavivarastasminyogivare smaraḥ //
mahādevastadā so'bhūnmahābhayavimohitaḥ

jvalajjvālāgnisaṃkāśaṃ bhālanetrasamanvitam //
dhyānasthaṃ śaṃkaraṃ ko vā samāsādayituṃ kṣamaḥ

etasminnaṃtare tatra sakhībhyāṃ saṃyutā śivā //
jagāma śivapūjārthaṃ nītvā puṣpāṇyanekaśaḥ

pṛthivyāṃ yādṛśaṃ lokaissauṃdaryaṃ varṇyate mahat //
tatsarvamadhikaṃ tasyāṃ pārvatyāmasti niścitam //

ārtavāṇi supuṣpāṇi dhṛtāni ca tayā yadā //
tatsauṃdaryaṃ kathaṃ varṇyamapi varṣaśatairapi

yadā śivasamīpe tu gatā sā parvatātmajā //
tadaiva śaṃkaro dhyānaṃ tyaktvā kṣaṇamavasthitaḥ

tacchidraṃ prāpya madanaḥ prathamaṃ harṣaṇena tu //
bāṇena harṣayāmāsa pārśvasthaṃ candraśekharam

śṛṃgāraiśca tadā bhāvaissahitā pārvatī haram //
jagāma kāmasāhāyye mune surabhiṇā saha

tadevākṛṣya taccāpaṃ rucyarthaṃ śūladhāriṇaḥ //
drutaṃ puṣpaśaraṃ tasmai smaro'muṃcatsusaṃyataḥ

yathā niraṃtaraṃ nityamāgacchati tathā śivam //
tannamaskṛtya tatpūjāṃ kṛtvā tatpurataḥ sthitā

sā dṛṣṭā pārvatī tatra prabhuṇā giriśena hi //
vivṛṇvatī tadāṃgāni strīsvabhāvātsulajjayā

susaṃsmṛtya varaṃ tasyā vidhidattaṃ purā prabhuḥ //
śivopi varṇayāmāsa tadaṃgāni mudā mune

śiva uvāca //
ki mukhaṃ kiṃ śaśāṃkaśca kiṃ netre cotpale ca kim //
bhrukuṭyau dhanuṣī caite kaṃdarpasya mahātmanaḥ

adharaḥ kiṃ ca biṃbaṃ kiṃ kiṃ nāsā śukacaṃcukā //
kiṃ svaraḥ kokilālāpaḥ kiṃ madhyaṃ cātha vedikā

kiṃ gatirvarṇyate hyasyāḥ kiṃ rūpaṃ varṇyate muhuḥ //
puṣpāṇi kiṃ ca varṇyaṃte vastrāṇi ca tathā punaḥ

lālityaṃ cāru yatsṛṣṭau tadekatra vinirmitam //
sarvathā ramaṇīyāni sarvāṃgāni na saṃśayaḥ

aho dhanyatarā ceyaṃ pārvatyadbhutarūpiṇī //
etatsamā na trailokye nārī kāpi surūpiṇī

sulāvaṇyānidhiśceyamadbhutāṃgāni bibhratī //
vimohinī munīnāṃ ca mahāsukhavivarddhinī

// brahmovāca //
ityevaṃ varṇayitvā tu tadaṃgāni muhurmuhuḥ //
vidhidattavarādhyāsāddharastu virarāma ha

hastaṃ vastrāṃtare yāvadacālayata śaṃkaraḥ //
strīsvabhāvācca sā tatra lajjitā dūrato gatā

vivṛṇvatī nijāṃgāni paśyaṃtī ca muhurmuhuḥ //
suvīkṣaṇairmahāmodātsusmitābhūcchivā mune

evaṃ ceṣṭāṃ tadā dṛṣṭvā śaṃbhurmohamupāgataḥ//
uvāca vacanaṃ caivaṃ mahālīlo maheśvaraḥ

asyā darśanamātreṇa mahānaṃdo bhavatyalam //
yadāliṃganamenasyāḥ kuryyāṃ kintu tatassukham

kṣaṇamātraṃ vicāryyetthaṃ saṃpūjya girijāṃ tataḥ //
prabuddhasya mahāyogī suvirakto jagāviti

kiṃ jātaṃ caritaṃ citraṃ kimahaṃ mohamāgataḥ //
kāmena vikṛtaścādya bhūtvāpi prabhurīśvaraḥ

īśvarohaṃ yadīccheyaṃ parāṃgasparśanaṃ khalu//
tarhi ko'nyo'kṣamaḥ kṣudraḥ kiṃ kiṃ naiva kariṣyati

evaṃ vairāgyamāsādya paryyaṃkāsādanaṃ ca tat//
vārayāmāsa sarvātmā pareśaḥ kiṃ patediha

iti śrīśivamahāpurāṇe dvitīyāyāṃ rudrasaṃhitāntargatatṛtīye pārvatīkhaṇḍe kāmakṛtavikāravarṇananāmāṣṭādaśo'dhyāyaḥ