Shiva Purana · Chapter 2.3.17

// brahmovāca //
gateṣu teṣu deveṣu śakraḥ sasmāra vai smaram //
pīḍitastārakenātidetyena ca durātmanā

āgatastatkṣaṇātkāmassavasaṃto ratipriyaḥ //
sāvalepo yuto ratyā trailokya vijayī prabhuḥ

praṇāmaṃ ca tataḥ kṛtvā sthitvā tatpuratassmaraḥ //
mahonnatamanāstāta sāṃjaliśśakramabravīt

kāma uvāca //
kiṃ kāryyaṃ te samutpannaṃ smṛto'haṃ kena hetunā //
tattvaṃ kathaya deveśa tatkartuṃ samupāgataḥ

// brahmovāca //
tacchrutvā vacanaṃ tasya kaṃdarpasya sureśvaraḥ //
uvāca vacanaṃ prītyā yuktaṃ yuktamiti stuvan

// śakra uvāca//
tava sādhu samārambho yanme kāryyamupasthitam//
tatkaturmudyato'si tvaṃ dhanyo'si makaradhvaja

prastutaṃ śṛṇu madvākyaṃ kathayāmi tavāgrataḥ//
madīyaṃ caiva yatkāryaṃ tvadīyaṃ tanna cānyathā

mitrāṇi mama saṃtyeva bahūni sumahāṃti ca //
paraṃ tu smara sanmitraṃ tvattulyaṃ na hi kutracit

jayārthaṃ me dvayaṃ tāta nirmitaṃ vajamuttamam //
vajraṃ ca niṣphalaṃ syādvai tvaṃ tu naiva kadācana

yato hitaṃ prajāyeta tataḥ ko nu priyaḥ paraḥ //
tasmānmitravarastvaṃ hi matkāryyaṃ kartumarhasi

mama duḥkhaṃ samutpannamasādhya cāpi kālajam //
kenāpi naiva tacchakyaṃ dūrīkartuṃ tvayā vinā

dātuḥ parīkṣā durbhikṣe raṇe śūrasya jāyate //
āpatkāle tu mitrasyāśaktau strīṇāṃ kulasya hi

vinaye saṃkaṭe prāpte'vitathasya parokṣataḥ //
susnehasya tathā tāta nānyathā satyamīritam

prāptāyāṃ vai mamāpattāvavāryāyāṃ pareṇa hi //
parīkṣā ca tvadīyā'dya mitravarya bhaviṣyati

na kevalaṃ madīyaṃ ca kāryyamasti sukhāvaham //
kiṃ tu sarvasurādīnāṃ kāryyametanna saṃśayaḥ

brahmovāca //
ityetanmaghavadvākyaṃ śrutvā tu makaradhvajāḥ //
uvāca premagabhīraṃ vākyaṃ susmitapūrvakam

// kāma uvāca //
kimarthamitthaṃ vadasi nottaraṃ vacmyahaṃ tava //
upakṛtkṛtrimaṃ loke dṛśyate kathyate na ca

saṅkaṭe bahu yo brūte sa kiṃ kāryyaṃ kariṣyati //
tathāpi ca mahārāja kathayāmi śṛṇu prabho

padaṃ te karṣituṃ yo vai tapastapati dāruṇam //
pātayiṣyāmyahaṃ taṃ ca śatruṃ te mitra sarvathā

kṣaṇena bhraṃśayiṣyāmi kaṭākṣeṇa varastriyāḥ //
devarṣidānavādīṃśca narāṇāṃ gaṇanā na me

vajraṃ tiṣṭhatu dūre vai śastrāṇyanyānyanekaśaḥ //
kiṃ te kāryaṃ kariṣyaṃti mayi mitra upasthite

brahmāṇaṃ vā hariṃ vāpi bhraṣṭaṃ kuryyāṃ na saṃśayaḥ //
anyeṣāṃ gaṇanā nāsti pātayeyaṃ haraṃ tvapi

paṃcaiva mṛdavo bāṇāste ca puṣpamayā mama //
cāpastridhā puṣpamayaśśiṃjinī bhramarārjjitā //
balaṃ sudayitā me hi vasaṃtaḥ sacivassmṛtaḥ

ahaṃ pañcabalodevā mitraṃ mama sudhānidhiḥ

senādhipaśca śṛṃgāro hāvabhāvāśca sainikāḥ //
sarve me mṛdavaḥ śakra ahaṃ cāpi tathāvidhaḥ

yadyena pūryate kāryyaṃ dhīmāṃstattena yojayet//
mama yogyaṃ tu yatkāryyaṃ sarvaṃ tanme niyojaya

// brahmovāca //
ityevaṃ tu vacastasya śrutvā śakrassuharṣitaḥ //
uvāca praṇamanvācā kāmaṃ kāṃtāsukhāvaham

śakra uvāca //
yatkāryyaṃ manasoddiṣṭaṃ mayā tāta manobhava //
karttuṃ tattvaṃ samartho'si nānyasmāttasyasambhavaḥ

śṛṇu kāma pravakṣyāmi yathārthaṃ mitrasattama //
yadarthe ca spṛhā jātā tava cādya manobhava

tārakākhyo mahādaityo brahmaṇo varamadbhutam //
abhūdajeyassaṃprāpya sarveṣāmapi duḥkhadaḥ

tena saṃpīḍyate loko naṣṭā dharmā hyanekaśaḥ //
duḥkhitā nirjarāssarve ṛṣayaśca tathākhilāḥ

devaiśca sakalaistena kṛtaṃ yuddhaṃ yathābalam //
sarveṣāṃ cāyudhānyatra viphalānyabhavanpurā

bhagnaḥ pāśo jaleśasya hariṃ cakraṃ sudarśanam //
tatkuṇṭhitamabhūttasya kaṇṭhe kṣiptaṃ ca viṣṇunā

etasya maraṇaṃ proktaṃ prajeśena durātmanaḥ //
śambhorvīryodbhavādbālānmahāyogīśvarasya hi

etatkāryyaṃ tvayā sādhu kartavyaṃ suprayatnataḥ //
tatassyānmitravaryyāti devānāṃ naḥ paraṃ sukham

mamāpi vihitaṃ tasmātsarvalokasukhāvaham //
mitradharmaṃ hṛdi smṛtvā kartumarhasi sāṃpratam

śaṃbhussa girirāje hi tapaḥ paramamāsthitaḥ //
sa prabhurnāpi kāmena svataṃtraḥ parameśvaraḥ

tatsamīpe ca devātha pārvatī svasakhīyutā //
sevamānā tiṣṭhatīti pitrājñaptā mayā śrutam

yathā tasyāṃ rucistasya śivasya niyatātmanaḥ //
jāyate nitarāṃ māra tathā kāryaṃ tvayā dhruvam

iti kṛtvā kṛtī syāstvaṃ sarvaṃ duḥkhaṃ vinaṃkṣyati //
loke sthāyī pratāpaste bhaviṣyati na cānyathā

brahmovāca //
ityuktasya tu kāmo hi praphullamukhapaṃkaja //
premṇovāceti deveśaṃ kariṣyāmi na saṃśayaḥ

ityuktvā vacanaṃ tasmai tathetyomiti tadvacaḥ //
agrahīttarasā kāmaḥ śivamāyāvimohitaḥ

yatra yogīśvarassākṣāttapyate paramaṃ tapaḥ //
jagāma tatra suprītassadārassavasaṃtakaḥ

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śakra kāmasaṃvādavarṇanaṃ nāma saptadaśo'dhyāyaḥ