Shiva Purana · Chapter 2.3.14

// nārada uvāca //
viṣṇuśiṣya mahāśaiva samyaguktaṃ tvayā vidhe //
caritaṃ paramaṃ hyetacchivāyāśca śivasya ca

kastārakāsuro brahmanyena devāḥ prapīḍitāḥ //
kasya putrasya vai brūhi tatkathāṃ ca śivāśrayām

bhasmī cakāra sa kathaṃ śaṃkaraśca smaraṃ vaśī //
tadapi brūhi suprītyādbhutaṃ taccaritaṃ vibhoḥ

kathaṃ śivā tapo'tyugraṃ cakāra sukhahetave //
kathaṃ prāpa patiṃ śaṃbhumādiśaktirjagatparā

etatsarvamaśeṣeṇa viśeṣeṇa mahābudha //
brūhi me śraddadhānāya svaputrāya śivātmane

brahmovāca // putravarya mahāprājña surarṣe śaṃsitavrataḥ //
vacmyahaṃ śaṃkaraṃ smṛtvā sarvaṃ taccaritaṃ śṛṇu

prathamaṃ tārakasyaiva bhavaṃ saṃśṛṇu nārada//
yadvadhārthaṃ mahā yatnaḥ kṛto daivaiśśivāśrayaiḥ

mama putro marīciryaḥ kaśyapastasya cātmajaḥ//
trayodaśamitāstasya striyo dakṣasutāśca yāḥ

ditirjyeṣṭhā ca tatstrī hi suṣuve sā sutadvayam//
hiraṇyakaśipurjyeṣṭho hiraṇyākṣo'nujastataḥ

tau hatau viṣṇunā daityau nṛsiṃhakroḍarūpataḥ//
suduḥkhadau tato devāḥ sukhamāpuśca nirbhayāḥ// 2.3.14.१ ०//
ditiśca duḥkhitāsītsā kaśyapaṃ śaraṇaṃ gatā//
punassaṃsevya taṃ bhaktyā garbhamādhatta suvratā // १ १//
tadvijñāya maheṃdro'pi labdhacchidro mahodyamī//
tadgarbhaṃ vyacchinattatra praviśya pavinā muhuḥ

/
tadvratasya prabhāveṇa na tadgarbho mamāra ha//
svapaṃtyā daivayogena sapta saptābhavansutāḥ

devā āsansutāste ca nāmato maruto'khilāḥ //
svargaṃ yayustadendreṇa devarājātmasātkṛtāḥ

punarditiḥ patiṃ bheje'nutaptā nijakarmataḥ //
cakāra suprasannaṃ taṃ muniṃ paramasevayā ' १५ //
// kaśyapa uvāca //
tapaḥ kuru śucirbhūtvā brahmaṇaścāyutaṃ samāḥ //
cedbhaviṣyati tatpūrvaṃ bhavitā te sutastadā

tathā dityā kṛtaṃ pūrṇaṃ tattapaśśraddhayā mune//
tataḥ patyuḥ prāpya garbhaṃ suṣuve tādṛśaṃ sutam

vajāṃganāmā so'bhūdvai ditiputro'maropamaḥ //
nāmatulyatanurvīrassupratāpyudbhavādbalī

jananīśāsanātsadyassa suto nirjarādhipam //
balāddhṛtvā dadau daṃḍaṃ vividhaṃ nirjarānapi

ditissukhamatīvāpa dṛṣṭvā śakrādidurdaśām//
amarā api śakrādyā jagmurduḥkhaṃ svakarmataḥ

tadāhaṃ kaśyapenāśu tatrāgatya susāmagīḥ//
devānatyājayaṃstasmātsadā devahite rataḥ

devānmuktvā sa vajrāṃgastataḥ provāca sādaram //
śivabhakto'tiśuddhātmā nirvikāraḥ prasannadhīḥ

// vajrāṃga uvāca//
iṃdro duṣṭaḥ prajāghātī māturme svārthasādhakaḥ //
sa phalaṃ prāptavānadya svarājyaṃ hi karotu saḥ

māturājñāvaśādbrahmankṛtametanmayākhilam //
na me bhogābhilāṣo vai kasyaci dbhuvanasya hi

tattvasāraṃ vidhe sūta mahyaṃ vedavidāmvara //
yena syāṃ susukhī nityaṃ nirvikāraḥ prasannadhīḥ

tacchrutvāhaṃ mune'vocaṃ sāttviko bhāva ucyata //
tattvasāra iti prītyā sṛjāmyekāṃ varāṃ striyam

varāṃgīṃ nāma tāṃ dattvā tasmai ditisutāya vai //
ayāṃ svadhāma suprītaḥ kaśyapastatpitāpi ca

tato daityasya vajrāṃgassātvikaṃ bhāvamāśritaḥ//
āsuraṃ bhāvamutsṛjya nirvairassukhamāptavān

na babhūva varāṃgyā hi hṛdi bhāvotha sātvikaḥ//
sakāmā svapatiṃ bheje śraddhayā vividhaṃ satī

atha tatsevanādāśu saṃtuṣṭo'bhūnmahāprabhuḥ //
sa vajrāṃgaḥ patistasyā uvāca vacanaṃ tadā

vajrāṃga uvāca//
kimicchasi priye brūhi kiṃ te manasi vartate //
tacchutvānamya taṃ prāha sā patiṃ svamanoratham

varāṃgyuvāca //
cet prasanno'bhavastvaṃ vai sutaṃ me dehi satpate //
mahābalaṃ trilokasya jetāraṃ hariduḥkhadam

brahmovāca //
iti śrutvā priyāvākyaṃ vismito'bhūtsa ākulaḥ//
uvāca hṛdi sa jñānī sātviko vairavarjitaḥ

priyecchati virodhaṃ vai surairme na hi rocate //
kiṃ kuryāṃ hi kva gaccheyaṃ kathaṃ naśye na me paṇaḥ

priyāmanorathaścaiva pūrṇassyāttrijagadbhavet //
kleśayuṅnitarā bhūyo devāśca munayastathā

na pūrṇassyātpriyākāmastadā me narako bhavet//
dvidhāpi dharmahānirvai bhavatītyanuśuśruvān

vajrāṃga itthaṃ babhrāma sa mune dharmasaṃkaṭe //
balābalaṃ dvayostatra viciciṃta ca buddhitaḥ

śivecchayā sa hi mune vākyaṃ mene striyo budhaḥ //
tathāstviti vacaḥ prāha priyāṃ prati sa daityarāṭ

tadarthamakarottīvraṃ taponyadduṣkaraṃ sa tu //
māṃ samuddiśya suprītyā bahuvarṣaṃ jiteṃdriyaḥ

varaṃ dātumagāṃ tasmai dṛṣṭvāhaṃ tattapo mahat //
varaṃ brūhi hyavocaṃ taṃ suprasannena cetasā

vajrāṃgastu tadā prītaṃ māṃ dṛṣṭvā sthitaṃ vibhum //
supraṇamya bahustutvā varaṃ vavre priyāhitam

vajrāṃga uvāca//
sutaṃ dehi svamāturme mahāhitakaraṃ prabho //
mahābalaṃ supratāpaṃ susamarthaṃ taponidhim

brahmovāca//
ityākarṇya ca tadvākyaṃ tathāstvityabravaṃ mune //
ayā svadhāma taddattvā vimanāssasmaracchivam

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe tārakotpattau vajrāṃgotpattitapovarṇanaṃ nāma caturdaśo'dhyāyaḥ