Shiva Purana · Chapter 2.3.13

bhavānyuvāca //
kimuktaṃ girirājāya tvayā yogistapasvinā //
taduttaraṃ śṛṇu vibho matto jñāniviśārada

tapaśśaktyānvitaśśambho karoṣi vipulaṃ tapaḥ //
tava buddhiriyaṃ jātā tapastaptuṃ mahātmanaḥ

sā śaktiḥ prakṛtirjñeyā sarveṣāmapi karmaṇām //
tayā viracyate sarvaṃ pālyate ca vināśyate

kastvaṃ kā prakṛtissūkṣmā bhagavaṃstadvimṛśyatām //
vinā prakṛtyā ca kathaṃ liṃgarūpī maheśvaraḥ

arcanīyo'si vaṃdyo'si dhyeyo'si prāṇināṃ sadā //
prakṛtyā ca vicāryeti hṛdā sarvaṃ taducyatām

// brahmovāca //
pārvatyāstadvacaḥ śrutvā mahotikaraṇe rataḥ //
suvihasya prasannātmā maheśo vākyamabravīt

// maheśvara uvāca //
tapasā parameṇeva prakṛtiṃ nāśayāmyaham //
prakṛtyā rahitaśśambhurahaṃ tiṣṭhāmi tattvataḥ

tasmācca prakṛtessadbhirna kāryassaṃgrahaḥ kvacit //
sthātavyaṃ nirvikāraiśca lokācāra vivarjitaiḥ

// brahmovāca //
ityuktā śambhunā tāta laukikavyavahārataḥ //
suvihasya hṛdā kālī jagāda madhuraṃ vacaḥ

/
// kālyuvāca //
yaduktaṃ bhavatā yoginvacanaṃ śaṃkara prabho //
sā ca kiṃ prakṛtirna syādatītastāṃ bhavānkatham // 2.3.13.१ ०//
etadvicārya vaktavyaṃ tattvato hi yathātatham //
prakṛtyā sarvametacca baddhamasti niraṃtaram

tasmāttvayā na vaktavyaṃ na kāryaṃ kiṃcideva hi //
vacanaṃ racanaṃ sarvaṃ prākṛtaṃ viddhi cetasā

yacchṛṇoṣi yadaśnāsi yatpaśyasi karoṣi yat //
tatsarvaṃ prakṛteḥ kāryaṃ mithyāvādo nirarthakaḥ

prakṛteḥ paramaścettvaṃ kimarthaṃ tapyase tapaḥ //
tvayā śaṃbho'dhunā hyasmingirau himavati prabho

prakṛtyā gilito'si tvaṃ na jānāsi nijaṃ hara //
nijaṃ jānāsi cedīśa kimarthaṃ tapyase tapaḥ

vāgvādena ca kiṃ kāryaṃ mama yogistvayā saha //
pratyakṣe hyanumānasya na pramāṇaṃ vidurbudhāḥ

iṃdriyāṇāṃ gocaratvaṃ yāvadbhavati dehinām //
tāvatsarvaṃ vimaṃtavyaṃ prākṛtaṃ jñānibhirdhiyā

kiṃ bahūktena yogīśa śṛṇu madvacanaṃ param //
sā cāhaṃ puruṣo'si tvaṃ satyaṃ satyaṃ na saṃśayaḥ

madanugrahatastvaṃ hi saguṇo rūpavānmataḥ //
māṃ vinā tvaṃ nirīho'si na kiṃcitkartumarhasi

parādhīnassadā tvaṃ hi nānākarmmakaro vaśī //
nirvikārī kathaṃ tvaṃ hi na liptaśca mayā katham

prakṛteḥ paramo'si tvaṃ yadi satyaṃ vacastava //
tarhi tvayā na bhetavyaṃ samīpe mama śaṃkara

// brahmovāca //
ityākarṇya vacastasyāḥ sāṃkhyaśāstroditaṃ śivaḥ //
vedāṃtamatasaṃstho hi vākyamūce śivāṃ prati

śrīśiva uvāca //
ityevaṃ tvaṃ yadi brūṣe girije sāṃkhyadhāriṇī //
pratyahaṃ kuru me sevāmaniṣiddhāṃ subhāṣiṇi

yadyahaṃ brahma nirlipto māyayā parameśvaraḥ //
vedāṃtavedyo māyeśastvaṃ kariṣyasi kiṃ tadā

// brahmovāca //
ityevamuktvā girijāṃ vākyamūce giriṃ prabhuḥ //
bhaktānuraṃjanakaro bhaktānugrahakārakaḥ

śiva uvāca //
atraiva so'haṃ tapasā pareṇa gire tava prasthavare'tiramye //
carāmi bhūmau paramārthabhāvasvarūpamānaṃdamayaṃ sulocayan

tapastaptumanujñā me dātavyā parvatādhipa //
anujñayā vinā kiṃcittapaḥ kartuṃ na śakyate

// brahmovāca //
etacchrutvā vacastasya devadevasya śūlinaḥ //
praṇamya himavāñchaṃbhumidaṃ vacanamabravīt

himavānuvāca //
tvadīyaṃ hi jagatsarvaṃ sadevāsuramānuṣam //
kimapyahaṃ mahādeva tuccho bhūtvā vadāmi te

// brahmovāca //
evamukto himavatā śaṃkaro lokaśaṃkaraḥ //
vihasya girirājaṃ taṃ prāha yāhīti sādaram

śaṃkareṇābhyanujñātassvagṛhaṃ himavānyayau //
sārddhaṃ girijayā vai sa pratyahaṃ darśane sthitaḥ

pitrā vināpi sā kālī sakhībhyāṃ saha nityaśaḥ //
jagāma śaṃkarābhyāśaṃ sevāyai bhaktitatparā

niṣiṣedha na tāṃ ko'pi gaṇo naṃdīśvarādikaḥ //
maheśaśāsanāttāta tacchāsanakaraśśuciḥ

sāṃkhyavedāṃtamatayośśivayośśi vadassadā //
saṃvādaḥ sukhakṛccokto'bhinnayossuvicārataḥ

girirājasya vacanāttanayāṃ tasya śaṃkaraḥ //
pārśve samīpe jagrāha gauravādapi goparaḥ

uvācedaṃ vacaḥ kālīṃ sakhībhyāṃ saha gopatiḥ //
nityaṃ māṃ sevatāṃ yātu nirbhītā hyatra tiṣṭhatu

evamuktvā tu tāṃ devīṃ sevāyai jagṛhe haraḥ //
nirvikāro mahāyogī nānālīlākaraḥ prabhuḥ

idameva mahaddhairyyaṃ dhīrāṇāṃ sutapasvinām //
vighravantyapi saṃprāpya yadvighnairna vihanyate

tataḥ svapuramāyāto girirāṭ paricārakaiḥ//
mumodātīva manasi sapriyassa munīśvara

haraśca dhyānayogena paramātmānamādarāt //
nirvighnena svamanasā tvāsīcciṃtayituṃ sthitaḥ

kālī sakhībhyāṃ sahitā pratyahaṃ caṃdraśekharam //
sevamānā mahādevaṃ gamanāgamane sthitā

prakṣālya caraṇau śaṃbhoḥ papau taccaraṇodakam //
vahniśaucaina vastreṇa cakre tadgātramārjanam

ṣoḍaśenopacāreṇa saṃpūjya vidhivaddharam //
punaḥpunaḥ supraṇamya yayau nityaṃ piturgṛham

evaṃ saṃsevamānāyāṃ śaṃkaraṃ dhyānatatparam //
vyatīyāya mahānkālaśśivāyā munisattama

kadācitsahitā kālī sakhībhyāṃ śaṃkarāśrame //
vitene suṃdaraṃ gānaṃ sutālaṃ smaravarddhanam

kadācitkuśapuṣpāṇi samidhaṃ nayati svayam //
sakhībhyāṃ sthānasaṃskāraṃ kurvatī nyavasattadā

kadācinniyatā gehe sthitā candrabhṛto bhrṛśam //
vīkṣaṃtī vismayāmāsa sakāmā candraśekharam

tatastaptena bhūteśastāṃ nissaṃgāṃ paristhitām //
so'ciṃtayattadā vīkṣya bhūtadehe sthiteti ca

/
nāgrahīdgiriśaḥ kālīṃ bhāryārthe nikaṭe sthitām //
mahālāvaṇyanicayāṃ munīnāmapi mohinīm

mahādevaḥ punardṛṣṭvā tathā tāṃ saṃyatedriyām //
svasevane ratāṃ nityaṃ sadayassamaciṃtayat

yadaivaiṣā tapaścaryāvrataṃ kālī kariṣyati //
tadā ca tāṃ grahīṣyāmi garvabījavivarjitām

// brahmovāca //
iti saṃcintya bhūteśo drutaṃ dhyānasamāśritaḥ //
mahayogīśvaro'bhūdvai mahālīlākaraḥ prabhuḥ

dhyānāsaktasya tasyātha śivasya paramātmanaḥ //
hṛdi nāsīnmune kācidanyā ciṃtā vyavasthitā

kālī tvanudinaṃ śaṃbhuṃ sadbhaktyā samasevata //
viciṃtayaṃtī satataṃ tasya rūpaṃ mahātmanaḥ // ५४ /
haro dhyānaparaḥ kālīṃ nityaṃ praikṣata susthitam //
vismṛtya pūrvaciṃtāṃ tāṃ paśyannapi na paśyati

etasminnaṃtare devāśśakrādyā munayaśca te //
brahmājñayā smaraṃ tatra preṣayāmāsurādarāt

tena kārayituṃ yogaṃ kālyā rudreṇa kāmataḥ //
mahāvīryeṇāsureṇa tārakeṇa prapīḍitāḥ

gatvā tatra smarassarvamupāyamakaronnijam //
cukṣubhe na haraḥ kiñcittaṃ ca bhasmīcakāra ha

pārvatyapi vigarvābhūnmune tasya nideśataḥ //
tatastapo mahatkṛtvā śivaṃ prāpa patiṃ satī

babhūvatustau suprītau pārvatīparameśvarau //
cakraturdevakāryyaṃ hi paropakaraṇe ratau

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṃḍe pārvatīparameśvarasaṃvādavarṇanaṃ nāma trayodaśo'dhyāyaḥ