Shiva Purana · Chapter 2.3.15

brahmovāca //
atha sā garbhamādhatta varāṃgī tatpurādarāt //
sa vavarddhābhyaṃtare hi bahuvarṣaiḥ sutejasā

tataḥ sā samaye pūrṇe varāṃgī suṣuve sutam//
mahākāyaṃ mahāvīryaṃ prajvalaṃtaṃ diśo daśa

tadaiva ca mahotpātā babhūvurduḥkhahetavaḥ //
jāyamāne sute tasminvarāṃgyātsukhaduḥkhade

divi bhuvyaṃtarikṣe ca sarvalokabhayaṃkarāḥ //
anarthasūcakāstāta trividhāstānbravīmyaham

solkāścāśanayaḥ peturmahāśabdā bhayaṃkarāḥ //
udayaṃ cakrurutkṛṣṭāḥ ketavo duḥkhadāyakāḥ

cacāla vasudhā sādrirjajvalussakalā diśaḥ //
cukṣubhussaritassarvāḥ sāgarāśca viśeṣataḥ

hūtkarānīrayandhīrānkharasparśo marudvavau //
unmūlayanmahāvṛkṣānvātyānīkorajodhvajaḥ

sarāhvossūryyavidhvostu muhuḥ paridhayo'bhavan//
mahābhayasya viprendra sūcakāssukhahārakaḥ

mahīdhravivarebhyaśca nirghātā bhayasūcakāḥ //
rathanirhrādatulyāśca jajñire'vasare tataḥ

sṛgālolūkaṭaṃkārairvamantyo mukhato'nalam //
aṃtargrāmeṣu vikaṭaṃ praṇeduraśivāśśivāḥ

yatastato grāmasiṃhā unnamayya śirodharām //
saṃgītavadrodanavadvyamucanvividhānravān

khārkārarabhasā mattāḥ surairghnaṃto rasāṃkharāḥ //
varūthaśastadā tāta paryadhāvannitastataḥ

khagā udapatannīḍādrāsabhatrastamānasaḥ //
krośaṃto vyagracittāśca sthitamāpurna kutracit

śakṛnmūtramakārṣuśca goṣṭhe'raṇye bhayākulaḥ //
babhramuḥ sthitimāpurno paśavastāḍitā iva

gāvo'trasannasṛgdohā vāṣpanetrā bhayākulāḥ //
toyadā abhavaṃstatra bhayadāḥ pūyavarṣiṇaḥ

vyarudanpratimāstatra devānāmutpatiṣṇavaḥ //
vinā'nilaṃ drumāḥ peturgrahayuddhaṃ babhūva khe

ityādikā bahūtpātā jajñire munisattama //
ajñānino janāstatra menire viśvasaṃplavam

atha prajāpatirnāmākarottasyāsurasya vai //
tāraketi vicāryaiva kaśyapo hi mahaujasaḥ

mahāvīrasya sahasā vyajyamānātmapauruṣaḥ //
vavṛdhetyaśmasāreṇa kāyenādripatiryathā

atho sa tārako daityo mahābalaparākramaḥ //
tapaḥ kartuṃ jananyāścājñāṃ yayāce mahāmanāḥ

prāptājñaḥ sa mahāmāyī māyināmapi mohakaḥ //
sarvadevajayaṃ kartuṃ taporthaṃ mana ādadhe

madhorvanamupāgamya gurvājñāpratipālakaḥ //
vidhimuddiśya vidhivattapastepe sudāruṇam

ūrddhvabāhuścaikapādo raviṃ paśyansa cakṣuṣā //
śatavarṣaṃ tapaścakre dṛḍhacitto dṛḍhavrataḥ

aṃguṣṭhena bhuvaṃ spṛṣṭvā śata varṣaṃ ca tādṛśaḥ //
tepe tapo dṛḍhātmā sa tārako'surarāṭprabhuḥ

śatavarṣaṃ jalaṃ prāśnañcchatavarṣaṃ ca vāyubhuk//
śatavarṣa jale tiṣṭhañcchataṃ ca sthaṃḍile'tapat

śatavarṣaṃ tathā cāgnau śatavarṣamadhomukhaḥ //
śatavarṣaṃ tu hastasya talena ca bhuvaṃ sthita

śatavarṣaṃ tu vṛkṣasya śākhāmālabya vai mune //
pādābhyāṃ śucidhūmaṃ hi pibaṃścādhomukhastathā

evaṃ kaṣṭataraṃ tepe sutapassa tu daityarāṭ//
kāmamuddiśya vidhivacchṛṇvatāmapi dussaham

tatraivaṃ tapatastasya mahattejo vinissṛtam//
śirasassarvaṃsaṃsarpi mahopadravakṛnmune

tenaiva devalokāste dagdhaprāyā babhūvire//
abhito duḥkhamāpannāssarve devarṣayo mune

iṃdraśca bhayamāpede 'dhikaṃ deveśvarastadā//
tapasyatyadya kaścidvai matpadaṃ dharṣayiṣyati

akāṃḍe caiva brahmāṇḍaṃ saṃhariṣyatyayaṃ prabhu //
iti saṃśayamāpannā niścayaṃ nopalebhire

tatassarve susaṃmantrya mithaste nirjararṣayaḥ //
mallokamagamanbhītā dīnā māṃ samupasthitāḥ

māṃ praṇamya susaṃstūya sarve te kliṣṭacetasaḥ //
kṛtasvaṃjalayo mahyaṃ vṛttaṃ sarvaṃ nyavedayan

ahaṃ sarvaṃ suniścitya kāraṇaṃ tasya saddhiyā //
varaṃ dātuṃ gatastatra yatra tapyati so'suraḥ

avocaṃ vacanaṃ taṃ vai varaṃ brūhītyahaṃ mune //
tapastaptaṃ tvayā tīvraṃ nādeyaṃ vidyate tava

ityevaṃ madvacaḥ śrutvā tārakassa mahāsuraḥ //
māṃ praṇamya susaṃstūya varaṃ vavre'tidāruṇam

tāraka uvāca //
tvayi prasanne varade kimasādhyaṃ bhavenmama //
ato yāce varaṃ tvattaḥ śṛṇu tanme pitāmaha

yadi prasanno deveśa yadi deyo varo mama //
deyaṃ varadvayaṃ mahyaṃ kṛpāṃ kṛtvā mamopari

tvayā ca nirmite loke sakale'sminmahāprabho //
mattulyo balavānnūnaṃ na bhavetko'pi vai pumān

śivavīryasamutpannaḥ putrassenāpatiryadā //
bhūtvā śastraṃ kṣipenmahyaṃ tadā me maraṇaṃ bhavet

ityukto'tha tadā tena daityenāhaṃ munīśvara//
varaṃ ca tādṛśaṃ dattvā svalokamagamaṃ drutam

daityo'pi sa varaṃ labdhvā manasepsitamuttamam//
suprasannotaro bhūtvā śoṇitākhyapuraṃ gataḥ

abhiṣiktastadā rājye trailokyasyāsuraissaha//
śukreṇa daityaguruṇājñayā me sa mahāsuraḥ

tatastu sa mahādaityo'bhavastrailokyanāyakaḥ //
svājñāṃ pravartayāmāsa pīḍayansacarācaram

rājyaṃ cakāra vidhivastrilokasya sa tārakaḥ //
prajāśca pālayāmāsa pīḍayannirjarādikān

tatassa tārako daityasteṣāṃ ratnānyupādade //
iṃdrādilokapālānāṃ svato dattāni tadbhayāt

iṃdreṇairāvatastasya bhayāttasmai samarpitaḥ //
kubereṇa tadā dattā nidhayo navasaṃkhyakā

varuṇena hayāḥ śubhrā ṛṣibhiḥ kāmakṛttathā //
sūryeṇoccaiśśravā divyo bhayāttasmai samarpitaḥ

yatra yatra śubhaṃ vastu dṛṣṭaṃ tenāsureṇa hi//
tattadgṛhītaṃ tarasā nissārastribhavo'bhavat

samudrāśca tathā ratnānyadustasmai bhayānmune//
akṛṣṭapacyāsītpṛthvī prajāḥ kāmadughāḥ khilāḥ

sūryaśca tapate tadvattadduḥkhaṃ na yathā bhavet //
caṃdrastu prabhayā dṛśyo vāyussarvānukūlavān

devānāṃ caiva yaddravyaṃ pitṝṇāṃ ca parasya ca //
tatsarvaṃ samupādattamasureṇa durātmanā

vaśīkṛtya sa lokāṃstrīnsvayamiṃdro babhūva ha //
advitīyaḥ prabhuścāsīdrājyaṃ cakre'dbhutaṃ vaśī

nissārya sakalāndevāndaityānasthāpayattataḥ//
svayaṃ niyojayāmāsa devayonissvakarmaṇi

atha tadbādhitā devāssarve śakrapurogamāḥ//
mune māṃ śaraṇaṃ jagmuranāthā ativihvalāḥ

//
iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe tārakāsurataporājyavarṇanaṃnāma paṃcadaśo'dhyāyaḥ