Shiva Purana · Chapter 2.3.12

// brahmovāca // //
atha śailapatirhṛṣṭaḥ satpuṣpaphalasaṃcayam //
samādāya svatanayāsahito'gāddharāṃtikam

sa gatvā trijagannāthaṃ praṇamya dhyānatatparam//
arthayāmāsa tanayāṃ kālīṃ tasmai hṛdādbhutām

phalapuṣpādikaṃ sarvaṃ tattadagre nidhāya saḥ //
agre kṛtvā sutāṃ śambhumidamāha ca śailarāṭ

himagiriruvāca//
bhagavaṃstanayā me tvāṃ sevituṃ candraśekharam //
samutsukā samānītā tvadārādhanakāṃkṣayā

sakhībhyāṃ saha nityaṃ tvāṃ sevatāmeva śaṃkaram //
anujānīhi tāṃ nātha mayi te yadyanugrahaḥ

brahmovāca //
atha tāṃ śaṃkaro'paśyatprathamārūḍhayauvanām //
phullendīvarapatrābhā pūrṇacandranibhānanām

samastalīlāsaṃsthānaśubhaveṣavijṛmbhikām //
kambugrīvāṃ viśālākṣīṃ cārukarṇayugojjvalām

mṛṇālāyataparyyantabāhuyugmamanoharām//
rājīvakuḍmalaprakhyau ghanapīnaudṛḍhaustanau

bibhratīṃ kṣīṇamadhyāṃ ca trivalīmadhyarājitām //
sthalapadmapratīkāśapādayugmavirājitām

dhyānapaṃjaranirbaddhamunimānasamapyalam //
darśanādbhraṃśane śaktāṃ yoṣidgaṇaśiromaṇim

dṛṣṭvā tāṃ tādṛśīṃ tāta dhyānināṃ ca manoharām //
vigrahe tantramantrāṇāṃ varddhinīṃ kāmarūpiṇīm

nyamīlayadṛśau śīghraṃ dadhyau svaṃ rūpamuttamam //
paratattvaṃ mahāyogī triguṇātparamavyayam

dṛṣṭvā tadānīṃ sakaleśvaraṃ vibhuṃ tapojuṣāṇaṃ vinimīlitekṣaṇam//
kapardinaṃ candrakalāvibhūṣaṇaṃ vedāntavedyaṃ paramāsane sthitam

vavanda śīrṣṇā ca punarhimācalaḥ sa saṃśayaṃ prāpadadīnasattvaḥ //
uvāca vākyaṃ jagadekabandhuṃ girīśvaro vākyavidāṃ variṣṭhaḥ

himācala uvāca //
devadeva mahādeva karuṇākara śaṃkara //
paśya māṃ śaraṇamprāptamunmīlya nayane vibho

śiva śarva maheśāna jagadānandakṛtprabho //
tvāṃ nato'haṃ mahādeva sarvāpadvinivartakam

na tvāṃ jānaṃti deveśa vedāśśāstrāṇi kṛtsnaśaḥ//
atīto mahimādhvānaṃ tava vāṅmanasoḥ sadā

atadvyāvṛttitastvāṃ vai cakitaṃ cakitaṃ sadā //
abhidhatte śrutiḥ sarvā pareṣāṃ kā kathā matā

jānaṃti bahavo bhaktāstvatkṛpāṃ prāpya bhaktitaḥ //
śaraṇāgata bhaktānāṃ na kutrāpi bhramādikam

vijñaptiṃ śṛṇu matprītyā svadāsasya mamādhunā//
tava devājñayā tāta dīnatvādvarṇayāmi hi

sabhāgyohaṃ mahādeva prasādāttava śaṃkara //
matvā svadāsaṃ māṃ nātha kṛpāṃ kuru namo'stu te

pratyahaṃ cāgamiṣyāmi darśanārthaṃ tava prabho//
anayā sutayā svāminnideśaṃ dātumarhasi

brahmovāca //
ityākarṇya vacastasyonmīlya netre maheśvaraḥ //
tyaktadhyānaḥ parāmṛśya devadevo'bravīdvacaḥ

// maheśvara uvāca //
āgaṃtavyaṃ tvayā nityaṃ darśanārthaṃ mamācala//
kumārīṃ sadane sthāpya nānyathā mama darśanam

// brahmovāca //
maheśavacanaṃ śrutvā śivātātastathāvidham //
acalaḥ pratyuvācedaṃ giriśaṃ natakamadharaḥ

himācala uvāca //
kasmānmayānayā sārddhaṃ nāgaṃtavyaṃ taducyatām //
sevane kimayogyeyaṃ nāhaṃ vedmyatra kāraṇam

brahmovāca //
tato'bravīdgiriṃ śaṃbhuḥ prahasanvṛṣabhadhvajaḥ //
lokācāraṃ viśeṣeṇa darśayanhi kuyoginām

śaṃbhuruvāca //
iyaṃ kumārī suśroṇī tanvī candrānanā śubhā //
nānetavyā matsamīpe vārayāmi punaḥ punaḥ

māyārūpā smṛtā nārī vidvadbhirvedapāragaiḥ //
yuvatī tu viśeṣeṇa vighnakartrī tapasvinām

ahaṃ tapasvī yogī ca nirlipto māyayā sadā //
prayojanaṃ na yuktyā vai striyā kiṃ mesti bhūdhara

evaṃ punarna vaktavyaṃ tapasvivarasaṃśrita //
vedadharmapravīṇastvaṃ yato jñānivaro budhaḥ

bhavatyacala tatsaṃgādviṣayotpattirāśu vai //
vinaśyati ca vairāgyaṃ tato bhraśyati sattapaḥ

atastapasvinā śaila na kāryā strīṣu saṃgatiḥ //
mahāviṣayamūlaṃ sā jñānavairāgyanāśinī

// brahmovāca //
ityādyuktvā bahutaraṃ mahāyogī maheśvaraḥ // /
virarāma girīśaṃ taṃ mahāyogivaraḥ prabhuḥ

etacchrutvā vacanaṃ tasya śaṃbhornirāmayaṃ niḥspṛhaṃ niṣṭhuraṃ ca //
kālītātaścakito'bhūtsurarṣe tadvatkiṃcidvyākulaścāsa tūṣṇīm

tapasvinoktaṃ vacanaṃ niśamya tathā girīśaṃ cakitaṃ vicāryya //
ataḥ praṇamyaiva śivaṃ bhavānī jagāda vākyaṃ viśadantadānīm

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe śivahimācalasamvādavarṇanaṃ nāma dvādaśo'dhyāyaḥ