Shiva Purana · Chapter 2.2.9

brahmovāca //
tasmin gate sānucare śivasthānaṃ ca manmathe //
caritramabhavaccitraṃ tacchṛṇuṣva munīśvara

gatvā tatra mahāvīro manmatho mohakārakaḥ //
svaprabhāvaṃ tatānāśu mohayāmāsa prāṇinaḥ

vasaṃtopi prabhāvaṃ svaṃ cakāra haramohanam //
sarve vṛkṣā ekadaiva praphullā abhavanmune

vividhānkṛtavānyatnān ratyā saha manobhavaḥ //
jīvāssarve vaśaṃ yātāssagaṇeśaśśivo na hi

samadhormadanasyāsanprayāsā nipphalā mune //
jagāma sa mama sthānaṃ nivṛttya vimadastadā

kṛtvā praṇāmaṃ vidhaye mahyaṃ gadgadayā girā //
uvāca madano māṃ codāsīno vimado mune

kāma uvāca //
brahman śaṃbhurmohanīyo na vai yogaparāyaṇaḥ //
na śaktirmama nānyasya tasya śaṃbhorhi mohane

samitreṇa mayā brahmannupāyā vividhāḥ kṛtāḥ //
ratyā sahākhilāste ca niṣphalā abhavañcchive

śṛṇu brahmanyathā'smābhiḥ kṛtāṃ hi haramohane //
prayāsā vividhāstāta gadatastānmune mama

yadā samādhimāśritya sthitaśśaṃbhurniyaṃtritaḥ //
tadā sugaṃdhivātena śītalenātiveginā

udvījayāmi rudraṃ sma nityaṃ mohanakāriṇā //
prayatnato mahādevaṃ samādhisthaṃ trilocanam

svasāyakāṃstathā paṃca samādāya śarāsanam //
tasyābhito bhramaṃtastu mohayaṃstadga ṇānaham

mama praveśamātreṇa suvaśyāssarvajaṃtavaḥ //
abhavadvikṛto naiva śaṃkarassagaṇaḥ prabhuḥ

yadā himavataḥ prasthaṃ sa gataḥ pramathādhipaḥ //
tatrāgatastadaivāhaṃ saratissamadhurvidhe

yadā meruṃ gato rudro yadā vā nāgakeśaram //
kailāsaṃ vā yadā yātastatrāhaṃ gatavām̐stadā

yadā tyaktasamādhistu harastasthau kadācana //
tadā tasya puraścakrayugaṃ racitavānaham //

tacca bhrūyugalaṃ brahman hāvabhāvayutaṃ muhuḥ //
nānābhāvānakārṣīcca dāṃpatyakramamuttamam

nīlakaṃṭhaṃ mahādevaṃ sagaṇaṃ tatpuraḥsthitāḥ //
akārṣumohitaṃ bhāvaṃ mṛgāśca pakṣiṇastathā

mayūramithunaṃ tatrākārṣīdbhāvaṃ rasotsukam //
vividhāṃ gatimāśritya pārśve tasya purastathā

nālabhadvivaraṃ tasmin kadācidapi maccharaḥ //
satyaṃ bravīmi lokeśa mama śaktirna mohane

madhurapyakarotkarma yuktaṃ yattasya mohane //
tacchṛṇuṣva mahābhāga satyaṃ satyaṃ vadāmyaham

caṃpakānkeśarānvālānkāraṇānpāṭalāṃstathā //
nāgakeśarapunnāgānkiṃśukānketakānkarān

māgaṃdhimallikāparṇabharānkuravakāṃstathā //
utphullayati tatra sma yatra tiṣṭhati vai haraḥ

sarāṃsyutphullapadmāni vījayan malayānilaiḥ //
yatnātsugaṃdhīnyakarodatīva giriśāśrame

latāssarvāssumanaso dadhuraṃkurasaṃcayān //
vṛkṣāṃkaṃ cirabhāvena veṣṭayaṃti sma tatra ca

tānvṛkṣāṃśca supuṣpaughān taiḥ sugaṃdhisamīraṇaiḥ //
dṛṣṭvā kāmavaśaṃ yātā munayopi pare kimu

evaṃ satyapi śaṃbhorna dṛṣṭaṃ mohasya kāraṇam //
bhāvamātramakārṣīnno kopo mayyapi śaṃkaraḥ

iti sarvamahaṃ dṛṣṭvā jñātvā tasya ca bhāvanām //
vimukhohaṃ śaṃbhumohānniyataṃ te vadāmyaham

tasya tyaktasamādhestu kṣaṇaṃ no dṛṣṭigocare //
śaknuyāmo vayaṃ sthātuṃ taṃ rudraṃ ko vimohayet

jvaladagniprakāśākṣaṃ jaṭṭārāśikarālinam //
śṛṃgiṇaṃ vīkṣya kassthātuṃ brahman śaknoti tatpuraḥ

// brahmovāca //
mano bhavavacaścetthaṃ śrutvāhaṃ caturānanaḥ //
vivakṣurapi nāvocaṃ ciṃtāviṣṭo'bhavaṃ tadā

mohanehaṃ samartho na harasyeti manobhavaḥ //
vacaḥ śrutvā mahāduḥkhānniraśvasamahaṃ mune

niśśvāsamārutā me hi nānā rūpamahābalaḥ //
jātā gatā lolajihvā lolāścātibhayaṃkarāḥ

avādayaṃta te sarve nānāvādyānasaṃkhyakān //
paṭahādigaṇāstāṃstān vikarālānmahāravān

atha te mama niśśvāsasaṃbhavāśca mahāgaṇāḥ //
mārayacchedayetyūcurbrahmaṇo me puraḥ sthitāḥ

teṣāṃ tu vadatāṃ' tatra mārayacchedayeti mām //
vacaḥ śrutvā vidhiṃ kāmaḥ pravaktumupacakrame

mune'tha māṃ samābhāṣya tān dṛṣṭvā madano gaṇān //
uvāca vārayan brahmangaṇānāmagrataḥ smaraḥ

kāma uvāca //
he brahman he prajānātha sarvasṛṣṭipravartaka //
utpannāḥ ka ime vīrā vikarālā bhayaṃkarāḥ

kiṃ karmaite kariṣyaṃti kutra sthāsyaṃti vā vidhe //
kinnāmadheyā ete tadvada tatra niyojaya

niyojya tānnije kṛtye sthānaṃ dattvā ca nāma ca //
māmājñāpaya deveśa kṛpāṃ kṛtvā yathocitām

brahmovāca //
iti tadvākyamākarṇya mune'haṃ lokakārakaḥ //
tamavocaṃ ha madanaṃ teṣāṃ karmādikaṃ diśan

brahmovāca //
eta utpannamātrā hi mārayetyavadan vacaḥ //
muhurmuhuratomīṣāṃ nāma māreti jāyatām

sadaiva vighnaṃ jaṃtūnāṃ kariṣyanti gaṇā ime //
vinā nijārcanaṃ kāma nānā kāmaratātmanām

tavānugamane karma mukhyameṣāṃ manobhava //
sahāyino bhaviṣyaṃti sadā tava na saṃśayaḥ

yatrayatra bhavān yātā svakarmārthaṃ yadā yadā //
gaṃtā sa tatratatraite sahāyārthaṃ tadātadā

cittabhrāṃtiṃ kariṣyaṃti tvadastravaśavartinām //
jñānināṃ jñānamārgaṃ ca vighnayiṣyaṃti sarvathā

brahmovāca //
ityākarṇya vaco me hi saratissamahānugaḥ //
kiṃcitprasannavadano babhūva munisattama

śrutvā tepi gaṇāssarve madanaṃ māṃ ca sarvataḥ //
parivāryya yathākāmaṃ tasthustatra nijākṛtim

atha brahmā smaraṃ prītyā'gadanme kuru śāsanam //
ebhissahaiva gaccha tvaṃ punaśca haramohane

/
mana ādhāya yavāddhi kuru māragaṇaissaha //
moho bhavedyathā śaṃbhordāragrahaṇahetave

ityākarṇya vacaḥ kāmaḥ provāca vacanaṃ punaḥ//
devarṣe gauravaṃ matvā praṇamya vinayena mām

kāma uvāca //
mayā samyak kṛtaṃ karma mohane tasya yatnataḥ //
tanmoho nābhavattāta na bhaviṣyati nādhunā

tava vāggauravaṃ matvā dṛṣṭvā māragaṇānapi //
gamiṣyāmi punastatra sadārohaṃ tvadājñayā

mano niścitametaddhi tanmoho na bhaviṣyati //
bhasma kuryānna me dehamiti śaṃkāsti me vidhe

ityuktvā samadhuḥ kāmassaratissabhayastadā //
yayau māragaṇaiḥ sārddhaṃ śivasthānaṃ munīśvara

pūrvavat svaprabhāvaṃ ca cakre manasijastadā //
bahūpāyaṃ sa hi madhurvividhāṃ buddhimāvahan

upāyaṃ sa cakārāti tatra māragaṇo'pi ca //
mohobhavanna vai śaṃbhorapi kaścitparātmanaḥ

nivṛttya punarāyāto mama sthānaṃ smarastadā //
āsīnmāragaṇo'garvo'harṣo mepi purasthitaḥ

kāmaḥ provāca māṃ tāta praṇamya ca nirutsavaḥ //
sthitvā mama puro'garvo māraiśca madhunā tadā

kṛtaṃ pūrvādadhikataḥ karma tanmohane vidhe //
nābhavattasya mohopi kaściddhyānaratātmanaḥ

na dagdhā me tanuścaiva tatra tena dayālunā //
kāraṇaṃ pūrvapuṇyaṃ ca nirvikārī sa vai prabhuḥ

cedvaraste haro bhāryāṃ gṛhṇīyāditi padmaja //
paropāyaṃ kuru tadā vigarva iti me matiḥ

brahmovāca //
ityuktvā saparīvāro yayau kāmassvamāśramam //
praṇamya māṃ smaran śaṃbhuṃ garvadaṃ dīnavatsalam

iti śrīśivamahāpurāṇe dvitīyāyāṃ rudrasaṃhitāyāṃ satīkhaṃḍe satyupākhyāne kāmaprabhāvamāragaṇotpattivarṇano nāma navamo'dhyāyaḥ